ރިޔާސީ އިންތިޚާބުގެ ދެވަނަ ބުރުގައި އެންމެން ގުޅިގެން ކުރިއަށްދާން ރައީސް ޔާމީންގެ ލަފާފުޅުގެ މަތީން ސިޔާސީ ޕާޓީތަކާއި، މިނިވަން ކެންޑިޑޭޓުން ހިމެނޭހެން މަޝްވަރާތައް ކުރަމުން ދާކަމަށް ޕްރޮގްރެސިވް ކޮންގްރެސް ކޯލިޝަނުން ބުނެފިއެވެ.
ޕީޕީއެމް/ޕީއެންސީ ރިޔާސީ އިންތިޚާބުގެ ދެވަނަ ބުރުގައި އެކުގައި މަސައްކަތް ކުރުމަށް ކުރަމުންދާ މަޝްވަރާތަކާއި ގުޅޭގޮތުން ޚަބަރު އޮންލައިނަށް މައުލޫމާތު ދެއްވަމުން ތަރުޖަމާނު ހީނާ ވަލީދު ވިދާޅުވީ އިންތިޚާބުގައި ޕީޕީއެމް ޕީއެންސީން ކުރާ ކޮންމެ މަޝްވަރާއަކީ ރައީސް ޔާމީންގެ ލަފާފުޅާއި އިރުޝާދުގެ ދަށުން ކުރިއަށްދާ މަޝްވަރާތަކެއް ކަމަށެވެ. އެއްވެސް ސިޔާސީ ޕާޓީއަކާއި އަދި ކެންޑިޑޭޓަކާއި މަޝްވަރާ ކުރަނީ ރައީސް ޔާމީންގެ ލަފާފުޅުގެ މަތީންކަމަށް ހީނާ ވިދާޅުވިއެވެ.
އެގޮތުން މިހާރުވެސް ގިނަ ޕާޓީތަކާއި، ފުރަތަމަ ބުރުގައި ވާދަކުރެއްވި ކެންޑިޑޭޓުންނާއި މަޝްވަރާ ކުރަމުންދާކަމަށް އޭނާ ވިދާޅުވިއެވެ. ދެވަނަ ބުރުގައި އެކީގައި ކުރިއަށް ދިއުމަށް ޖުމްހޫރީ ޕާޓީއާއިއެކުވެސް މަޝްވަރާ ތައް ދަނީ ކުރަމުންނެވެ. ޖޭޕީއާއި މަޝްވަރާ ކުރަމުންދަނީވެސް ރައީސް ޔާމީންގެ ލަފާފުޅުގެ މަތީންނެވެ.
ހީނާގެ އިތުރުން ޕީޕީއެމްގެ ނައިބް ރައީސް އަހުމަދު ޝިޔާމްވެސް ވަނީ މިއިންތިޚާބުގައިވެސް އަދި އެނޫން ކަމެއްގައިވެސް ޕީޕީއެމް/ޕީއެންސީ ކުރާ ކޮންމެ ކަމެއް ކުރާނީ ރައީސް ޔާމީންގެ ލަފާފުޅާއި އިރުޝާދުގެ ދަށުންކަމަށެވެ.
އިންތިޚާބުގެ ދެވަނަ ބުރުގައި ޑރ.މުއިއްޒަށް ތާއީދު ކުރުމަށް އެމްއެންޕީން ވަނީ ނިންމާފައެވެ. އަދި އެހެން ޕާޓީތަކާއި، ކެންޑިޑޭޓުން ވަރަށް އަވަހަށް މުއިއްޒުއާއި ގުޅޭކަމަށް ޕީޕީއެމްއިން ބުނެއެވެ.
