ދައުލަތުގެ މީޑިއާއިން ިއންތިޒާމު ކުރި ބަހުސްގައި ހުރިހާ ކެންޑިޑޭޓުންނަށް ބައިވެރިވެން ނެތުމުން ސަންގު ޓީވީން އިންތިޒާމު ކުރާ ރިޔާސީ ބަހުސް އަންނަ ހޮނިހިރު ދުވަހުގެރޭ ބާއްވަން ހަމަޖެހިއްޖެއެވެ.

ދައުލަތުގެ މީޑިއާއިން އިންތިޒާމު ކުރި ބަހުސް ނުބޭއްވުނު ސަބަބީ އެމްޑީޕީގެ ރިޔާސީ ކެންޑިޑޭޓް ރައީސް ޞާލިހަށް ބަހުސްގައި ބައިވެރިވެނެން ނެތުމުންނެވެ. އެރޭ އެމްޑީޕީން ވަނީ މާލޭގައި ބޮޑު ޖަލްސާއެއް ބޭއްވުމަށް ނިންމާފައެވެ. ބަހުސް ލަސްކުރުމަށް އެމްޑީޕީން އެދުމުން ދައުލަތުގެ މީޑިއާއިން ވަނީ އެގޮތަށް ފަސް ކުރުމުން އެހެން ކެންޑިޑޭޓުންގެ ކެމްޕޭނަށްވެސް ދަތިވާނެތީ ބަހުސް ކެންސަލް ކޮށްފައިވާކަން އިއުލާން ކޮށްފައެވެ.

މިއީ ދައުލަތުގެ މީޑިއާއިން ރިޔާސީ އިންތިޚާބެއްގެ ބަހުސް ނުބާއްވާ ހަމައެކަނި ފަހަރެވެ. ނިމިދިޔަ ރިޔާސީ އިންތިޚާބުގެ ބަހުސްގައިވެސް ރައީސް ޞާލިހު ބައިވެރިވެފައި ނުވެއެވެ.

ސަންގު ޓީވީ ހޮނިހިރު ދުވަހުގެރޭ ބާއްވާ ބަހުސްގެ ދައުވަތު ދީފައިވަނީ ހަމަ އެކަނި ޕާޓީތަކުން ވާދަކުރާ ކެންޑިޑޭޓުންނަށެވެ.

ސަންގު ބަހުސްގެ ދައުވަތު ދިން ކެންޑިޑޭޓުން:

– އެމްޑީޕީގެ ކެންޑިޑޭޓް ރައީސް އިބްރާހިމް މުހައްމަދު ސޯލިހު
– ޕީޕީއެމް/ޕީއެންސީގެ ކެންޑިޑޭޓް ޑރ. މުހައްމަދު މުއިއްޒު
– ޖުމްހޫރީ ޕާޓީގެ ކެންޑިޑޭޓް ގާސިމް އިބްރާހިމް
– ޑިމޮކްރެޓްސްގެ ރިޔާސީ ކެންޑިޑޭޓް އިލްޔާސް ލަބީބް
– އެމްއެންޕީގެ ކެންޑިޑޭޓް މުހައްމަދު ނާޒިމް

ސަންގު ޓީވީން ބުނީ ހޮނިހިރު ދުވަހުގެ ރޭ 9-11 އަށް ބާއްވާ ބަހުސްގެ ދައުވަތު ހުރިހާ ކެންޑިޑޭޓުން ވެސް ގަބޫލު ކުރައްވާފައިވާ ކަމަށެވެ. އެކަމަކު، ބަހުސް އޮންނާނެ ތަނެއް އަދި ފައިނަލެއް ނުވެއެވެ. ސަންގު ބަހުސްގައި ކެންޑިޑޭޓުންގެ ވައުދުތަކާއި މެނިފެސްޓޯގައި ހުރި ކަންކަން އަދި ތަސައްވުރާ ގުޅޭގޮތުން ވެސް ސުވާލުކުރާނެއެވެ.