ރާއްޖެއާ ޗައިނާއާ ދެމެދު އޮތް ގާތް ރަހްމަތްތެރިކަމުގެ ގުޅުމަށް ހީނަރުކަން އަންނަ ގޮތަށް ބައެއް މީޑިއާތަކުން ފަތުރާ ދޮގު ޚަބަރު ހުއްޓަލުމަށް ރާއްޖޭގައި ހުންނަ ޗައިނާ އެމްބަސީން ގޮވާލައިފިއެވެ.
ޗައިނާ އެމްބަސީން މިކަމަށް ގޮވާލާފައިމިވަނީ، "ދިޔަރެސް" އޮންލައިން ނޫހަށާއި، ބައެއް ނޫސްވެރިންނަށް ޗައިނާއިން މާލީ އެހީތެރިކަން ފޯރުކޮށްދޭކަމަށް ބުނާ ޑޮކިއުމަންޓްތަކެއް ސޯޝަލް މީޑިއާގައި ދައުރުކުރަމުން ދަނިކޮށެވެ. އަދި ބައެއް ނުސްވެރިންނަށް ޗައިނާއިން ފަންޑުކުރާކަމަށްވެސް ސޯޝަލް މީޑިއާގައި ތުހުމަތުކޮށް ޕޯސްޓްކޮށްފައިވެއެވެ.
އެކަންކަމާއި ގުޅިގެން ރާއްޖޭގައި ހުންނަ ޗައިނާގެ އެމްބަސީން ނެރުނު ބަޔާނެއްގައިވަނީ ރާއްޖޭގެ ބައެއް މީޑިއާތަކުން ޗައިނާއަށް އަމާޒުކޮށް ދެ ގައުމުގެ ދެމެދުގައި އޮތް ވަރުގަދަ ގުޅުމަށް އަސަރުކުރާނެފަދަ ދޮގު ހަބަރުތަކެއް ފަތުރަމުންދާކަން ފާޙަގަވެފައިވާކަމަށެވެ.
އެޤައުމުން އަބަދުވެސް މަސައްކަތްކުރަމުންދާނީ އެހެން ޤައުމުތަކުގެ ދާޚިލީ ކަންކަމުގެތެރެއަށް ނުވަނުމަށްކަމަށް ޗައިނާ އެމްބަސީގެ ބަޔާނުގައިވެއެވެ. ޗައިނާއިން ރާއްޖޭގައި ހަމައެކަނި ކުރިއަށްގެންދަނީ ރާއްޖޭގެ އިޤްތިޞާދާއި އިޖްތިމާޢީ ކަންކަން ކުރިއެރުވުމަށް ކުރާ މަސައްކަތްތައްކަމަށް ޗައިނާ އެމްބަދީން ބުންޏެވެ.
ޗައިނާ އެމްބަސީން ވަނީ ރާއްޖެއާއި ޗައިނާއާއި ގުޅޭގޮތުން ފަތުރާ ދޮގު ޚަބަރުތަކުގެ ސަބަބުން ދިވެހިންގެ މެދުގައި ޗާނާއާއި ގުޅޭގޮތުން ނަފްރަތު ނުއުފެދޭނެކަމަށް ޤަބޫލުކުރާކަމަށްވެސް ޗައިނާ އެމްބަސީން ބުންޏެވެ.
ޗައިނާ އެމްބަސީން މި ބަޔާން ނެރެފައިވާއިރު، ޗައިނާގެ އަސްކަރީ ބާރު ރާއްޖެއަށް ގަދަކުރަން އުޅޭކަމަށްވެސް ބައެއް މީޑިއާތަކުން ފަތުރާފައިވެއެވެ. ނަމަވެސް ޗައިޏާއިން އެކަން ދޮގުކުރެއެވެ.
ކޮމެންޓު ފޮނުވާ