އަންނަ ހޮނިހިރު ދުވަހު ބާއްވާ ރިޔާސީ އިންތިޚާބުގެ ސިއްރުކަން ގެއްލޭފަދަ އެއްވެސް ކަމަކަށް އަދި އިންތިޚާބަށް ނުފޫޒު ފޯރުވަފާނެ އެއްވެސް ކަމަކަށް ޖާގަ ނުދޭނެކަމަށް އިިލެކްޝަންސް ކޮމިޝަނުން ވިދާޅުވެއްޖެއެވެ.
ރިޔާސީ އިންތިހާބާ ގުޅޭ ގޮތުން ނޫސްވެރިންނަށް މައުލޫމާތު ދިނުމަށް އީސީ އިން މިއަދު ބޭއްވި ނޫސްވެރިންގެ ބައްދަލުވުމުގައި އެ ކޮމިޝަންގެ ނައިބު ރައީސް އިސްމާއީލް ހަބީބު ވިދާޅުވީ ވޯޓުގެ ސިއްރުކަން ކަށަވަރުކޮށް އިންތިހާބުގެ ކަންކަން ފުރިހަމައަށް ކުރުމަށް ގާނޫނާއި ގަވާއިދުގެ އިމުގެ ތެރެއިން ކުރުމަށް ކޮމިޝަނަށް ކުރެވެން ހުރި ހުރިހާ ކަމެއް ކުރާނެ ކަމަށެވެ.
ސިޔާސީ ގޮތުން ބައެއް ކަހަލަ ވާހަކަތައް އަޑުއިވުނު ނަމަވެސް ދިވެހި ރައްޔިތުންނަށް ކޮމިޝަންގެ ފަރާތުން ޔަގީންކަން އަރުވަނީ މި އިންތިހާބުގެ އެއްވެސް ހިސާބެއްގައި މަކަރެއް، ހަމަނުޖެހުމެއް ހެދުމުގެ އެއްވެސް ފުރުސަތެއް އަޅުގަނޑުމެން ނުދޭނެކަން.
– އިސްމާއީލް ހަބީބު ވިދާޅުވިއެވެ.
ހަބީބު ވިދާޅުވީ ކޮންމެ އިންތިޚާބަކާއި ގުޅިގެން އަބަދުވެސް އިދިކޮޅު ފަރާތްތަކުން، ވޯޓުގެ ސިއްރުކަން ގެއްލުމާއި، އިންތިޚާބަށް ނުފޫޒު ފޯރުވާފަދަ ވާހަކަތައް ދައްކާވާނެ ކަމަށެވެ. އެހެންނަމަވެސް އިލެކްޝަންސް ކޮމިޝަނުން އެއްވެސް ފަރާތަކާއި ގުޅިގެން ނުވަތަ އެއްވެސް ސިޔާސީ ޕާޓީ އަކާއި ގުޅިގެން އިންތިޚާބަށް ނުފޫޒު ނުފޯރުވާނެ ކަމަށާއި، އަދި އިންތިޚާބުގެ ސިއްރުކަން ގެއްލޭ ފަދަ އެއްވެސް ކަމެއް ކުރުމުގެ ފުރުޞަތު ނުދެއްވާނެކަމަށްވެސް ހަބީބު ވިދާޅުވިއެވެ.
ޙަބީބް ވިދާޅުވީ މިއަދާއި ހަމައަށް އައިރު، މާލެ އަތޮޅު ފިޔަވާއި އެހެން ހުރިހާ ރަށަކަށް ވޯޓު ކަރުދާހާއި، ވޯޓު ލާ މީހުންގެ ލިސްޓު ފައިނަލްކޮށް ފޮނުވާފައިވާކަމަށެވެ. އަދި މިމަހުގެ 4 ވަނަ ދުވަހު މާލެ އަތޮޅުގެ ރަށްތަކަށްވެސް ވޯޓު ކަރުދާހާއި، ވޯޓު ލިސްޓު ފޮނުވާނެކަމަށް ޙަބީބް ވިދާޅުވިއެވެ. އަދި ރާއްޖެއިން ބޭރަށް ފޮނުވާ ވޯޓު ކަރުދާހާއި، އެހެނިހެން ތަކެތި މިމަހުގެ 6 ވަނަ ދުވަހާއި 7 ވަނަ ދުވަހު ފޮނުވާނެކަމަށާއި، މިމަހުގެ 8 ވަނަ ދުވަހު ރިސޯޓުތަކަށް ވޯޓު ކަރުދާސް ފޮނުވާނެ ކަމަށްވެސް ޙަބީބް ވިދާޅުވިއެވެ. ރަށްރަށަށް ވޯޓު ކަރުދާސް ފޮނުވަމުން ދަނީ ފުލުހުންގެ އެހީތެރިކަމާއި، ބެލުމުގެ ދަށުންނެވެ.
މިފަހަރުގެ ރިޔާސީ އިންތިޚާބުގައި ޖުމްލަ 3034 އޮބްޒަރވަރުންނާއި، 3،810 މޮނިޓަރުންގެ އިތުރުން 1490 މަންދޫބުން، ރާއްޖޭގެ އެކި ކަންކޮޅުތަކުގައި ބަހައްޓާފައިވާ ވޯޓު ފޮށި ތަކުގައި ހަރަކާތްތެރިވަމުން ގެންދާނެކަމަށް ހަބީބު ވިދާޅުވިއެވެ. މީގެ ތެރޭގައި ރާއްޖެއިން ބޭރުގެ 143 އޮބްޒަރވަރުންނާއި 22 މޮނިޓަރުން ހަރަކާތްތެރިވާނެކަމަށާއި، އޭގެ ތެރެއިން 40 އޮބްޒަރވަރުންނަކީ ޔޫރަޕިއަން ޔޫނިއަން (އީޔޫ)ގެ ފަރާތުން ހަރަކާތްތެރިވާ އޮބްޒަރވަރުންކަމަށްވެސް ހަބީބު ވިދާޅުވިއެވެ.
މިއިންތިޚާބުގައިި ވޯޓުލުގެ ހައްގު ލިބެނީ 282،395 މީހުންނަށެވެ. އޭގެ ތެރޭގައި ހިމެނެނީ 138،196 އަންހެނުންނާއި 144،199 ފިރިހެނުންނެވެ.
