ރިޔާސީ އިންތިޚާބުގެ ވޯޓުލުން ނިމި ވޯޓު ގުނަމުންދާއިރު، ރާއްޖޭގެ ބޮޑެތި އާބާދީތައް ރައީސް އިބްރާހިމް މުހައްމަދު ޞާލިހުގެ މައްޗަށް ކުރި ހޯދައި ޑރ.މުއިއްޒު ކުރި ހޯއްދަވައިފިއެވެ.
ރާއްޖޭގެ އެންމެ ބޮޑު އާބާދީއެއް އޮތް މާލެ ސިޓީގެ މިހާތަނަށް ގުނުނުު ހުރިހާ ފޮއްޓެއްވެސް ނަތީޖާ ދައްކާއިން ކުރީގައި އުޅުއްވަނީ ޑރ. މުއިއްޒުއެވެ. އަދި އައްޑޫ ސިޓީއާއި، ފުވައްމުލަކު ސިޓީގައިވެސް މިހާތަނަށް ގުނުނު ވޯޓު ފޮށިތަކުގެ ތެރެއިން މަދު ފޮއްޓެއް ފިޔަވާ ހުރިހާ ފޮއްޓެއްގެ ނަތީޖާއިން ކުރީގައި އުޅުއްވަނީ ޑރ. މުއިއްޒުއެވެ.
އާދަޔާ ޚިލާޔް ނަތީޖާތައް ނިކުތް ފާހަގަ ކޮށްލެވޭ ދާއިރާތަކުގެ ތެރޭގައި ރ.އަލިފުށި ދާއިރާއާއި އައްޑޫ މީދޫ ދާއިރާ، އައްޑޫ ހުޅުދޫ ދާއިރާވެސް ހިމެެއެވެ. މިދާއިރާ ތައް ބޮޑު ތަފާތަކުން ނަގާފައިވަނީ ޑރ.މުއިއްޒުއެވެ.
ނަތީޖާތައް މިހާރު ދައްކާގޮތުން ޑރ. މުއިއްޒު މިއިންތިޚާބުގެ ފުރަތަމަ ބުރުގައި ތަފާތު ބޮޑުކޮށް ކުރި ހޯއްދަވާނެ ކަމަށް ބެލެއެވެ. ރައީސް ޞާލިހަށް މިއިންތިޚާބުގައި އެންމެ ބޮޑު ނާކާމިޔާބަކީ ބޮޑެތި ތަންތަން ގެއްލިގެން ދިއުމެވެ.
މިއަހަރުގެ ރިޔާސީ އިންތިޚާބުގައި ޖުމްލަ 282،395 މީހަކަށް ވޯޓުލުމުގެ ހައްޤު ލިބިފައިވެއެވެ. މީގެ ތެރޭގައި އަލަށް ވޯޓުލާ 27000 އަށްވުރެ ގިނަ މީހުން ހިމެނެއެވެ. އަދި ޤާނޫނަށް ގެނެވުނު އިސްލާޙާއެކު މިފަހަރުގެ އިންތިޚާބުގައި ލޯފަން މީހުންނަށް އިތުރު މީހެއްގެ އެހީއަކާއި ނުލާ، އަމިއްލައަށް ވޯޓުލުމުގެ ފުރުޞަތު ވަނީ ލިބިގެންގޮސްފައެވެ.
މި އިންތިޚާބުގައި ރާއްޖެއާއި ރާއްޖޭން ބޭރުގައި ވޯޓުލުމަށްޓަކާ ޖުމްލަ 574 ފޮށްޓެއް ވަނީ ބަހައްޓާފައެވެ. މިފަހަރުގެ ރިޔާސީ އިންތިޚާބުގައި ރާއްޖޭން ބޭރުގެ 5 ޤައުމެއްގައި ވަނީ ވޯޓު ފޮށި ބަހައްޓާފައެވެ. އެއީ ސްރީލަންކާގެ ކޮލަމްބޯއާއި، އިންޑިއާގެ ޓްރެވެންޑްރަމާއި، މެލޭޝިއާގެ ކުއަލަލަމްޕޫރުގެ އިތުރުން އިނގިރޭސިވިލާތުގެ ލަންޑަނާއި، ދުބާއީގައެވެ. އަދި 65 ރިސޯޓަކާއި 5 ޖަލެއްގައި ވޯޓު ފޮށި ބަހައްޓާފައިވެއެވެ.
