މިމަހުގެ 9 ވަނަ ދުވަހު ބާއްވާ ރިޔާސީ އިންތިޚާބުގައި ސްޓެލްކޯގެ މުވައްޒިފުން އެމްޑީޕީގެ ރިޔާސީ ކެންޑިޑޭޓް ރައީސް އިބްރާހިމް މުހައްމަދު ޞާލިހަށް ވޯޓު ދެއްވުމަށް އެކުންފުނީގެ މެނޭޖިން ޑިރެކްޓަރ އަހުމަދު ޝަރީފް އެދިވަޑައިގެންފިއެވެ.
ސްޓެލްކޯގެ މެނޭޖިން ޑިރެކްޓަރު ކަމާއި ޝަރީފް ހަވާލުވިފަހުން ގެނެވުނު ބަދަލުތަކާއި އަދި ކުރިއެރުންތަކާއި ގުޅޭގޮތުން ބޭއްވި ބައްދަލުވުމުގައި ޝަރީފް ވަނީ ކުރިއަށް އޮތް ރިޔާސީ އިންތިޚާބާއި ގުޅޭގޮތުންވެސް މުވައްޒިފުންނަށް މެސެޖުތަކެއް ދެއްވާފައެވެ. ޝަރީފް ވިދާޅުވީ ކުންފުންޏަށް ގެނެވުނު ހެޔޮ ބަދަލުތަކާއިއެކު އެ ހެޔޮބަދަލު ދަމަހައްޓަން ބޭނުންވާ ކަމަށެވެ. އެކަން ކުރެވޭނީ މިސަރުކާރުގެ ސިޔާސަތާއި އެއްގޮތަށް ކުރިއަށް ދެވިގެން ކަމަށާއި އެހެންކަމުން މިހާރުގެ ރައީސަށް ވޯޓު ދިނުމަކީ އެދޭ ވަރަށް ބޮޑު އެދުމެއް ކަމަށެވެ.
ޝަރީފް ވިދާޅުވީ ސްޓެލްކޯގެ މުވައްޒިފުންގެ ވިސްނުން ހުރިގޮތް އެނގިވަޑައިގަންނަވާ ކަމަށެވެ. ވަކިވަކި މުވައްޒުފުން ވޯޓު ދެއްވާނީ ކޮން ބޭފުޅަކަށް ކަމަށާއި، މުވައްޒިފުންގެ ތެރެއިން ވަކި ގޮތެއް ނުނިންމަނީ ކޮން މުވައްޒިފުންނެއް ކަންވެސް އެނގޭކަމަށެވެ. މުވައްޒިފުން ވޯޓުދޭގޮތް ބަލާފައިވަނީ މަކި ކަމެއް ކުރުމަށް ނޫންކަމަށާއި، ނަމަވެސް އެކަން ސާފުކުރީ ކޮން ބޭނުމެއްގައި ކަން ފަހުން ދަންނަވާނެކަމަށް ޝަރީފް ވިދާޅުވިއެވެ.
މެނޭޖިންގ ޑިރެކްޓަރ @ShareefRangondi ރޭ ވަނީ މިކުންފުނީގެ މުވައްޒަފުންނާއި ބައްދަލު ކުރައްވާފައި. މި ބައްދަލު ކުރެއްވުމަކީ، މެނޭޖިންގ ޑިރެކްޓަރުގެ މަގާމާއި ހަވާލުވެވަޑައިގެންނެވިފަހުން ކުންފުނީގެ އެންމެ ފަހުގެ މައުލޫމާތު މުވައްޒަފުންނާއި ހިއްސާ ކުރެއްވުމަށާއި، މުވައްޒަފުންގެ pic.twitter.com/gheiuy7UBY
— STELCO (@STELCOMALDIVES) August 20, 2023
ޝަރީފް ވިދާޅުވީ މުވައްޒިފުންނަށްވެސް އަދި ކުންފުންޏަށްވެސް އެންމެ ރަނގަޅު ގޮތަކީ މިއިންތިޚާބުގައި ރައީސް އިބްރާހިމް މުހައްމަދު ޞާލިހަށް ވޯޓު ދިނުން ކަމަށެވެ. އެގޮތަށް ޢަމަލު ކުރައްވާނެކަމަށް އުންމީދު ކުރައްވާކަމަށް ޝަރީފް ވިދާޅުވިއެވެ.
ކޮމެންޓު ފޮނުވާ