ކުރިއަށް އޮތް ރިޔާސީ އިންތިޚާބު އެއްބުރުން ކާމިޔާބު ކުރުމަށް އެންމެ ބޮޑު އެހީތެރިއަކަށް ވާނެ އެއްރަށަކީ ރ.އަތޮޅު މީދޫ ކަމުގައި ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒު ވިދާޅުވެއްޖެއެވެ.
ރ.އަތޮޅުގެ ރަށްތަކަށް މޫސުން ގޯސް ދުވަހެއް ނަމަވެސް މުއިއްޒު މީދޫއަށް ވަޑައިގެންނެވިއިރު މުޅި އެރަށުގެ ރައްޔިތުން އޮތީ ޑރ.މުއިއްޒަށް މަރުހަޚަބާ ދަންނަވަން ނިކުމެއެވެ. މީދޫގައި މުއިއްޒު ސަލާން ކުރަން ގިނަ ވަގުތުތަކެއް ހޭދަކުރަން ޖެހުމުން ނަމާދު ވަގުތާއި ކައިރިވާތީ ޖަލްސާވެސް ޖެހުނީ ވަރަށް ކުރުކޮށް ކުރިއަށް ގެންދާށެވެ.
މީދޫގައި އެރަށުގެ ރައްޔިތުންނާއި ވާހަކަ ދައްކަވަމުން މުއިއްޒު ވިދާޅުވީ މީދޫރައްޔިތުންގެ ފަރާތުން ފެނިގެންދިޔަ ރޫހަކީ ރިޔާސީ އިންތިޚާބު އެއްބުރުން ކާމިޔާބު ކުރުމަށް ލިބިގެންދިޔަ އިތުރު ހިތްވަރެއް ކަމަށެވެ. އަދި މީދޫ ވެގެންދާނީ މިފަހަރުގެ އިންތިޚާބު ޕީޕީއެމް، ޕީއެންސީއަށް ކާމިޔާބު ކޮށް ދިނުމަށް އެންމެ ބޮޑު އެހީތެރިކަމެއްވާނެ އެއަރަށަށް ކަމުގައެވެ.
އަޅުގަނޑަށް މިއަދު މިފެނިގެންދިޔަ މަންޒަރުން މިއިންތިޚާބު އެއްބުރުން ކާމިޔާބު ކުރުމުގައި މީދޫ ރައްޔިިތުންގެ ބައިވެރިވުން ބޮޑުވާނެކަމަށް ދެކެން. ކުރިއަށް އޮތް ދިހަ ދުވަހު އިިތުރަށް މަސައްކަތްކޮށް މިއިންތިޚާބު އެއްބުރުން ކާމިޔާބު ކޮށްދެއްވުމަށް އަޅުގަނޑު އެދެން.
– ޑރ.މުއިއްޒު ވިދާޅުވިއެވެ.
މުއިއްޒު ވަނީ މީދޫ ރައްޔިތުން އެދުނު ކަންތައްތަކުގެ ތެރެއިން މީދޫއަށް ދިމާވެފައިވާ ބިމުގެ ޖާގައިގެ ދަތިކަން ހައްލު ކުރުމަށް ފަޅުން ހިއްކެން އޮތް އެންމެ ބޮޑަކަށް ހިއްކައި ރަށުގެ ބޯހިޔާ ވަހިކަމަށް ހައްލު ހޯދައި ދޭނެކަމަށް ވިދާޅުވެފައެވެ. އަދި މީދޫ ބަނދަރުގެ ޖާގަ ބޮޑު ކުރުމުގެ މަޝްރޫއެއްވެސް ހިންގަވާނެކަމަށް ވިދާޅުވިއެވެ. މީގެ އިތުރުން މީދޫ ރައްޔިތުން ތާއަބަދު އުންމީދު ކުރަމުންދާ ހޮސްޕިޓަލް ހަގީގަތަކަށް ހައްދަވާ ދެއްވާނެކަމަށް މުއިއްޒު ވިދާޅުވިއެވެ.
މުއިއްޒު ވިދާޅުވީ މީދޫގައިވެސް ހުރި އެހެން ހުރިހާ މައްސަލަތަކަށް ހައްލު ހޯދައިދޭނީ ރައްޔިތުން އެދޭގޮތަށް ރައްޔިތުންގެ އަޑުއަހައިގެން ރައްޔިތުން ބޭނުންވާ ގޮތަށް ކަމުގައެވެ.
