ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ ކިބައިން މަޢާފަށް އެދިވައިގެން، އެމަނިކުފާނަށް މިހާރު ފުރިހަމަ އިތުބާރު އޮތްކަމަށް ރައްޔިތުންގެ މަޖިލީހުގެ ކާށިދޫ ދާއިރާގެ މެމްބަރު ޖާބިރު ވިދާޅުވެއްޖެއެވެ.

މަޖިލީހުގެ މިއަދުގެ ޖަލްސާގައި ވާހަކަ ދައްކަވަމުން ޖާބިރު ވިދާޅުވީ ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތްކަމަށް އޭނާ ލައްވާ ސޮއިކުރީ ނޭގި ހުއްޓާ ކަމަށެވެ. ނަމަވެސް އިއްޔެ އަނެއްކާ އިތުބާރު އޮތްކަމަށް ސޮއި ކުރައްވާފައިވާނެ ކަމަށާއި، މިހާރު ރައީސް ނަޝީދަށް ފުރިހަމަ އިތުބާރު އޮތްކަމަށް ޖާބިރު ވިދާޅުވިއެވެ.

އިއްޒަތްތެރި ރައީސް ވަރަށް ބޮޑަށް މާފު ކުރައްވާތި. ރައްޔިތުންގެ މަޖިލީހުގެ ރައީސް ކަމުން މަނިކުފާނު ވަކި ކުރުމަށް އަޅުގަނޑު ސޮއިކުރިން. އެހެން ނަމަވެސް އަޅުގަނޑުގެ އިތުބާރު މިހާރު އެބައޮތް. އެއީ އަޅުގަނޑަށް ނުވެސް އެގި އަޅުގަނޑު ލައްވާ އިތުބާރު ނެތްކަމަށް ސޮއިކޮށްފަ، އަނެއްކާ އިތުބާރު އޮތްކަމަށް ސޮއިކޮށްފަ، މައްސަލަ އަބުރާ ގެންދިޔައީ. މިހާރު އަޅުގަނޑުގެ އިތުބާރު މަނިކުފާނަށް އެބައޮތް. މިވަގުތުން ފެށިގެން މަނިކުފާނަށްތުރެ އަޅުގަނޑު އިތުބާރު ކުރާ ރައީސެއް ނެތޭ.

– ޖާބިރު ވިދާޅުވިއެވެ.

ޖާބިރު ވިދާޅުވީ ރިޔާސީ އިންތިޚާބުގެ ދެވަނަ ބުރުގައި ޑިމޮކްރެޓްސްގެ ފުރިހަމަ ތާއީދު ލިބޭނެކަމުގެ ޔަގީންކަން އޮތްކަމަށެވެ. ޑިމޮކްރެޓްސްއާއި އެމްޑީޕީއަކީ އެކައްޗެއް ކަމަށާއި އަބަދުވެސް މަސައްކަތް ކުރާނީ އެކީގައިކަމަށް ޖާބިރު ވިދާޅުވިއެވެ. ޖާބިރު ވިދާޅުވީ މިއިންތިޚާބުގެ ދެވަނަ ބުރު ރައީސް ޞާލިހު ކާމިޔާބު ކުރައްވާނީ އެއްބުރުންކަމަށެވެ. ނަމަވެސް ރައީސް ނަޝީދު ވަނީ ދެން އުފުރުސަތެއް ނެތްކަމަށް ވިދާޅުވެފައެވެ.