ލ.ގަމުގެ ވެރިކަން ކުރާ އެމްޑީޕީއަށް ނިސްބަތްވާ ގިނަ އަދަދެއްގެ ޒުވާނުން މިރޭ ޕީޕީއެމްއާއި ގުޅި ރިޔާސީ އިންތިޚާބުގައި ޑރ.މުއިއްޒު އިންތިޚާބު ކުރުމަށް މަސައްކަތް ކޮށްދިނުމަށް ބައިއަތު ހިފައިފިއެވެ.
މިރޭ ގަމުގައި ބޭއްވި ފޯރިގަދަ ޖަލްސާގައި މިޒުވާނުންގެ ފޯމުތަކާއި ހަވާލުވީ ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ.މުހައްމަދު މުއިއްޒުއާއި، ޕްރޮގްރެސިވް ކޯލިޝަން ހިންގެވުމާއި ހަވާލުވެ ހުންނެވި އަބްދުއްރަހީމެވެ.
ގުޅުނު ޒުވާނުންގެ ތެރޭގައި ގިނައީ އެމްޑީޕީގެ ޒުވާނުންނެވެ. އޭގެ ތެރޭގައި އެމްޑީޕީގެ ކައުންސިލަރުންނާއި، އިސްކޮށް ހަރާކްތެރިވާ އެމްޑީޕީގެ ޒުވާނުންނާއި، ބައެއް ކުންފުނިތަކުގެ ވަޒީފާތަކުގައި ތިބި ޒުވާނުންވެސް ހިމެނެއެވެ. ޒުވާނުން ވަނީ އެމްޑީޕީ ލ. ރޫޅާނެކަމަށް ބުނެފައެވެ.
އަދި މިރިޔާސީ އިންތިޚާބު އެއްބުރުން ޑރ.މުއިއްޒުއަށް ކާމިޔާބު ކޮށް ދިނުމުގައި ގަމުގެ ޒުވާނުން ނަތީޖާ ނެރެދޭނެކަމަށް އެޒުވާނުން ވަނީ ބުނެފައެވެ.
މި ޒުވާނުން ގުޅުމުން މުއިއްޒުވަނީ ވެރިކަމާއި ހަވާލުވުމަށްފަހު ޒުވާނުންނަށް އިސްކަންދީ ޒުވާނުންގެ ކަންކަން ހާސިލް ކޮށްދެއްވާނެކަމަށް ވިދާޅުވެފައެވެ.
