ރާއްޖެ މިއަދު އޮތް އަޅުވެތި ހާލަތު އަރައިގަނެ މިނިވަން ދައުލަތަށް ހެދުމަށް ކުރެވޭ މަސައްކަތުގައި ކުރިއަށް އޮތް ވޯޓާއި ދިމާކޮށް ވަޒީފާގެ ބިރާއި، އެނޫން ގިނަ ނުފޫޒުތައް ކުރިމަތިވާނެ ކަމަށާއި ނަމަވެސް އެކަންކަމަށް ފަސް ނުޖެހުމަށް ޕީއެންސީގެ ރިޔާސީ ކެންޑިޑޭޓް ޑރ.މުހައްމަދު މުއިއްޒު އިލްތިމާސް ކުރައްވައިފިއެވެ.
ރިޔާސީ ކެމްޕޭންގައި ރ.އުނގުފާރަށް ވަޑައިގެން އެރަށުގެ ރައްޔިތުންނާއި މުޚާތަބުކޮށް ވާހަކަ ދައްކަވަމުން މުއިއްޒު ވިދާޅުވީ ދިވެހިންގެ މިނިވަންކަމާއި އިސްތުގުލާލާއިމެދު ސުވާލު އުފެދި އަޅުވެރި ކަމެއްގެ ތެރޭގައި އޮތް މިދަނޑިވަޅުގައި ރައްޔިތުން ކުރަންޖެހޭ އެންމެ ބޮޑު މަސައްކަތަކީ މިނިވަންކަން ހޯދުންކަމަށެވެ. އެކަން ކުރެވެން އަންނަނީ ކުރިއަށް އޮޔް ރިޔާސީ އިންތިޚާބު ކާމިޔާބު ކޮށްގެންކަމަށާއި އެކަން ކުރުމުގައި ކުރިއަށް އޮތް 10 ދުވަހު ކެނޑިނޭޅި މަސައްކަތް ކުރެއްވުމަށް ޑރ. މުއިއްޒު އެދިވަޑައިގެންނެވިއެވެ.
މުއިއްޒު ވިދާޅުވީ ރާއްޖޭގައި ތިބި އެހެން ޤައުމު ތަކުގެ ސިފަންނާއި އިތުރު ތިލަފަޅު އެއްބަސްވުމާއި، މަސްކަނޑު ވިއްކާލި ވިއްކާލުމުގެ ހަގީގަތް ހޯދައި ރައްޔިތުންނަށް ހަގީގީ މިނިވަންކަން ގެނެސްދެވޭނީ ކުރިއަށް އޮތް އިންތިޚާބު ކާމިޔާބު ކޮށްގެން ކަމަށެވެ.
މުއިއްޒު ވިދާޅުވީ މިމަސައްކަތުގައި ވަޒީފާތަކުގައި އުޅުއްވާ ބޭފުޅުންނަށް ވަޒީފާގެ ބިރާއި، އަދި އެކި ޕާޓީތަކަށް ނިސްބަތްވާ ބޭފުޅުންނަށް ފައިސާގެ ނުފޫޒާއި އެނޫންވެސް އެހެނިހެން ކަންކަން ހުށަހެޅޭނެކަމަށެވެ. ނަމަވެސް މިކަންްކަމަށް ވަރަށް ސާބިތު ކަމާއިއެކު ކުރިމަތިލައި ނުފޫޒުތަކަށް ނޫނެކޭ ބުނުމަށް ވަނީ އެދިފައެވެ.
މުއިއްޒު ވިދާޅުވީ ރައީސް ޔާމީން ފުރަތަމަ ޖަލު ހުކުމުން މިނިވަންވެ އެމަނިކުފާނު ކުރެއްވި އެންމެ ވަރުގަދަ ޖިހާދަކީ އިންޑިއާ ސިފައިން މިފަސްގަނޑުން ބޭލުމުގެ މަސައްކަތް ކަމަށެވެ. އެމަސައްކަތް އެމަނިކުފާނު ކުރެއްވި މިންވަރާއި ކުރެއްވި ބޮޑު މިނަށް ބަލައި އެމަނިކުފާނަށް އިތުރު ޖަލު ހުކުމެއް އިއްވައި ރައްޔިތުންނާއި ދުރު ކުރުވީ ކަމަށެވެ. މުއިއްޒު ވަނީ އިންތިޚާބު ކާމިޔާބުކޮށް ރައީސް ޔާމީން މިނިވަންކޮށް މުޅި ޤައުމު ތަރައްޤީ ކޮށްދެއްވާނެކަމުގެ އުފާވެރި ޚަބަރު ދެއްވާފައެވެ.
އެގޮތުން އުނގޫފާރުގެ ބިން ބޮޑުކޮށް ބިން ހިއްކައި، ބަނދަރު ހަދައި ޒުވާނުންނާއި އަންހެނުންނަށް ކުޅިވަރު ކުޅެވޭނެ ވަސީލަތްތައް ގާއިމްކޮށް ދެއްވާނެކަމަށެވެ.
