މިއަދު ކުރިއަށްދާ ރިޔާސީ އިންތިޚާބުގައި މިހާތަނަށް ވޯޓުލާ އާބާދީގެ 39 އިންސައްތަ މީހުން ވޯޓުލާފައިވާކަމަށް އިލެކްޝަންސް ކޮމިޝަނުން ވިދާޅުވެއްޖެއެވެ.
އިލެކްޝަންގެ އިންތިޚާބީ މައި މަރުކަޒުގައި މިހާރު ކުރިއަށްދާ ޕްރެސްގައި ކޮމިޝަންގެ ނައިބް ރައީސް އިސްމާއިލް ހަބީބް ވިދާޅުވީ މެންދުރު 12 ޖެހުމާ ހަމައަށް 112,250 މީހުން ވޯޓު ލައިފައި ވާކަމަށެވެ. އެއީ 39.75 ޕަސެންޓު މީހުންނެވެ.
އޭނާ ވިދާޅުވީ ވޯޓުލުން ކުރިއަށް ދަނީ އަމާންކަމާ އެކުގައި ކަމަށާއި ބައެއް ރަށްރަށުގައި ކޮންމެވެސް ވަރަކަށް މައްސަލަތަކެއް ދިމާވި ކަމަށް ވިދާޅުވިކަމަށެވެ. އެގޮތުން އއ.ރަސްދޫއާއި، ބ.ތުޅާދޫގައިވެސް ކޮންމެވެސް ވަރެއްގެ ކަންތައްތަކެއް ހިނގި ކަމަށެވެ. ނަމަވެސް މިހާރު އެކަންކަން ހައްލުކޮށް ވޯޓުލުން ފެށިފައިވާކަމަށެވެ.
ހަބީބް ވިދާޅުވީ މެންދުރާއި ހަމައަށް ވޯޓުލީ މީހުންގެ ނިސްބަތަށް ބަލާއިރު މިއީ އެހެން އިންތިޚާބު ތަކާއިއެކު ވަރަށް ބޮޑު ކުރިއެރުމެއް ކަމަށެވެ. އަދި މިހާރުވެސް ގިނަ އަދަދެއްގެ ބަޔަކު ވޯޓުލާން ކިއުގައި ތިބިމަކީ އޮތް ތަރުހީބު ބޮޑުކަން ހާމަވާ ކަމެއްކަމަށެވެ. ހަބީބް ވިދާޅުވީ ޖުމްލަކޮށް އިންތިޚާބުގެ ކަންކަން ހިނގަމުންދަނީ ވަރަށް އަމާން ކަމާއި އޮމާން ކަމާއިއެކުގައި ކަމަށެވެ.
އެނާ ވިދާޅުވީ ބޭރުގައި ބަހައްޓާފައިވާ ހުރިހާ ފޮއްޓަކަށްވެސް މިހާރު ވޯޓުލާން ފަށާފައިވާކަމަށެވެ. ރިޔާސީ އިންތިހާބުގެ ފުރުތަމަ ބުރުގެ ވޯޓުލުން މިއަދު ކުރިއަށްދާއިރު ވޯޓުލެވޭ އާބާދީއަކީ 282،395 މީހުންނެވެ. އަލަށް ވޯޓުލާ އާބާދީގެ އަދަދަކީ 27،006 އެވެ. ޖުމްލަ 574 ވޯޓު ފޮށި ބަހައްޓާފައިވެއެވެ. މި އިންތިހާބުގައި ފަސް ޕާޓީއަކުން ފަސް ކެނޑިޑޭޓުން އަދި އަމިއްލަ ގޮތުން ތިން ކެނޑިޑޭޓުން ހިމެނޭހެން ޖުމްލަ އަށް ކެނޑިޑޭޓުން ވާދަކުރެއެވެ.
އެއީ ކެނޑިޑޭޓް ނަމްބަރު އެކެއް އުމަރު ނަސީރު (އަމިއްލަ ގޮތުން)، ކެނޑިޑޭޓް ނަމްބަރު ދޭއް ހަސަން ޒަމީލް (އަމިއްލަ ގޮތުން) ކެނޑިޑޭޓް ނަމްބަރު ތިނެއް ރައީސް އިބްރާހިމް މުހައްމަދު ސޯލިހް (އެމްޑީޕީ) ކެނޑިޑޭޓް ނަމްބަރު ހަތަރެއް ޑރ. މުހައްމަދު މުއިއްޒު (ޕީއެންސީ) ކެނޑިޑޭޓް ނަމްބަރު ފަހެއް ގާސިމް އިބްރާހިމް (ޖޭޕީ) ކެނޑިޑޭޓް ނަމްބަރު ހައެއް، ފާރިސް މައުމޫން (އަމިއްލަގޮތުން) ކެނޑިޑޭޓް ނަމްބަރު ހަތެއް އިލްޔާސް ލަބީބް (ދަ ޑިމޮކްރެޓްސް) އަދި ކެނޑިޑޭޓް ނަމްބަރު އަށެއް، މުހައްމަދު ނާޒިމް (އެމްއެންޕީ) އެވެ.
