މިސަރުކާރު ވެރިކަމަށް ގެނައުމަކީ ހެދުނު އެންމެ ބޮޑު ގޯސް ކަމަށާއި، މިހާރު ރާއްޖޭގެ ޗާޓުގައި ރީދޫ ކޮށް އޮތް ކުޑަ ތަންކޮޅުވެސް ފޮހެލާ ރީދޫކުލަ ޗާޓުން ފޮހެލާނެކަމަށް ށ.އަތޮޅު ކައުންސިލް ރައީސް މުހައްމަދު ޝިޔާމް ވިދާޅުވެއްޖެއެވެ.
ރިޔާސީ ކެމްޕޭންގެ ދެވަނަ ބުރުގައި ޕީޕީއެމް/ޕީއެންސީގެ ކެންޑިޑޭޓް ޑރ. މުއިއްޒު ށ. އަތޮޅަސް ކުރައްވާ ދަތުރުފުޅުގައި ށ. ފުނަދޫގައި މިރޭ ބޭއްވި ޖަލްސާގައި ޝިޔާމް ވަނީ ޕީޕީއަށް ސޮއިކުރައްވާފައެވެ. ސޮއި ކުރެއްވުމަށްފަހު މިރޭގެ ޖަލްސާގައި ވަރަށް ފޯރީގައި ވާހަކަ ދައްކަމުން ޝިޔާމް ފުރަތަމަވެސް ވިދާޅުވީ މިހާރުު "ރޫޅާލަން" ބޭނުންވި ހުރިހާ އެއްޗެއް ރޫޅާލެވިއްޖެ ކަމަށެވެ. މިހާރު ދެން ބޭނުމީ މިކަން ނިންމަން ކަމަށާއި، މިވެރިކަން ނިންމާލާނީ ރައީސް ޞާލިހު ބޮޑު ތަނުން ބަލިކޮށްފައި ކަމަށެވެ.
އޭނާ ވިދާޅުވީ މިސަރުކާރުން ލާމަރުކަޒީ ބާރުތައް ދޫކޮށްލާނަމޭ ކިޔައި ދެއްކީ ހުސް ދަޅަކަަމަށެވެ. ކުޑަމިނުނ އިހުތިސާސްގައި ހިމެނޭ ކަންކަންވެސް ނެގީ ސަރުކާރަކަށް ކަމަށް އޭނާ ވިދާޅުވިއެވެ. މިވަރުގެ ބަޔަކަށް މިޤައުމުގެ ވެރިކަން ދެން ދޭން ހެޔޮ ނުވާނެކަމަށް ޝިޔާމް ވިދާޅުވިއެވެ.
ކައުންސިލްތަކަށް ބާރު ދޭނަމޭ ބުނީ، ގޯތި ދިނުންވެސް އަތުލީ. އަޅުގަނޑުމެން މިތިބީ މިވެރިކަން ގެނެވުމީތީ މިހާރު ލަދުން. ތަރައްޤީއަކީ މިމީހުން ދަންނަ އެއްޗެއްނޫން. ކުރީ ހުސް ޖެއްސުމާއި ދުއްތުރާ. މިއީ ވެރިކަން ކުރަން ނޭގޭ، އެކައްޗެއްޗެސްވެސް އެނގޭ މީހެއްނޫން.
– ޝިޔާމް ވިދާޅުވިއެވެ.
ޝިޔާމް ވިދާޅުވީ މިހާރު ރާއްޖޭގެ ޗާޓުގައި އެމްޑީޕީގެ ރީދޫ ކުލަ ފެންނަން އޮތީ ވަރަށް ކުޑަ ތަންކޮޅެއްގައި ކަމަށެވެ. ރިޔާސީ އިންތިޚާބުގެ ދެވަނަ ބުރުގައި އެކުލަކޮޅު ފޮހެލައި ރާއްޖޭގެ ޗާޓުން ރީދޫ ކުލަ ފޮހެލުމަކީ އަޒުމެއް ކަމަށެވެ. އެކަން ކުރާނީ މިހާރު އޮތް ވެރިކަންވެސް ނިމުމަކަށް ގެނައުމަށް މިކުރާ މަސައްކަތާއި އެކު އެކީގައި ކަމަށް އޭނާ ވިދާޅުވިއެވެ. ޝިޔާމް ވިދާޅުވީ ށ. އަތޮޅިގެ ތަރައްޤީގެ ބާނީ އަކީ ރައީސް ޔާމީން ކަމަށެވެ. އެއާޕޯޓަކީވެސް ސީދާ ރައީސް ޔާމީން ގެނެސް ދިން މަޝްރޫއެއް ކަމަށް ޝިޔާމް ވިދާޅުވިއެވެ.
