މިވޭތުވެގެންދާ ފަސް އަހަރަކީ ފަހުގެ ތާރީޚުގައި ދުށް އެންމެ އަމާން ފަސް އަހަރު ކަމުގައި ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވިދާޅުވެއްޖެއެވެ.

ރިޔާސީ ކެމްޕޭންގައި ލ.މާވަށަށް ވަޑައިގެން އެރަށުގެ ރައްޔިތުންނާއި ބައްދަލު ކުރައްވައި ވާހަކަ ދައްކަވަމުން ރައީސް ޞާލިހު ވިދާޅުވީ ފަސް އަހަރު ފަހުން ދިވެހި ރައްޔިތުން އަނެއްކާވެސް ގޮތް ނިންމަން ކުރިމަތިލާއިރު ރައްޔިތުން ވިސްނަންވީ ޤައުމަށް އައިސްފައިވާ ބަދަލާއި ހޯދުނު ކުރިއެރުންތަކަށެވެ. ރައީސް ވިދާޅުވީ ޚިޔާލް ފާޅު ކުރުމާއި އެއްވެ އުޅުމާއި ނުރައްކާތެރި އެތައް ކަމެއް އޮތް ނާމާން ފަސް އަހަރަށްފަހު މިވެރިކަން ވެގެން ދިޔައީ އުފާވެރި އަމާން ފަސް އަހަރަށް ކަމަށެވެ.

މިވެރިކަމުގައި ރާއްޖޭގެ އަމާންކަން ގާއިމް ކުރުމަށް ކުރެވުނު މަސައްކަތުން ކުށްކުރާ މިންވަރު ބޮޑު ތަނުން ކުޑަ ކުރެވިފައިވާކަމަށެވެ. ރައީސް ވިދާޅުވީ ކުރިއަށް އޮތް ތާގައިވެސް މިއަމާންކަން ގާއިމް ކުރެވޭނީ މިސަރުކާރަށް ރައްޔިތުން ޖާގަ ދީގެންކަމަށެވެ.

ޚިޔާލް ފާޅު ކުރުމާއި އެއްވެ އުޅުމުގެ މިނިވަންކަން އެބައޮތް. ބިރުވެރި ހާލަތުން ރާއްޖެ އަމާން ރާއްޖެއަކަށް ބަދަލު ކުރެވިއްޖެ. މިއަމާންކަން ރައްޔިތުން ބޭނުންވާނެ. އަޅުގަނޑުމެން މިކުރަނީ އެމަސައްކަތް.

– ރައީސް ވިދާޅުވިއެވެ.

ރައީސް ވަނީ މިޖަލްސާގައި މާވަށު ބޯހިޔާ ވަހިކަމާއި، ސިއްޚީ ފަރުވާއާއި، ތައުލީމާއި ޒުވާނުންނަށް ބޭނުންވާ ކަންކަން ފަހިކޮށްދެއްވާނެކަމަށް ވިދާޅުވެފައެވެ. އަދި މަގުތައް ޒަމާނީ ފެންވަރަކަށް ހަދާ ތާރު އަޅާނެކަމުގެ ވައުދުވެސް ރައީސް ވަނީ ވެވަޑައިގެންފައެވެ. ރައީސް ވިދާޅުވީ މިނޫންވެސް ގިނަ ކަންކަން ކުރުމުގެ ފުރުސަތު ދެން އަންނަ ފަސް އަހަރުގައި ކުރައްވާނެކަމަށެވެ.