ހަރުކަށި ފިކުރާ ގުޅުވައި ޑރ.މުޙައްމަދު މުޢިއްޒުއާއި ގުޅޭގޮތުން ދައްކާ ފަސާދަވެރި ވާހަކަތަކުން އެމަނިކުފާނަށް ތާޢީދު އިތުރުވުންނޫން އިތުކަމެއް ނުވާނެކަމަށް ދީނީ ޢިލްމުވެރިޔާ ޝައިޚް ޢަލީ ޒައިދު ވިދާޅުވެއްޖެއެވެ.
ކުރިން ރައީސް އިބްރާހީމް މުޙައްމަދު ޞާލިޙާއި މިސަރުކާރުގެ ސިޔާސަތުތަކަށް ތާޢީދުކުރައްވަމުން ގެންދެވި ޒައިދު ވަނީ ރިޔާސީ އިންތިޚާބުގައި އެންމެ ޤާބިލް އަދި ބޭފުޅަކީ ޑރ.މުއިއްޒުކަމަށް ވިދާޅުވެ އެމަނިކުފާނަށް ތާޢީދު ކުރެއްވުމަށް ނިންމަވާފައެވެ.
މިއާއެކު ސަރުކާރުން ދައްކާ ވާހަކަތަކަށްވެސް ޒައިދު ގެންދަވަނީ ފާޅުގައި ފާޑުވިދާޅުވަމުންނެވެ. މިގޮތުން ޖަމްޢިއްޔަތުއް ސަލަފަކީ ހަރުކަށި ފިކުރުގެ ޖަމާއަތެއްގެ ގޮތުގައި ސިފަކޮށް، ޑރ.މުއިއްޒުއާއި ގުޅުވައި އެކި ވާހަކަތައް ސަރުކާރާ ބައެއް ވަޒީރުން ގެންދަވަނީ ވާހަކަ ދައްކަވަމުންނެވެ. ޑރ.މުއިއްޒުގެ ސަރުކާރެއްގައި ހަރުކަޒި ފިކުރު ފަތުރާނެކަމަށްވެސް ޑިފެންސް މިނިސްޓަރ މާރިޔާއާއި، ސަރުކާރުގެ އިސް ބައެއް ބޭފުޅުން ގެންދަވަނީ އެކި ޕްލެޓްފޯމްތަކުގައި ވިދާޅުވަމުންނެވެ.
އެވާހަކަތަކަށް ރައްދުދެއްވައި ޝައިޚް ޒައިދު ވިދާޅުވީ، އެމް.ޑީ.ޕީގެ ޕޯޑިއާމްތަކުގައި އެ ދައްކާ ވާހަކަތަކުން ޑރ.މުޢިއްޒުއަށް އޮތް ތާޢީދު ދާނީ އިތުރުވަމުންކަމަށެވެ.
އެމް.ޑީ.ޕީ ފަރާތުން ޕޯޑިއަމްތަކުގައި ހަމަނުޖެހޭ ވާހަކަތައް ދައްކަވާ ބޭފުޅުންނަށް ދަންނަވާލަން އޮތީ މުޢިއްޒޭ ހަރުކަށި ފިކުރޭ ކިޔައިގެން ތިޔަ ދައްކާ ފަސާދަވެރި ވާހަކަތަކުން މުޢިއްޒަށް ތާއީދު އިތުރުވުން ނޫންކަމެއް ނުވެއެވެ! ހަމަ ދައްކާވަރަކަށް ތާއީދު ދަނީ މައްޗަށެވެ. މާޝާ ﷲ!
– ޝައިޚް ޒައިދު ވިދާޅުވިއެވެ.
ސަރުކާރުން ދައްކާ އެފަދަ ވާހަކަތަކަށް ރައްދު ދެއްވާ ޖަމިއްޔަތުއް ސަލަފުންވެސް ވަނީ ބަޔާނެއް ނެރެފައެވެ.
ދީނީ ގިނަ އިލްމުވެރިން ހިމެނޭ ސަލަފް ޖަމްއިއްޔާއިން ނެރުނު ބަޔާނުގައި ބުނެފައިވަނީ ޖަމްޢިއްޔަތުއްސަލަފަކީ ދިވެހިރާއްޖޭގައި އިސްލާމްދީނުގެ މަތިވެރި ޝިޢާރުތައް ނަގަހައްޓައި، ދީނީކަންކަމަށް ކުރިމަތިކުރެވޭ ހުރަސްތަކާ ދެކޮޅަށް ޙަރަކާތްތެރި ވުމުގެ މަތިވެރި މަޤްޞަދުގައި މުޖުމަޢުގެ އެކިދާއިރާތަކުގައި ޙަރަކާތްތެރިވަމުންދާ މަދަނީ ޖަމްޢިއްޔާއެއް ކަމަށެވެ.
ދީނީގޮތުން ޙައްދުފަހަނައަޅައިގޮސް ޝަރުޢީ އުޞޫލުތަކުން ބޭރުން މުސްލިމުން ދީނުން ބޭރުކޮށް ކާފިރުކުރުމާއި، ބިދުޢަވެރި ކުރުމުގެ ނުބައި ހަރުކަށި ފިކުރުތަކުން މުޖުތަމަޢު ސަލާމަތްކޮށް އިސްލާމީ އުޞޫލުތަކުގެ މައްޗަށް ޤާއިމުވެފައިވާ ޞުލްޙަވެރި އަމާންވެއްޓެއް ޤާއިމުކުރުމަށް ޖަމްޢިއްޔަތުއްސަލަފުން ކުރަމުންދާ މިންނަތް މަސައްކަތަކީ ދިވެހިރައްޔިތުންނަށް އޮޅިފައިވާނެކަމެއް ނޫންކަމަށް ވަނީ ބުނެފައެވެ. ކަން މިހެން އޮތްއިރު ޖަމްޢިއްޔަތުއްސަލަފާއި ސަލަފުގެ ޢިލްމުވެރިންނަށް ޙައްދު ފަހަނައެޅުމާއި ހަރުކަށިފިކުރުގެ ތުހުމަތުކޮށް އެކި މަޤާމްތަކުގައި ތަކުރާރުކޮށް ޑިފެންސް މިނިސްޓަރ އަލްއުސްތާޛާ މާރިޔާއަޙްމަދުދީ ދައްކަވަމުންދާ ވާހަކަތަކަކީ އެއްވެސް އަސާސެއް ނެތް ބުހުތާނު ވާހަކަތަކެއް ކަމަށް ސަލަފުން ވަނީ ބުނެފައެވެ.
އަދި އަމުދުން ހަރުކަށި ކަމާއި، ޙައްދު ފަހައެޅުމަކީ ދީނީ ގޮތުން މިނެކިރަން ޖެހޭކަމަށް ވުމުގެ އިތުރުން؛ އެކަމަކީ ދިވެހިރާއްޖޭގެ ޤައުމީ ފެންވަރުގައި އެކުލަވާލެވިފައިވާ ޤައުމީ މިންގަނޑެއް ފެންނަން އޮތް ކަމަކަށް ވީހިނދު، ޝަރުޢީ މިންގަނޑަށް ބެލުމެއްނެތި، އަމުދުން ދައުލަތުން ޢަމަލުކުރުމަށް އެކަށައަޅުއްވާފައިވާ ޤައުމީ މިންގަޑުންވެސް ބޭރުން ހިތުހުރިހައި ފަރާތްތަކަށް ހަރުކަށި ފިކުރާއި ޙައްދުފަހަނައެޅުން ނިސްބަތްކުރަމުންދާ ދިއުމަކީ ވަރަށް ދަށުދަޖައިގެ ޒިންމާދާރުކަމެއް ނެތް ނާތަހުޒީބީ ޢަމަލެއްކަމުގައި ޖަމްޢިއްޔަތުއް ސަލަފުން ވަނީ ބުނެފައެވެ.
