ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒަށް ރިޔާސީ އިންތިޚާބުގެ ފުރަތަމަ ބުރުން އިންތިޚާބު ކާމިޔާބު ނުވި ނަމަވެސް، ހިއްތަވަރާއިއެކު ދެވަނަ ބުރު ކާމިޔާބު ކުރުމަށް ކުރާ މަސައްކަތުގައި މިއަދު އެކަނިވެސް 11 ރަށަށް ވަޑައިގެން ރައްޔިތުންނާއި ބައްދަލުކުރައްވައިފިއެވެ.
ދެވަނަ ބުރުގެ ކެމްޕޭން މުއިއްޒު ފެއްޓެވީ އެމަނިކުފާނަށް ފުރަތަމަ ބުރުގައި އެންމެ ދަށްކޮށް ނަތީޖާތައް ލިބުނު އަރިއަތޮޅުންނެވެ. އެއަތޮޅުގެ 11 ރަށަކަށް މުއިއްޒު ވަނީ މިއަދު ވަޑައިގެންފައެވެ. މިއީ ރިޔާސީ އިންތިޚާބުގެ ކެމްޕޭންގައި އެއް ދުވަސް ތެރޭ މިހާ ގިނަ ރަށްރަށަށް ވަޑައިގެންނެވި ފުރަތަމަ ކެންޑިޑޭޓެވެ.
މުއިއްޒު މިއަދު ވަޑައިގަތް ރަށްތައް:
އއ. ބޮޑުފޮޅުދޫ
އއ. ފެރިދޫ
އދ. ހަންޏާމީދޫ
އދ. އޮމަދޫ
އދ. ކުނބުރުދޫ
އދ. ދަނގެތި
އދ. މާންދޫ
އދ. ދިގުރަށް
އދ. ދިއްދޫ
އދ. ފެންފުށި
އދ. މަހިބަދޫ
މިދިޔަ ހޮނިހިރު ދުވަހު ބޭއްވި ރިޔާސީ އިންތިހާބުގައި އެންމެ ގިނަ ވޯޓު ހޯއްދެވި މުއިއްޒަކީ އިންތިހާބުގެ ދެވަނަ ބުރަށް ދިޔަ ދެ ކެންޑިޑޭޓުންގެ ތެރެއިން އެއް ކެންޑިޑޭޓެވެ. މުއިއްޒު ވަނީ 101،635 ވޯޓު ހޯއްދަވައިފައެވެ. އޭނާއާ ވާދަކުރެއްވި ރައީސް އަދި އެމްޑީޕީގެ ރިޔާސީ ކެންޑިޑޭޓު އިބްރާހިމް މުހައްމަދު ސޯލިހަށް ލިބިވަޑައިގެންނެވީ 86،161 ވޯޓެވެ. އެކަމަކު، އެއްވެސް ކެންޑިޑޭޓަކަށް %50 އަށް ވުރެ ގިނަ އިން ވޯޓު ލިބިފައި ނުވާތީ އެއް ވަނަ އަށް ދިޔަ މުއިއްޒާއި ދެވަނަ އަށް ދިޔަ ރައީސް ސޯލިހް ދެވަނަ ބުރެއްގައި ވާދަކުރަން ވަނީ ޖެހިފައެވެ. ރިޔާސީ އިންތިހާބުގެ ދެވަނަ ބުރު ބޭއްވުމަށް ހަމަޖެހިފައި ވަނީ މި މަހުގެ 30 ވަނަ ދުވަހުއެވެ.
