ރިޔާސީ އިންތިޚާބުގެ ވޯޓުލުން ނިމި ނަތީޖާތައް ހާމަކުރަނުންދާއިރު މިހާތަނަށް ގުނުނު ފޮށިތަކުން އެހެން ކެންޑިޑޭޓުންނާއި އަޅާބަލާއިރު ބޮޑުތަނުން ޕީޕީއެމް/ޕީއެންސީގެ ކެންޑިޑޭޓް ޑރ. މުއިއްޒުއާއި، އެމްޑީޕީގެ ކެންޑިޑޭޓް ރައީސް އިބްރާހިމް މުހައްމަދު ޞާލިހު އުޅުއްވާކަން ނަތީޖާތަކުން ދައްކަން ފަށައިފިއެވެ.
މިހާތަނަށް ގުނުނު 100 އަށް ވުރެ ގިނަ ވޯޓުގެ ނަތީޖާއަށް ބަލާއިރު މުއިއްޒުއާއި، ރައީސް ޞާލިހަށް ވަނީ 9،000 އެއްހާ ވޯޓު ލިބިފައެވެ. މިދެބޭފުޅުންގެ ތެރެއިން ކުރީގައި ޑރ. މުއިއްޒު އުޅުއްވާއިރު ތަފާތު އުޅެނީ 100 ވަރަކަށް ވޯޓެވެ. މި ދެ ބޭފުޅުން 40 ޕަސެންޓުން މަތީގައި އުޅުއްވާއިރު ދެން ތިއްބެވި ކެންޑިޑޭޓުންނަށް ނިސްބަތުން ލިބުނު ވޯޓު ވަރަށް މަަދެވެ.
މިއިންތިޚާބުގައި އެންމެ އާދަޔާއި ޚިލާފް ނަތީޖާއެއް ހޯދަމުން ދަނީ އުމަރު ނަސީރެވެ. އުމަރަށް 600 އަށް ވުރެ ގިނަ ވޯޓު ލިބިފައިވާއިރު، ޤާސިމަށް ލިބިފައިވަނީ 500 ވޯޓެވެ. އިލްޔާސް އުޅުއްވަނީ 1500 އަށްވުރެ ގިނަވޯޓާއިއެކުގައެވެ.
މިއަހަރުގެ ރިޔާސީ އިންތިޚާބުގައި ޖުމްލަ 282،395 މީހަކަށް ވޯޓުލުމުގެ ހައްޤު ލިބިފައިވެއެވެ. މީގެ ތެރޭގައި އަލަށް ވޯޓުލާ 27000 އަށްވުރެ ގިނަ މީހުން ހިމެނެއެވެ. އަދި ޤާނޫނަށް ގެނެވުނު އިސްލާޙާއެކު މިފަހަރުގެ އިންތިޚާބުގައި ލޯފަން މީހުންނަށް އިތުރު މީހެއްގެ އެހީއަކާއި ނުލާ، އަމިއްލައަށް ވޯޓުލުމުގެ ފުރުޞަތު ވަނީ ލިބިގެންގޮސްފައެވެ.
މި އިންތިޚާބުގައި ރާއްޖެއާއި ރާއްޖޭން ބޭރުގައި ވޯޓުލުމަށްޓަކާ ޖުމްލަ 574 ފޮށްޓެއް ވަނީ ބަހައްޓާފައެވެ. މިފަހަރުގެ ރިޔާސީ އިންތިޚާބުގައި ރާއްޖޭން ބޭރުގެ 5 ޤައުމެއްގައި ވަނީ ވޯޓު ފޮށި ބަހައްޓާފައެވެ. އެއީ ސްރީލަންކާގެ ކޮލަމްބޯއާއި، އިންޑިއާގެ ޓްރެވެންޑްރަމާއި، މެލޭޝިއާގެ ކުއަލަލަމްޕޫރުގެ އިތުރުން އިނގިރޭސިވިލާތުގެ ލަންޑަނާއި، ދުބާއީގައެވެ. އަދި 65 ރިސޯޓަކާއި 5 ޖަލެއްގައި ވޯޓު ފޮށި ބަހައްޓާފައިވެއެވެ.
