މިސަރުކާރު އޮތީ "މާރިޔަލެއް"ގެ ދަށުވެފައި ކަމަށާއި، ކިތަންމެ ވަރަކަށް އެންޓި ކެމްޕޭންކޮށް ސަދޫމަކަށް މިތަން ހަދަން ކިތަންމެ ވަރަކަށް މަސައްކަތް ކުރިޔަސް އެޖާގަ ދެވެން ނެތްކަމުގައި ކުރީގެ އިސްލާމިކް މިނިސްޓަރ ޑރ. މުހައްމަދު ޝަހީމް ޢަލީ ސައީދު ވިދާޅުވެއްޖެއެވެ.

ރިޔާސީ އިންތިޚާބުގެ ދެވަނަ ބުރުގެ ކެމްޕޭނަށް އަތޮޅު ތަކަށް ޑރ. މުއިއްޒު ކުރައްވާ ދަތުރުފުޅުގެ ތެރެއިން މިރޭ އދ. މަހިބަދޫއަށް ވަޑައިގެން މިރޭ ބޭއްވި ޖަލްސާގައި ވާހަކަ ދައްކަވަމުން ޝަހީމް ވިދާޅުވީ މިސަރުކާރަށް ކަންކަން ރަނގަޅަށް ނުކުރެވެނީ ބޮޑު ސިންގާހާ މާރިޔަލެއްގެ ދަށުގައި މިސަރުކާރު ވެފައި ވުމުންކަމަށެވެ. އިންތިޚާބުގެ ފުރަތަމަ ބުރުގައިވެސް ކުރެއްވި މަސައްކަތަކީ އެންޓި ކެމްޕޭން ކުރުން ކަމަށެވެ.

އަދި ދެވަނަ ބުރުގައި އެންޓި ކެމްޕޭން އިތުރަށް ބާރަށް އެހެން ގިޔަރަކަށް ލައިގެން ކުރަމުންދާކަމަށާއި، މިއީ ސީދާ ޑރ. މުއިއްޒުގެ އަބުރު ކަތިލައި މިރާއްޖެ ވަކި ގޮތަކަށް ގެންދަން އެމްޑީޕީން ރާވައިގެން ކުރާ ކަމެއްކަމަށް ޝަހީމް ވިދާޅުވިއެވެ. އެމްޑީޕީން ބޭނުންވަނީ މިޤައުމު ސަދޫމަށް ހަދަން ކަމަށާއި، ނަމަވެސް އެޖާގަ ދިވެހި ރައްޔިތުން ނުދެއްވާނެކަން އިންތިޚާބުގެ ފުރަމަ ބުރުގައިވެސް އަދި ދެވަނަ ބުރުގެ އިންތިޚާބުގައިވެސް ފެނިގެން ދާނެކަމަށް ޝަހީމް ވިދާޅުވިއެވެ.

ދެވަނަ ބުރުގައި މިހާރުވެސް ވަނީ އެންޓި ކެމްޕޭނެއް ފަށާފަ. އަޅުގަނޑުމެން މިތަން ސަދޫމަކަށް ހަދާކަން ޖާގައެއް ނުދޭނަން. މިގައުމުގެ ބަހާތަށް އަޅުގަނޑުމެން ދަމަހައްޓާނަން. މިނިވަންކަން ފަމަހައްޓާނަން. މިޤައުމު އަޅުވެރތިވާކަން ޖާގަ ނުދޭނަން.

– ޝަހީމް ވިދާޅުވިއެވެ.

ޝަހީމް ވިދާޅުވީ ހަގީގަތާއި ޚިލާފް ވާހަކަ ދެއްކުމާއި، ދޮގުވާހަކަ ފެތުރުމަކީ ދުވަހަކުވެސް ކާމިޔާބު ލިބުނު ކަންކަމެއް ނޫންކަމަށެވެ. މުއިއްޒުއާއި ގުޅޭގިތުން މާރިޔާއާއި، އެމްޑީޕީގެ ވެރިން ދެއްކި ވާހަކަތަކުން މުއިއްޒުގެ މަގުބޫލުކަން އިތުރުވެ ވޯޓު ވީ އިތުރުކަމަށް ޝަހީމް ވިދާޅުވިއެވެ. މުއިއްޒުގެ އަމާޒަކީ މިކަންކަމަށް ރައްދު ދިނުމަށްވުރެ ޤައުމީ މައްސަލަތަކާއި ކުރިމަތިލައި އެކަންކަމަށް ހައްލު ހޯދުންކަމަށް ޝަހީމް ވިދާޅުވިއެވެ.