ރިޔާސީ އިންތިޚާބުގައި ވެރިކަން ކުރާ މައި ޕާޓީ އެމްޑީޕީއާއިއެކު ކުރިއަށް ދެވެން އޮތް ހަމައެކަނި ގޮތަކީ މިމަހުގެ 28 ވަނަ ދުވަހުގެ ކުރިން ނިޒާމީ ވޯޓު ނެގުންކަަމަށް ދަ ޑިމޮކްރެޓްސް އިން ބުނެފިއެވެ.
ދަ ޑިމޮކްރެޓްސް އިން ރިޔާސީ އިންތިޚާބުގެ ދެވަނަ ބުރުގައި ނިންމާ ގޮތެއް ނިންމުމަށް ބޭއްވި އިންޓަރިމް ކައުންސިލް ބައްދަލުުވުމުގައި ވަނީ މިރޭ ގޮތެއް ނުނިންމައި، އެމްޑީޕީއާއި ޕީޕީއެމްއަށް މިމަހުގެ 20 ވަނަ ދުވަހާއި ހަމައަށް ގޮތެއް ނިންމުމަށް ފުރުސަތު ދީފައެވެ. މިގޮތަށް ގަރާރު ހުށަހެޅުއްވީ އެމްޑީޕީ މުހައްމަދު ޝިފާޒެވެ.
ޤަރާރުގައިވާ ކަންކަން:
1. އެމްޑީޕީއަށް، ހުށަހެޅި ހުށަހެޅުމަކީ ރާއްޖޭގައި އޮންނަން ފެނަން ވެރިކަމުގެ ނިޒާމާއި ގުޅޭގޮތުން 28 ސެޕްޓެމްބަރުގެ ކުރިން ނިޒާމީ ވޯޓު ނެގޭނެ އިންތިޒާމު ހަމަޖެއްސުން
2. ޕީޕީއެމްއާއިއެކު ސަރުކާރެއް އެކުވަލާލުމަށްޓަކައި ވެވޭ އެއްބަސްވުމެއްގައި މިމަހުގެ 20ގެ ކުރިން އެއްޗެއްގައި ސޮއިކުރުން
3. އެމްޑީޕީއާއި ޕީޕީއެމްއަށް ހުށަހަޅާ ހުށަހެޅުން ގަބޫލު ނުކުރާނަމަ ޑިމޮކްރެޓުން އެއްވެސް ބަޔަކަށް ތާއީދު ނުކުރަން ނިންމުން
ޝިފާޒު ހުށަހެޅި ހުށަހެޅުމަށް ދެޕާޓީންވެސް މިމަހުގެ 20 ގެ ކުރިން ޖަވާބެއް ދޭން ޖެހެއެވެ. ދެޕާޓީންވެސް ހުށަހެޅުންތައް ގަބޫލު ކޮށްފިނަމަ ގޮތް ނިންމާނީ ޑިމޮކްރެޓްސްގެ ކައުންސިލުންކަމަށް ހަސަން ލަތީފް ވިދާޅުވިއެވެ.
މިޤަރާރަށް ހުރިހާ މެމްބަރުންވެސް ތާއީދު ކުރާއިރު، މެމްބަރުންގެ ތެރެއިން މިހާތަނަށް ވާހަކަ ދެއްކި ހުރިހާ މެމްބަރުންވެސް ވަނީ ރައީސް ޞާލިހާއިއެކު ކުރިއަށް ނުދާނެކަމަށް ހާމަކޮށްފައެވެ. އޮތް ހަމަ އެކަނި ގޮތަކީ ރައީސް ޞާލިހު ނޫން ގޮތެއްކަމަށް ޑިމޮކްރެޓްސްގެ މެމްބަރުން ވަނީ ބުނެފައެވެ.
ރިޔާސީ އިންތިހާބުގައި ގުޅިގެން މަސައްކަތްކުރުމާ ގުޅޭގޮތުން، އެމްޑީޕީގެ ކުރީގެ ރައީސް މުހައްމަދު ނަޝީދު އާ ވާހަކަދައްކަވާފައިވާ ކަމަށާއި، ނިޒާމީ ވޯޓު އަންނަ ނޮވެމްބަރު 17 ގެ ކުރިން ނެގިދާނެ ކަމަށް ދަންނަވާފައިވާނެ ކަމަށް، އެމްޑީޕީގެ ރިޔާސީ ކެންޑިޑޭޓް، ރައީސް އިބްރާހިމް މުހައްމަދު ސޯލިހު މިއަދު ވަނީ ވިދާޅުވެފައެވެ.
