ރާއްޖޭގެ މިނިވަން ކަމާއި ސިޔާދަތާއި އިސްލާމީ ވަހުދަތު ނެހެެއްޓުމަށްޓަކައި ކުރިއަށް އޮތް ރިޔާސީ އިންތިޚާބުގައި ޑރ.މުހައްމަދު މުއިއްޒު އިންތިޚާބު ކޮށްދެއްވުމަށް ދީނީ އިލްމުވެރިޔާ އަދި ކުރީގެ އިސްލާމިކް މިނިސްޓަރ ޑރ.މުހައްމަދު ޝަހީމް ޢަލީ ސައީދު އިލްތިމާސް ކުރައްވައިފިއެވެ.

އިދިކޮޅު ކޯލިޝަންގެ ރިޔާސީ ކެންޑިޑޭޓް ޑރ. މުހައްމަދު މުއިއްޒަށް ތާއިދު ކުރައްވާ ޑރ. ޝަހީމް މާދަމާ ބާއްވާ އިންތިހާބާ ގުޅިގެން ފޭސްބުކްގައި ހިއްސާކުރި ވީޑިއޯ ކޮޅެއްގައި ވިދާޅުވީ ސަރުކާރު ބަދަލުވެއްޖެނަމަ ނުވަތަ އެހެން ވެރިއަކު އަތުވެއްޖެނަމަ މަޝްރޫތަކާއި ކަންތައްތައް ހުއްޓިދާނޭ ކަމަށް ބައެއް މީހުން ބުނަމުންދާ ކަމަށެވެ. ނަމަވެސް މަޝްރޫތަކެއް ނުހުއްޓޭނެ ކަމަށާއި އެއްވެސް ދައުލަތެއްގައި ސަރުކާރު ބަދަލުވެގެން މަޝްރޫތައް ނުހުއްޓޭނެ ކަމަށް ވިދާޅުވިއެވެ. އެއި އެއްވެސް ގައުމެއްގައިވާ ކަމެއް ނޫން ކަމަށްވެސް ވިދާޅުވިއެވެ.

ތައުލީމުހުރި ގާބިލް އިލްމުހުރި ތަޖުރިބާ ހުރި ޓީމަކުން ސަރުކާރާ ހަވާލުވެއްޖެކަމަށްވާނަ އެ މަޝްރޫތަކަށް ދިރުން ލިބިގެންދާނެ ކަމަށާއި އެ މަޝްރޫތައް އިތުރަށް ކުރިއަރާދާނެ ކަމަށް ވިދާޅުވިއެވެ. އަދި ކަންތައްތައް އަވަސްވާނެ ކަމަށާއި ގައުމު ދާނީ ކުރިއަށް ކަމަށާއި، އޭރުން ގައުމު ދަނީ ރަނގަޅު މިސްރާބަކަށް ކަމަށް ޝަހީމް ވިދާޅުވިއެވެ.

މިއީ އަޅުގަނޑުމެން ގައުމާ މެދުގައި ވިސްނަންވީ ފަހަރު. ހުރިހާ ޕާޓީއެއްގެ މެންބަރުން ތައައްސުބެއް ނެތި އަޅުގަނޑުމެން އެންމެ ރަނގަޅު ކެނޑިޑޭޓަށް ވޯޓުދޭންވީ. ތައުލީމާ ތަޖުރިބާއާ އެމީހެއްގެ އިލްމުހުރި މިންވަރާ އެ މީހެއް ތަރުރިބާ ހުރި މިންވަރު ބަލަން ޖެހޭނެ. މިއީ އިސްލާމް ދީނުގައިވެސް ވެރިއަކު އައްޔަން ކުރުމުގައި ބަލަންޖެހޭނެ މިންގަނޑުތައް. އަޅުގަނޑު އާދޭހާއެކު ރައްޔިތުންގެ އަރިހުން، އެދެނީ ޑރ މުއިއްޒަށް ތާއީދުކުރައްވާ. މުއިއްޒު ރައީސްކަމުގެ މަގާމަށް އިންތިހާބުކޮށްދެއްވުމަށް.

– ޝަހީމް ވިދާޅުވިއެވެ.

ޝަހީމް ވިދާޅުވީ މުއިއްޒުގެ މެނިފެސްޓޯގައި ހުރި ކަންތައްތައް އަވަސް މިނުގައި ތަންފީޒުކުރުމަށް އެހީތެރިވެދެއްވާނެ ކަމަށެވެ. ހާއްސަކޮށް އިސްލާމީ އެކިއެކި ދާއިރާތަކާ ގުޅޭކަންތައްތައް ރަނގަޅު ކުރުމަށް ދެވެން އޮތް ފުރިހަމަ އެހީތެރިކަން ދެއްވާނެ ކަމަށެވެ.