ޖުމްހޫރީ ޕާޓީ (ޖޭޕީ) ގެ ކުރީގެ ސެކްރެޓަރީ ޖެނެރަލް އަލީ އާރިފް، ޕީޕީއެމް/ޕީއެންސީގެ ރިޔާސީ ކެންޑިޑޭޓު ޑރ. މުހައްމަދު މުއިއްޒަށް ތާއީދު ކުރައްވަން ނިންމަވައިފިއެވެ.

އަލީ އާރިފްއަކީ މި މަހުގެ 9 ގައި ބޭއްވި ރިޔާސީ އިންތިހާބުގެ ފުރަތަމަ ބުރުގައި ޖޭޕީގެ ރިޔާސީ ކެންޑިޑޭޓު އަދި ލީޑަރު ގާސިމް އިބްރާހިމަށް ކެމްޕެއިން ކުރެއްވުމުގައި އިސްކޮށް މަސައްކަތް ކުރެއްވި އެއް ބޭފުޅެވެ. އެކަމަކު، އިންތިހާބުގައި ގާސިމަށް ލިބިވަޑައިގެންނެވި ނާކާމިޔާބީ އާއި ދެވަނަ ބުރުގައި އެއްވެސް ކެންޑިޑޭޓަކަށް ތާއީދު ނުކުރަން ޖޭޕީން ނިންމުމާ އެކީގައި އަލީ އާރިފް ވަނީ ޖޭޕީގެ ސެކްރެޓަރީ ޖެނެރަލް ކަމުގެ މަގާމުން އިސްތިއުފާ ދެއްވައިފައެވެ.

ޖުމްހޫރީ ޕާޓީން އެއްވެސް ކޮޅަކަށް ނާރަން ނިންމި ނަމަވެސް ޖޭޕީގެ ނަން ބޭނުން ނުކޮށް އެ ޕާޓީގެ މެމްބަރުންނަށް ދެވަނަ ބުރުގައި ބޭނުން ކެންޑިޑޭޓަކަށް ތާއީދު ކުރުމުގެ ފުރުސަތު އޮންނާނެ ކަމަށް ގާސިމް ވަނީ މީގެކުރިން ވިދާޅުވެފައެވެ.

އަލީ އާރިފްގެ އަނބިކަނބަލުން މާޝާ ރޭ ކުރެއްވި ޓުވީޓެއްގައި ވިދާޅުވީ ގައުމަށާއި ރައްޔިތުންނަށް އެންމެ ފައިދާ ހުރީ މުހައްމަދު މުއިއްޒުގެ ވެރިކަމެއް ގާއިމް ކުރެވިގެން ކަމަށް ގަބޫލު ކުރައްވާކަމަށެވެ. އަދި  މުއިއްޒުއަކީ އެކަމަށް އެންމެ ގާބިލް ބޭފުޅާކަމާށް ގަބޫލު ކުރައްވާ ކަމަށެވެ.

އަލީ އާރިފްއަކީ ޕީޕީއެމް އުފެދުނީއްސުރެއް ޕީޕީއެމްގައި ވަރަށް އިސް ސަފެއްގައި މަސައްކަތް ކުރެއްވި ބޭފުޅެކެވެ. އެގޮތުން ޕީޕީއެމްގެ ޓިކެޓުކައި ކެލާ ދާއިރާ ތަމްސީލު ކުރައްވާ، އެ ޕާޓީގެ ތަރުޖަމާނެއްގެ ގޮތުގައި އަދި ކައުންސިލް މެންބަރު ކަން ވެސް ކުރެއްވިއެވެ.

އަލީ އާރިފް އާއި ޑރ. މުއިއްޒުއަކީ އާއިލީ ގޮތުން ގުޅިފައިވާ ދެބޭފުޅުންނެވެ.