އެމްޑީޕީގެ ކެމްޕޭން ޓީމުން ޕީއެންސީގެ ރިޔާސީ ކެންޑިޑޭޓް ޑރ.މުހައްމަދު މުއިއްޒުގެ އަބުރަށް އަރައިގަނެ، އަނބިދަރީންނާއި ބެހޭ ހިސާބަށް ދާނީ، އިންތިޚާބުން ބަލިވާނެ ކަމުގެ ހުރިހާ ކުލަވަރެއް ފެނި ބަލި ގަބޫލު ކުރެވޭތީކަމަށް އިދިކޮޅު ކޯލިޝަން ހިންގުމާއި ހަވާލުވެ ހުންނެވި ޕީއެންސީގެ ރައީސް އަބްދުއްރަހީމް ވިދާޅުވެއްޖެއެވެ.
ރިިޔާސީ ކެމްޕޭންގައި މިރޭ ގއ.ވިލިނގިލީގައި ބޭއްވި ބޮޑު ޖަލްސާގައި އަދުރޭ ވަނީ ރައީސް ޞާލިހުގެ ތަރުޖަމާން މާރިޔާ ކޮންމެ ދުވަހު ޑރ.މުއިއްޒުގެ އަބުރަށް އަރައިގަނެ ދައްކަމުންދާ ވާހަތަކަށް ހޫނު ރައްދު ތަކެއް މިރޭގެ ޖަލްސާގައި ދެއްވާފައެވެ. އަދުރޭ ވިދާޅުވީ ރައީސް ޔާމީނާއި ޕީއެންސީގެ ރިޔާސީ ކެންޑިޑޭޓާއި ދިމާކޮށްކޮށް ކުރި ނުލިބުމުން މިހާރު ދިމާކޮށްލައިގެން އުޅެނީ ޑރ.މުއިއްޒުގެ އަނބިކަނބަލުންނާއި ކަމަށެވެ.
މާރިޔާ ދީދީއަކީ ރާއްޖޭގެ ޤާނޫނު އަސާސީގެ މައްޗަށް ފައިން އަރާ، ޤާނޫނުގެ ބާރު ކަނޑުވާލާފައިވާ މީހަކަށްވާއިރު އެފަދަ މީހަކު މީހެއްގެ އަބުރު ނަގާލައި ވާހަކަ ދެއްކުމަކީ އެއްވެސް ރައްޔިތަކަށް އާކަމަކަށް ނުވެދާނެކަމަށެވެ. ކެމްޕޭން ކުރުމުގައި ރީތި ގޮތުގައި ކެމްޕޭން ކުރުމުމުގެ ފުރުސަތު އޮތް ނަމަވެސް މާރިޔާއާއި އެމްޑީޕީގެ ކެމްޕޭން ޓީމުން ދަނީ އަބުރަށް އަރައިގަނެ، ހިތުހުރި އެއްޗެއް ގޮވުމުންކަމަށެވެ. މިކަންކަމާއި އަޅާނުލާ ތިއްބާ މިހާރު ވަނީ މުއިއްޒުގެ އަނބިކަނބަލުނާއި ބެހި ޒާތީ ގޮތުން ދިމާކުރަން ފަށާފައިކަމަށެވެ.
އަދުރޭ ވިދާޅުވީ ދެން އެޖާގަ ނުދެއްވާނެކަމަށެވެ. މާރިޔާއަކީ މިޤައުމަށް ޚިޔާނާންވެ ޤައުމުގެ މިނިވަންކަން ވިއްކާލުމުގައި ބައިވެރިވާ މީހަކަށްވާއިރު މާރިޔާގެ ފަތިފުށް ކިޔާދޭން ފަށައިފިނަމަ މާރިޔާގެ އަބުރެއްވެސް އިއްޒަތެއްވެސް ނޯންނާނެކަމަށް އަދުރޭ ވިދާޅުވިއެވެ. ރީތި ގޮތުގައި ކެމްޕޭން ކުރަން ބޭނުން ނުވާނަމަ ރައްޔިތުންގެ ކުރިމަތީގައި ދެކޮޅަށް ބަހުސްކުރާ އުސޫލުން މިބަހުސް ކުރުމަށް މާރިޔާ އައުމަށް އަދުރޭ ވަނީ ދައުވަތު ދެއްވާފައެވެ.
އަދުރޭ ވިދާޅުވީ މުއިއްޒުގެ އަނބިކަނަބލުންނާއި، ބައްޕާފުޅާއި އާއިލާއަކީ މާރިޔާއަށް އަނގަވެސް ނުހުޅުވޭހާ އިލްމީ ހަރުދަނާ ބޭފުޅުންތަކެއްކަމަށެވެ. ތައުލީމީ ގޮތުންވެސް ހިންގުމުގެ ގޮތުންވެސް މާރިޔާއަކަށްވެސް އެމްޑީޕީގެ ތެރޭގައިވެސް އެފަދަ ބޭފުޅުން ނުތިއްވަނާނެކަމަށް އަދުރޭ ވިދާޅުވިއެވެ.
އަދުރޭ ވަނީ މިއިންތިޚާބުގައި ޑރ.މުއިއްޒާއި ގުޅޭގޮތުން ދައްކާނެ ވާހަކައެއް އަދި ރައީސް ޞާލިހަށް ކުރާނެ ކެމްޕޭނެއް ނެތުމުން ގޮވަމުންގާ ގޮވެއްޔަކީ އިންތިޚާބު ބަލިވާނެކަން ޔަގީންވުމުން ކުރާ ކަމެއްކަމަށެވެ.
