ޓެކްސީތަކާއި ޚާއްސަ އެހީއަށް ބޭނުންވާ މީހުން ދުއްވުމަށް ހާއްސަކޮށްފައިވާ އުޅަނދުތައް ރަޖިސްޓްރީ ކުރުމަށް ގަރާޖު ސިޓީ ހުށަނާޅާ، 10،000 ރުފިޔާ ދެއްކުމުން ރަޖިސްޓްރީ ކުރެވޭ ގޮތަށް އެއްގަމުގައި ދުއްވާ އިންޖީނުލީ އުޅަނދު ރަޖިސްޓަރީ ކުރުމުގެ ގަވާއިދު އިއްޔެ އިސްލާހުކޮށް ގެޒެޓް ކޮށްފިއެވެ.
އެއްގަމުގައި ދުއްވާ އިންޖީނުލީ އުޅަނދު ރަޖިސްޓަރީ ކުރުމުގެ ގަވާއިދަށް މިގެނައި އިސްލާހުގައިވާ ގޮތުން، ޓެކްސީތަކާއި ޚާއްސަ އެހީއަށް ބޭނުންވާ އުޅަނދުތައް ރަޖިސްޓްރީ ކުރުމަށް ގަރާޖު ސިޓީ ބޭނުން ނުވާގޮތަށް އިސްލާހު ކުރި ނަމަވެސް، އެހެން ކެޓަގަރީތަކުގެ ވެހިކަލްތައް އަދިވެސް ރަޖިސްޓްރީ ކޮށްދިނުމަށް ހަމަޖެހިފައިވަނީ އެ އުޅަނދެއް ބާއްވާނެ ތަނެއް (ގަރާޖެއް) ދެއްކުމުންނެވެ.
މިގޮތުން އުޅަނދެއް ރަޖިސްޓްރީ ކުރުމަށް ގަރާޖެ ދެއްކުމަށް މިހާރު ފުރިހަމަވާން ޖެހޭ ޝަރުތުތަކަކީ:
- ގަރާޖެއްގައި އުޅަނދު ބޭއްވުމާ މެދު އެ ގަރާޖުގެ ވެރިފަރާތުގެ އިއުތިރާޒެއް ނެތްކަމުގެ ލިޔުން
- ގަރާޖުގެ ވެރިފަރާތުގެ ދިވެހި ރައްޔިތެއްކަން އަންގައިދޭ ކާޑުގެ ކޮޕީ
- އުޅަނދު ބާއްވާ ގަރާޖަކީ ރަޖިސްޓަރީކޮށްފައިވާ ގަރާޖެއްކަން އެނގޭނެ ލިޔުންތައް
ގަރާޖު ސިޓީގެ މައްސަލަ ބޮޑުވެ، ގަރާޖު ސިޓީ ދޫކުރުމުގައި ކޮރަޕްޝަން ހިމެނޭކަމަށް ބުނެ އެތައް ބައެއްގެ ޝަކުވާ ބޮޑުވެފައިވާއިރު، އެ އުސޫލު އުވާލުމަށް ރައްޔިތުންގެ މަޖިލިހަށްވެސް މީގެކުރިން ހުށަހަޅާފައި ވެއެވެ. އެހެންނަމަވެސް އޭރު މަޖިލިހަށް ހުށަހެޅުނު ގަރާރު މަޖިލިހުގައި ފާސްވެފައެއް ނުވެއެވެ.
ޓްރާންސްޕޯޓު މިނިސްޓްރީން ވަނީ، އެކިއެކި މަޝްރޫޢުތައް ހިންގަން ރާއްޖެ ގެންނަ ވެހިކަލްތަކަށް ވަގުތީ ރަޖިސްޓްރީ ދޫކުރުމަށް 15،000 ރުފިޔާ ދައްކަންޖެހޭ ގޮތަށްވެސް އާ ގަވާއިދެއް ހަދާފައެވެ. މި ކަހަލަ އުޅަނދުތައް ރަޖިސްޓްރީ ކުރުމަށް މީގެކުރިން އެއްވެސް ފައިސާއެއް ދައްކާކަށް ނުޖެހެއެވެ.
