ޝަންގްރިއްލާ ވިލިނގިލި ރިސޯޓް އެންޑް ސްޕާ ހިންގާ އައްޑޫ އިންވެސްޓްމަންޓް ޕްރައިވެޓް ލިމިޓެޑް ކުންފުނީގައި އޮތް ސަރުކާރުގެ ހިއްސާ ދޫކޮށްލާ އެކަމުގެ އެއްބަސްވުމުގައި ސޮއިކޮށްފިއެވެ.
ޝަންގްރިއްލާގައި ސަރުކާރުގެ 30 ޕަސެންޓު ހިއްސާއޮވެއެވެ. ބާކީ ހިއްސާއަކީ އައްޑޫ އިންވެސްޓްމަންޓް ޕްރައިވެޓް ލިމިޓެޑްގެ ހިއްސާއެވެ. ސަރުކާރުގެ ހިއްސާ އައްޑޫ އިންވެސްޓްމަންޓް ޕްރައިވެޓް ލިމިޓެޑަށް ދޫކޮށްލުމުގެ އެއްބަސްވުމުގައި ސަރުކާރުގެ ފަރާތުން ސޮއިކުރެއްވީ ޓޫރިޒަމް މިނިސްޓަރ ޑރ.ޢަބްދުﷲ މައުސޫމެވެ. އަދި އައްޑޫ އިންވެސްޓްމަންޓް ކުންފުނީގެ ފަރާތުން ސޮއިކުރެއްވީ އެކުންފުނީގެ ޖެނެރަލް އެފެއަރޒް ޑިރެކްޓަރ ސައުދު ޢަބްދުﷲއެވެ.
މިރަސްމިއްޔާތުގައި. ޓޫރިޒަމް މިނިސްޓަރ މައުސޫމް ވިދާޅުވީ، ޝަންގްރިއްލާ އޮޕަރޭޝަނަށް ގެނައުމަށް އޮތް އެންމެ ބޮޑު ހުރަސް މި ނައްތާލެވުނީކަމަށެވެ. މިއާއެކު އެ ރިސޯޓް އޮޕަރޭޝަނަށް ގެނައުމަށް ފަސޭހަވެގެންދާނެކަން މިނިސްޓަރ ފާހަގަކުރެއްވިއެވެ. އަދި އެ ރިސޯޓް އޮަޕަރޭޝަނަށް ގެނައުމަށް ދޭންޖެހޭ ހުއްދަތަށްދީ ސަރުކާރުގެ ފަރާތުން ދޭންޖެހޭ އެއްބާރުލުން ދޭނެކަމަށް މިނިސްޓަރ ވިދާޅުވިއެވެ.
މި ރަސްމިއްޔާތުގައި ޝަންގްރިއްލާ މޯލްޑިވްސްގެ ޖެނެރަލް މެނޭޖަރ ބްރައިސް ލުނޯ ވިދާޅުވީ، މިއީ ހުރަސްތައް ނައްތާލެވި އައު ފެށުމެއްކަމަށެވެ. އަދި ރިސޯޓް ވީއެންމެ އަވަހަށް ހުޅުވުމަށް މަސައްކަތް ކުރައްވާނެކަމަށް އޭނާ ވިދާޅުވިއެވެ.
އައްޑޫގައި ހުޅުވި ފުރަތަމަ ރިސޯޓު ޝަންގްރިއްލާ ރިސޯޓް އެންޑް ސްޕާ ބަންދުކުރީ ކޮވިޑުން ލިބުނު ގެއްލުމުން އަރައި ނުގަނެވިގެން 20 އޮގަސްޓު 2020 ގައެވެ. ގެއްލުމުގައި ހިންގަމުން އައި ކަމަށް ބުނާ އެ ރިސޯޓުގެ ހިދުމަތްތައް ހުއްޓާލުމާ އެކު، 500 މީހުންގެ ވަޒީފާ ގެއްލިގެން ދިޔައެވެ.
ގާތްގަނޑަކަށް 150 މިލިއަން ޑޮލަރު (1.04 ބިލިއަން ރުފިޔާ) ހަރަދުކޮށްގެން އެ ރިސޯޓުގައި 284 ކޮޓަރި ހެދިއެވެ. އެ ރިސޯޓު ހުޅުވެން އޮތީ އެ ރިސޯޓު ތަރައްގީކުރި އައްޑޫ އިންވެސްޓްމަންޓްސް ކުންފުނީގައި އޮތް ސަރުކާރުގެ 30 އިންސައްތަ ހިއްސާ ދޫކޮށްލައިގެންނެވެ.
