ހުޅުމާލެ ދެވަނަ ފިޔަވީގައި ތަރައްޤީކޮށްފައިވާ ވިނަރެސް ފްލެޓުތަކުގެ ޑައުން ޕޭމަންޓުގެ ގޮތުގަިއ މިހާރު ދައްކަން ޖެހޭ ބޮޑު ޑައުން ޕޭމަންޓާއި، އެތަނަށް ވަދެތިބި މީހުން ދައްކަންޖެހޭ ބޮޑު މަހު ކުއްޔާއި އަދި ޝޯޝަލް ހައުސިން ޔުނިޓްތަކަށް މިހާރު ޢާންމު ރައްޔިތުން ދައްކަމުންދާ ބޮޑު ކުލިތައް ކުޑަކޮށް ދެއްވާނެކަމަށް ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒު ވިދާޅުވެއްޖެއެވެ.
ރިޔާސީ އިންތިޚާބުގެ ދެވަނަ ބުރަށް ރައްޔިތުންގެ ތާއީދު އިތުރުކޮށް ވޯޓު ހޯދުމަށް ހުއްޓުމެއްނެތި ޑރ. މުއިއްޒު ކުރައްވަމުންދާ ކެމްޕޭން މަސައްކަތުގެ ތެރެއިން މިރޭ މާވެޔޮ މަގުގައި ބޭއްވި ކަންމަތީ ބައްދަލުވުމުގައި ވާހަކަ ދައްކަވަމުން ޑރ. މުއިއްޒު ވިދާޅުވީ ރައީސް ޔާމީންގެ ހުޅުމާލެއާއި ރާއްޖޭގެ އެކި ކަންކޮޅުތަކުގައި ރައްޔިތުންގެ ބޯހިޔާ ވަހިކަމަށް އަޅާ ދެއްވި ފްލެޓްތަކާއި ހައުސިން ޔުނިޓްތަކަކީ ރައްޔިތުންނަށް ތަކުލީފްތަކެއް އުފުލޭ ގޮތަށް އިމާރާތް ކުރެއްވި ތަންތަނެއް ނޫންކަމަށެވެ.
އެމަނިކުފާނު މިމަސައްކަތްތައް ކުރެއްވީ ވީހާވެސް ކުޑަ އަގެއްގައި ރައްޔިތުންނަށް ބޯހިޔާ ވަހިކަން ކަށަވަރު ކޮށްދެއްވުމަށް ކަމަށެވެ. ނަމަވެސް މިސަރުކާރުގެ މިފަސް އަހަރުގައި ރައްޔިތުންނަށް މިކަމުން އުފުލަން ޖެހުނީ ބޮޑު ތަކުލީފެއް ކަމަށް މުއިއްޒު ވިދާޅުވިއެވެ. އެއްވެސް ފްލެޓެއް ނިންމާ ނުލެވި، ރައްޔިތުންގެ ބޮލަށް ހުރިހާ ކަމެއް ޖަހައި ކުލިތަކުގެ އަގު ބޮޑުކޮށް، ދައުން ޕޭމަންޓްތައް ބޮޑުކޮށް އިތުރު ތަކްލީފް ޖެއްސުން ނޫންކަމެއް ބޯހިޔާ ވަހިކަމުގެ ސިޔާސަތުގެ ތެރެއިން މިސަރުކާރަށް ކުރެވިފައި ނުވާކަމަށް މުއިއްޒު ވިދާޅުވިއެވެ.
އަޅުގަނޑު އިރާދަ ކުރެއްވިއްޔާ ވިނަރެސް ފްލެޓްތަކަށް މިހާރު ދައްކަމުންދާ ބޮޑު ޑައުންޕޭމަންޓް ރައްޔިތުންނަށް ކުޑަކޮށްދޭނަން. ހަމަ މިއާއިއެކު ބޮޑެތި ލަގްޒަރީ އެޕާޓްމަންޓުތަކުގައި ދައްކަން ޖެހޭ ވަރަށް މިހާރު ދައްކަމުންދާ ބޮޑު އަދަދެއްގެ މަހު ކުލިތަކަށްވެސް ބަދަލު ގެނެސް ކުޑަކޮށް ދޭނަން. ހަމަ މިއާއިއެކު ޝޯޝަލް ހައުސިންތަކަށް ދައްކާ މަހު ކުލިތައް ކުޑަކޮށްދޭނަން.
– ޑރ. މުއިއްޒު ވިދާޅުވިއެވެ.
މުއިއްޒު ވިދާޅުވީ މިއަދު މާލޭގައި ދޮރުން ދޮރަށް ހިނގުމުން ރައްޔިތުންގެ ގިނަ ސުވާލުތަކާއި ކުރިމަތިލާންޖެހުނު ކަމަށެވެ. އެގޮތުން ސަރުކާރު ބަދަލުވެއްޖެ ނަމަ މިސަރުކާރުން އެފަރާތްތަކަށް ދީފައިވާ ގޯތި ނުވަތަ ފްލެޓްތައް ނުވަތަ ވަޒީފާތައް ގެއްލޭނެތޯ ރައްޔިތުން ވަނީ ސުވާލުކޮށްފައެވެ.
އަޅުގަނޑުމެންނެއް ރައްޔިތުންނަށް ލިބިފައި އޮތް އެއްޗެއް، ލިބެން އޮތް އެއްޗެއް ވިޔަސް އަތެއް ނުލާނަމޭ. އޭގެ ބަދަލުގައި އެހުރިހާ ކަންކަން ހަޤީގަތަކަށް ހަދާނީ.
– މުއިއްޒު ވިދާޅުވިއެވެ.
މުއިއްޒު ވިދާޅުވީ އެންމެ މުހިންމު ކަމަކަށް ވާނީ ރައްޔިތުންނަށް ބޯހިޔާވަހިކަން ފޯރުކޮށްދިނުން ކަމަށާއި އެކަން ޔަޤީނުންވެސް ކޮށްދެއްވާނެ ކަމަށެވެ. އަދި މި ސަރުކާރުން ލިބިފައިވާ އެއްވެސް ބޯހިޔާވަހި ކަމެއް އަތުނުލާނެ ކަމަށް މުއިއްޒު ވިދާޅުވިއެވެ.
މިސަރުކާރުން އިންތިހާބާއި ދިމާކޮށް ވަޒީފާތައް ބަހަމުންދާކަން ފާހަނގަކުރައްވަމުން މުއިއްޒު ވިދާޅުވީ ރައްޔިތުންނަށް ވަޒީފާ ދިނުމުން އެކަމާއި އުފާ ކުރާ ކަމަށެވެ. އަދި އެވަޒީފާތަކަށް ނަގާފައި ތިބި މީހުންގެ ވަޒީފާތައްް ނުގެއްލޭނެ ކަމަށް ވަނީ ވިދާޅުވެފައެވެ.
