ރިޔާސީ އިންތިޚާބުގެ ދެވަނަ ބުރަށް ކުރަމުންދާ ކެމްޕޭންގައި ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒު މިއަދު ހަވީރު ހުޅުމާލޭ ރައްޔިތުންނާއި ބައްދަލު ކުރުމަށް ހަމަޖެހިފައިވާއިރު، މިރޭ މުއިއްޒު ބައިވެރިވެ ވަޑައި ގަންނަވާ ޖަލްސާ ބޭއްވުމަށް ހަމަޖެހިއްޖެއެވެ.
އިންތިޚާބުގެ ފުރަތަމަ ބުރުގައި ލިބުނު ކާމިޔާބީއާއިއެކުވެސް މުއިއްޒު ގެންދަވަނީ އިންތިޚާބު ބޮޑު ތަނުން ކާމިޔާބު ކުރުމަށް ކެނޑިނޭޅި އެއްވެސް ވަގުތެއް ބޭކާރުކޮށް ނުލާ މަސައްކަތް ކުރަމުންނެވެ. އެގޮތުން މިއަދު ހަވީރު މުއިއްޒު ހުޅުމާލޭގެ ރައްޔިތުންނާއި ބައްދަލު ކުރާނީ ފޭސްދޭއްގެ ބަސް ސްޓޮޮޕް އެކެއްގެ ކައިރިންނެވެ. މިބައްދަވުން ފެށުމަށް ހަމަޖެހިފައިވަނީ ހަވީރު 3:45 ގައެވެ.
މިބައްދަލުވުމަށްފަހު މިރޭ އާރޓްފިޝަލް ބީޗުގައި ޖަލްސާއެއް ބޭއްވުމަށް ވަނީ ހަމަޖެހިފައެވެ. މިޖަލްސާގައި ޑރ.މުއިއްޒަށް ތާއީދުކޮށް ޕީޕީއެމްއާއި ބައެއް ފަރާތްތަކުން ގުޅުމަށް ވަނީ ހަމަޖެހިފައެވެ.
މުއިއްޒު ގެންދަވަނީ ކެމްޕޭގައި މާލެއާއި އަތޮޅު ތެރޭގެ ރަށްތަކަށް ދަތުރުކޮށް ކެމްޕޭން އިިތުރަށް ފުޅާ ކުރަމުންނެވެ. އެގޮތުން މުއިއްޒު ވަނީ އިއްޔެ އެކަނިވެސް އަރިއަތޮޅުގެ 11 ރަށަކަށް ވަޑައިގެންފައެވެ. މިއީ ކެމްޕޭނެއްގައި ކެންޑިޑޭޓަކު މމިހާ ގިނަ އަދަދެއްގެ ރަށްތަކަކަށް އެއްދުވަހެއްގައި ދިޔަ ފުރަތަމަ ފަހަރުވެސް ކަން ފާހަގަކޮށްލެވެއެވެ.
