އިސްލާމް ދީނާއި، ދިވެހި ޤައުމުގެ ހައްގުގައި ދިވެހި ހުރިހާ ރައްޔިތުންވެސް ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒުއަށް ވޯޓު ދެއްވުމަށް ރާއްޖޭގައި އުފެދުނު އެންމެ މޮޅު ފިލްމީތަރިންގެ ތެރޭގައި ޔޫސުފް ރަފީއު (ޔޫސޭ) އިލްތިމާސް ކޮށްފިއެވެ.

ޔޫސޭގެ ގޭދޮށުގައި މިރޭ ޑރ. މުއިއްޒުގެ ކެމްޕޭން ޓީމުން ބޭއްވި އިވެންޓުގައި ޔޫސޭ ވަނީ މުއިއްޒު އެސަރަހައްދުގައި ކެމްޕޭން އިވެންޓެއް ބޭއްވުމުން ވަރަށް ބޮޑަށް އުފާކޮށް، އެސަރަހައްދުގެ ރައްޔިތުންނަށް މިއިންތިޚާބު ބޮޑުތަނުން ކާމިޔާބް ކުރުމަށް އިތުރު ހިތްވަރެއް ލިބިފައިވާކަމަށް ބުނެފައެވެ.

މިއިންތިޚާބުގައި އޭނާއަށް ތާއީދު ކުރާ މީހުންނާއި، ތާއީދު ނުކުރާ މީހުންވެސް ވޯޓު ދިނުމުގައި އިސްކުރަންވީ ދީނާއި ރައްޔިތުން ކަމަށް މުއިއްޒު ވިދާޅުވިއެވެ. ޔޫސޭ ވަނީ ރައްޔިތުންގެ ކިބައި ވަރަށް އާދޭހާއިއެކު ޑރ. މުއިއްޒުއަށް ވޯޓު ދިނުމަށް އިލްތިމާސް ކޮށްފައެވެ.

އަޅުގަނޑަށް ސަޕޯޓް ކުރައްވާ، އަދި އަޅުގަނޑަށް ސަޕޯޓް ނުކުރެއްވިޔަސް މާތް ރަސްކަލާންގެ ރަސްކަން ފުޅަށްޓަކައި، ދީނަށްޓަކައި ޤައުމަށްޓަކައި ނަންބަރު 4 ޑރ. މުއިއްޒުއަށް ވޯޓު ދެއްވުމަށް އަޅުގަނޑު އާދޭހާއިއެކު ދަންނަވަން.

– ޔޫސޭ ރައްޔިތުންގެ ކިބައި އާދޭހާއިއެކު ދެންނެވިއެވެ.

ކައުންސިލް އިންތިޚާބުގައި މުއިއްޒު މާލޭ މޭޔަރު ކަމުގެ މަޤާމަށް ވާދަ ކުރެއްވުމުންވެސް ޔޫސޭ ވަނީ މުއިއްޒުއަށް ތާއީދުކޮށް މުއިއްޒަކީ ކުރީގެ ހައުސިން މިނިސްޓަރ އަލްމަރުހޫމް އުމަރު ޒާހިރު ފަދަ ހިންގުން ތެރި ޚިދުމަތްތެރި ބޭފުޅެއް ކަމަށް ވިދާޅުވެފައެވެ.