ރާއްޖޭގެ ރައްޔިތުންގެ މަސްލަހަތު އިސްކޮށް ހުރިހާ ސިޔާސީ ލީޑަރުންނާއި، ސިޔާސީ ޕާޓީތަކާއި، މިނިވަން ކެންޑިޑޭޓުންވެސް އެކީ އެއްބައިވަންތަ ކަމާއިއެކު މަސައްކަތްކޮށް ރައްޔިތުން އެދޭ ބަދަލު ގެނައުމަށް އަތުގުޅާލުމަށް ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ.މުހައްމަދު މުއިއްޒު ގޮވާލައިފިއެވެ.
ރިޔާސީ އިންތިޚާބުގެ ދެވަނަ ބުރުގައި އެމްއެންޕީއާއިއެކު ކޯލިޝަން އެއްބަސް ވުމުގައި ސޮއި ކުރުމަށް ބޭއްވި ރަސްމިއްޔާތުގައި ވާހަކަ ދައްކަވަމުން މުއިއްޒު ވިދާޅުވީ އެމްއެންޕީ، ސިޔާސީ ވަކި ޕާޓީއެއްގެ ގޮތުގައި މަސައްކަތް ކުރި ނަމަވެސް އެޕާޓީގައި ތިއްބެވި ބޭފުޅުންނަކީ ޕީޕީއެމް/ޕީއެންސީއާއި ޚިޔާލާއި ފިކުރުގެ ގޮތުންވެސް އެއްވިސްނުމެއް އޮތް ބައެއް ކަމަށެވެ. ދެވަނަ ބުރުގައި ނާޒިމްއާއި، ރިޔާޒާއި، އުޝާމްފަދަ ބޭފުޅުންނާއި އެމްއެންޕީގެ ޢާންމު މެމްބަރުންގެ ތާއީދު ލިބުމަކީ އިންތިޚާބު ކާމިޔާބު ކުރުމަށް ލިބުނު އިތުރު ހިތްވަރެއް ކަމަށް މުއިއްޒު ވިދާޅުވިއެވެ.
މުއިއްޒު މިއަދުވެސް ވިދާޅުވީ ދެވަނަ ބުރުގައި ރައްޔިތުން އެދޭ އެދުމާއި އުންމީދުތައް ހާސިލްކޮށްދެވޭނީ ޤައުމީ ވިސްނުން އިސްކޮށްގެން ކަމަށެވެ. ރާއްޖޭގެ މިއަދުގެ ހާލަތު އޮތްގޮތުން ކޮންމެ ބޭފުޅަކުވެސް ފުރަތަމަ އިސްކުރަންވީ ޤައުމު ކަމަށާއި، މިޤައުމުގެ މަސްލަހަތާއި ސިޔާތަދާއި މިނިވަންކަމަށްވުރެ އިސްކުރަންޖެހޭ އެއްވެސް ކަމެއް އޮވެގެން ނުވާނެކަމަށް މުއިއްޒު ވިދާޅުވިއެވެ.
ދެވަނަ ބުރުގައި ސިޔާސީ ޕާޓީތަކާއި ސިޔާސީ ލީޑަރުންނާއި، އިންތިޚާބުގައި ވާދަ ކުރެއްވި މިނިވަން ކެންޑިޑޭޓުންގެ ކިބައި އެދެނީ ޤައުމު އިސް ކުރުމަށް މުއިއްޒު ވިދާޅުވިއެވެ. އަދި ކުރިއަށްދާނީ އެންމެން ގުޅިގެން އެކީގައި ރައްޔިތުން އެދޭ މިސްރާބަށްކަމަށެވެ. ޕީޕީއެމް/ޕީއެންސީއާއިއެކު ކޯލިޝަން ހަދަން ބޭނުންވާ ފަރާތްތަކަށް އެކޯލިޝަންގެ ސިޔާސަތާއި އުސޫލުތަކާއި އެއްގޮތަށް އެކީގައި ކުރިއަށް ދިއުމަށް ތައްޔާރަށް ތިބިކަމަށް މުއިއްޒު ވިދާޅުވިއެވެ.
އިންތިޚާބުގެ ފުރަތަމަ ބުރުގައި ވޯޓުލީ ނިސްބަތް މަދުވުމަކީ ދެވަނަ ބުރުގައި އެކަމަށް ޚާއްސަ އިސްކަމެއް ދެއްވައިގެން މަސައްކަތް ކުރާނެ ކަމެއްކަމަށް މުއިއްޒު ވިދާޅުވިއެވެ. އެގޮތުން ވޯޓުނުލާ މީހުންނާއި ހަމައަށް ވާސިލްވެ، އެމީހުންނާއި ބައްދަލުކުރައްވާނެކަމަށެވެ. އަދި ވޯޓުލާ މީހުންގެ ނިސްބަތް އިތުރުކޮށް އިންތިޚާބުގެ ދެވަނަ ބުރުގައި ބޮޑު ކާމިޔާބީއެއް ހޯދުމަށް ކެނޑިނޭޅި ވަރަށް މަސައްކަތް ކުރަމުންދާކަމަށް މުއިއްޒު ވިދާޅުވިއެވެ.
މުއިއްޒު ވިދާޅުވީ އިންތިޚާބުގެ ފުރަތަމަ ބުރުގައިވެސް ޒުވާނުންގެ ވަރަށް ބޮޑު ތާއީދެއް ލިބިގެން ދިޔަ ކަމަށެވެ. ޚާއްސަކޮށް 18 އަހަރު ފުރޭ ގިނަ ޒުވާނުންގެ ވޯޓު ލިބިގެން ދިޔަކަމީ ލިބުނު ބޮޑު ހިތްހަމަ ޖެހުމެއް ކަމަށެވެ. ދެވަނަ ބުރުގައިވެސް ޒުވާނުންގެ ދައުރު ޤައުމުގެ މުސްތަގުބަލަށްޓަކައި އިސްކޮށް ޤައުމު ސަލާމަތް ކުރުމަށް ވޯޓު ދެއްވުމަށް މުއިއްޒު ވަނީ އެދިވަޑައިގެންފައެވެ.
