މޯލްޑިވްސް ފަންޑް މެނޭޖްމަންޓް ކޯޕަރޭޝަން (އެމްއެފްއެމްސީ) އާއި އައިލެންޑް އޭވިއޭޝަން ސާވިސަސް ލިމިޓެޑް (އައިއޭއެސްއެލް) އާއި ދެމެދު އައު އިންޓަރނޭޝަނަލް އެއަރލައިނެއް ޤާއިމުކުރުމުގެ އެއްބަސްވުމުގައި ސޮއިކޮށްފިއެވެ.
މިކަމުގެ އެއްބަސްވުމުގައި ދެ ފަރާތުގެ ދެމެދު ސޮއިކޮށްފައިވަނީ އިކޮނޮމިކް މިނިސްޓްރީގައި އެކަމަށްޓަކާ ބޭއްވި ޚާއްސަ ރަސްމިއްޔާތެއްގައެވެ. ފަންޑް މެނޭޖްމަންޓް ކޯޕަރޭޝަނުން ބުނީ ދެ ފަރާތުގެ ދެމެދު ވެވުނު މި އެއްބަސްވުމަކީ ވައިގެ ދަތުރުފަތުރާއި، ކަނެކްޓިވިޓީއަށް ބައިނަލްއަޤްވާމީ ފެންވަރުގައި އިންގިލާބީ ބަދަލުތަކެއް ގެނައުމަށް ފެށުނު ވަރަށް އުއްމީދީ ދަތުރެއްކަމަށެވެ.
އައިލެންޑް އޭވިއޭޝަނުން ބުނި ގޮތުގައި މި އެއްބަސްވުމާއެކު އުފައްދާ އެއާލައިންގައި ބޭނުންކުރާނީ ދިގު-ދަތުރުތަކަށް ހާއްސަ ވައިޑް-ބޮޑީ ފްލައިޓެވެ. މި އެއްބަސްވުމާއެކު ރާއްޖޭގެ އިގުތިސާދަށް ބޮޑު ކުރިއެރުމެއް ލިބިގެންދާނެކަން އެ ކުންފުނިން ފާހަގަކުރެއެވެ.
ފަންޑް މެނޭޖްމަންޓް ކޯޕަރޭޝަނުން ބުނި ގޮތުގައި އެ ކޯޕަރޭޝަނާއި އައިލެންޑް އޭވިއޭޝަން ގުޅިގެން އުފައްދާ އެއާލައިން ވެގެންދާނީ ދުނިޔޭގެ ފެންވަރުގައި ފާހަގަކުރެވޭ އަދި ރާއްޖޭގެ ރީތިކަމާއި މެހުމާންދާރީ ދައްކުވައިދޭނެ އެއާލައިނަކަށެވެ.
ފަތުރުވެރިންނަށް ހާއްސަކޮށް އެ އެއާލައިނުން ޗައިނާ، ޔޫރަޕް އަދި ރަޝިއާގެ އިތުރުން އިތުރު މަންޒިލްތަކަށް ދަތުރުކުރާނެ ކަމަށް އެމްއެފްއެމްސީން ބުނެއެވެ.
ކޮމެންޓު ފޮނުވާ