މާދަމާ އޮންނަ ރިޔާސީ އިންތިޚާބު ރައްޔިތުންގެ ފުރިހަމަ ތާއިދާއިއެކު ކާމިޔާބުކޮށް ދިވެހިންގެ މިނިވަންކަމާއި ސިޔާދަތު ނަގަހައްޓާ، ވަފާތެރި ވެރިކަމެއް ދިވެހި އެންމެހާ ރައްޔިތުންނަށް ކޮށްދެއްވާނެ ކަމުގެ ޔަގީންކަން ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒު ވިދާޅުވެއްޖެއެވެ.
ރިޔާސީ ކެމްޕޭންގައި ދިވެހި ރައްޔިތުންނަށް މުއިއްޒު ދެއްވި އެންމެ ފަހުގެ ޚިތާބުގައި ވިދާޅުވީ މާދަމައަކީ ދިވެހީންގެ ޤައުމީ ޙަޔާތުގައި މުހިންމު ދުވަހެއް ކަމަށެވެ. ދިވެހިރާއްޖޭގެ ރައީސުލްޖުމްހޫރިއްޔާކަމުގެ މަޤާމުގައި 5 އަހަރުގެ އާ ދައުރަކަށް ހުންނާނޭ މީހަކު ކަނޑައެޅުމަށް ޤާނޫނުއަސާސީ ލިބިދޭ ބާރުގެ ދަށުން، ދިވެހީން ނިންމާ ނިންމުމަކީ، އެއްވެސް ޝައްކެއްނެތް ގޮތުގައި، ޙާލަތަށް ހެޔޮ ބަދަލެއް ގެނައުމަށްޓަކައި، ވިޔަވަތިކަމާ ތަމައްދުން މި ޤައުމަށް ގެނައުމަށްޓަކައި، މިނިވަން ދިވެހިރާއްޖެއެއް އަޅުގަނޑުމެންގެ ދަރީންނާ ދަރީންގެ ދަރީންނަށް ވާރުތަކޮށްދިނުމަށްޓަކައި ނިންމާ އިޚްލާޞްތެރި އަމާނާތްތެރި ނިންމުމަކަށް ވާން ޖެހޭނެކަމަށް މުއިއްޒު ވިދާޅުވިއެވެ.
ފަސް އަހަރުގެ ވެރިކަމުގެ ދައުރެއް ނިމެމުންދާއިރު އަޅުގަނޑުމެންގެ އަމިއްލަ ނަފްސަށް ތެދުވެރިކަމާއެކު ޖަވާބުދޭން ޖެހޭ ސުވާލުތަކެއްް އެބަހުރި. މި 5 އަހަރުގެ ތެރޭ އަޅުގަނޑުމެންގެ ދިރިއުޅުމުގެ ޙާލަތުވީ ރަނގަޅުތޯ؟ ދިރިއުޅުމުގެ ޚަރަދު ބަރަދަށް ލުއިކަމެއް ލިބުނުތޯ؟ އާރުލާ ކަހަލަ ތަރައްޤީގެ ނިޝާންތަކެއް ޤައުމުން ފެންނާން އެބަހުރިތޯ؟ އިސްލާމްދީނާ ދިވެހީންގެ މިނިވަންކަން މި ފަސްގަނޑުގައި ދެމެހެއްޓޭނޭކަމަށް ލިބުނީ ކޮން އިތުބާރެއްތޯ؟ މިފަދަ އެތައް ސުވާލެއް.
– މުއިއްޒު ވިދާޅުވިއެވެ.
މީގެ 5 އަހަރުކުރީން، ރައީސް ޔާމީން ޢަބްދުލްޤައްޔޫމް، ޤައުމާ މުޚާޠަބުކުރައްވާ ދެއްކެވި ވާހަކަފުޅުތަކުގައި އެންމެ ބޮޑަށް އަލިއަޅުއްވާލައްވައި ކަންބޮޑުވެވަޑައިގަތީ، ވޯޓުން ނުކުންނަ ނަތީޖާއެއްގެ ސަބަބުން، ބޭރުގެ ނުފޫޒުތަކުގެ ދަށުވެ ދިވެހީންގެ އަމިއްލަ ބާރު މި ޤައުމުގައި ކުޑަވެގެން ހިނގައިދާނެތީ. ދަރަނިވެރިކަން ބޮޑުވެ މި ޤައުމު ބަނގުރޫޓުވާ ޙާލަތަށް ހިނގައިދާނެތީ. މިއަދު އެދުވަސް އަޅުގަނޑުމެންނާ ބައްދަލުކޮށްފި.
މުއިއްޒު ވިދާޅުވީ ޕީޕީއެމާ، ޕީއެންސީގެ ކޯލިޝަނުން، ދިވެހީންގެ ރާއްޖެ ދިވެހީންނަށް އަނބުރައި ހޯދައި ދިނުމަށްޓަކައި ރިޔާސީ އިންތިޚާބުގައި ވާދަކުރަން ނުކުމެ ތިބީ ވަރުގަދަ ޢަޒުމެއްގައި ކަމަށެވެ. ޤާނޫނީ ހަމަތަކުގެ މަތީން ރައީސް ޔާމީން މިނިވަންކޮށް، އަނިޔާވެރިކަމާ ބަދަލުހިފުމުގެ ރޫޙު ނިމުމަކަށް ގެނެސް، މި ޤައުމަށް ރަށްވެހިކަމާ އާރޯކަމުގެ އާ ޒަމާނެއް ގެނަސްދެއްވާނެކަމަށް މުއިއްޒު ވިދާޅުވިއެވެ. އަދި ކޮންމެ ދިވެހިރައްޔިތަކަށް ހިޔާވަހިކަމާ އާމުދަނީގެ މަގުތަކާ ވަޒީފާގެ ފުރުސަތު ކަށަވަރުކޮށްދެއްވާނެ ކަމަށާއި، ދިރިއުޅުމުގެ ޚަރަދުތައް ކުޑަކޮށްދީ، ތަޢުލީމާ ޞިއްޙަތާ އިޖްތިމާޢީ ކަންކަން ހަރުދަނާކޮށްދީ، ރައްޔިތުން އެދޭ ތަރައްޤީ ޢަމަލީގޮތުން ގެނަސްދޭނޭ ސަރުކާރެއް އަނެއްކާވެސް ޤާއިމުކޮށްދެއްވާނެ ކަމަށެވެ.
އަޅުގަނޑު މިއަދު މި ވަޢުދުވަނީ، ދިވެހި ލޮބުވެތި ރައްޔިތުން އެދިވަޑައިގަންނަވާ އަމާޒަށް މާތް ރަސްކަލާންގެ ވާގިފުޅާއެކު މި ދިވެހިރާއްޖެ ގެންގޮސްދިނުމަށް. ރެޔާދުވާލު ތެދުވެރިކަމާއެކު ޤައުމަށް ޚިދުމަތްކޮށް، މި ޤައުމުގެ މަޖްދާ ކަރާމާތް ނެގެހެއްޓުމަށް. ދިވެހި ޤައުމަށާ ރައްޔިތުންނަށް ބާއްޖަވެރި ތަނަވަސް ދުވަސްތަކެއް ހޯދައިދިނުމަށް.
– މުއިއްޒު ވިދާޅުވިއެވެ.
މުއިއްޒު ވަނީ ދިވެހި ރާއްޖޭގެ ރައީސުލްޖުމްހޫރިއްޔާކަމުގެ މަޤާމަށް ލޮބުވެތި ރައްޔިތުން އޭނާ ޚިޔާރުކުރައްވާ ކެންޑިޑޭޓް ނަންބަރު ހަތަރަކަށް ވޯޓު ދެއްވުމަށް ދަންނަވާފައެވެ. އިރާދަކުރެއްވިއްޔާ ރައްޔިތުންގެ އުންމީދުތައް ހަގީގަތަކަށް ހަދައި ރައްޔިތުންގެ ހައްޤުގައި ވަފާތެރި ވެރިކަމެއް އަޅުގަނޑު ކުރާނެ ކަމުގެ ޔަގީންކަން މުއިއްޒު ވަނީ ދެއްވާފައެވެ.
