ވޭތުވެދިޔަ 3 ހަފްތާގެ ތެރޭގައި އޮފީހަށް ވަޑައިނުގެންނެވި ނަމަވެސް، މިނިސްޓަރު ނިސްބަތްވާ ސިޔާސީ ޕާޓީގެ ބައްދަލުވުންތަކަށް ބަރާބަރަށް ވަޑައިގަންނަވާކަމާއި، ޑޮމެއިން ވިއްކެވުމުގެ ކަންކަމުގައި ޓްރާންސްޕޯޓު މިނިސްޓަރު ނަހުލާ މިނިސްޓްރީއަށް ވަދެވަޑައިގަންނަވާކަން "ނުކިއްސަރު" މަގުންކަން ދެނަހުރިކަމަށް ޓްރާންސްޕޯޓު މިނިސްޓްރީގެ ނާއިބު ޙަމަދު ޢަބްދުލްޣަނީ ވިދާޅުވެއްޖެއެވެ.
ހަމަދު މިހެން ވިދާޅުވީ އޭނާ މަގާމުގެ މަސްއޫލިއްޔަތު އަދާކުރުމުގައި ގެންގުޅެންޖެހޭ ސުލޫކީ މިންގަނޑާ ޚިލާފުވެފައިވާ ކަމަށް ވިދާޅުވެ، ޓްރާންސްޕޯޓް މިނިސްޓްރީގެ މަސައްކަތްތަކުގެ ތެރެއިން އޭނާއާއި ހަވާލުކޮށްފައިވާ އެއްގަމާއި، ކަނޑާއި، ވައިގެ ދަތުރުފަތުރާގުޅޭ އެންމެހައި މަސައްކަތްތައް ސްޓޭޓް މިނިސްޓަރ އަޙްމަދު ޒުހައިރު އާ ހަވާލުކޮށްފައިވާކަމަށް ވިދާޅުވެ، 27 އޯގަސްޓް 2023ގައި މިނިސްޓަރު ނަހުލާ އޭނާއަށް ފޮނުވި މެމޯއަށް ރައްދުދީ ނަހުލާއަށް އެޑްރެސްކޮށް މިއަދު ފޮނުވި ސިޓީގައެވެ.
މި ސިޓީގައި ހަމަދު ވަނީ، ޓްރާންސްޕޯޓު މިނިސްޓްރީގެ ގަވާއިދުތަކާއި އަދި އުސޫލުތަކާއި ޚިލާފަށް ހިނގަމުންދާ ގިނަ ކަންތައްތަކެއް ބަޔާންކޮށް، އެކަންކަމުގެ މައުލޫމާތު ކަމާއި ގުޅުންހުރި މުވައްސަސާތަކާއި ހިއްސާކުރުމަށްވެސް ތައްޔާރަށް ހުންނެވިކަމަށް ވިދާޅުވެފައެވެ.
ގަވާއިދުތަކާއި އަދި އުސޫލުތަކާއި ޚިލާފަށް ހިނގަމުންދާ ގިނަ ކަންތައްތަކެއް ބަޔާންކޮށް، ޓްރާންސްޕޯޓު މިނިސްޓަރ އައިޝަތު ނަހުލާއަށް އެޑްރެސްކޮށް ހަމަދު ފޮނުވި ސިޓީ މިހާރުވަނީ އޭނާގެ އަމިއްލަ ޓުވިޓަރ ހޭންޑްލްއިން ޓުވީޓު ކޮށްފައެވެ. މިސިޓީގައި ހަމަދު ވަނީ ޓްރާންސްޕޯޓު މިނިސްޓަރު އައިޝަތު ނަހުލާ މިނިސްޓަރު ކަމުގައި ހުންނަވައިގެން، ގަވާއިދާ ޚިލާފަށް ޑޮމެއިން ވިއްކައިގެން ކަޅު ފައިސާ ރައްކާ ކުރަމުންދާކަމުގެ ތުހުމަތު ކޮށްފައެވެ.
ނަހުލާއަށް އެޑްރެސްކޮށް މިއަދު ފޮނުވި ސިޓީގައި ވަނީ މިނިސްޓަރުކަމުގެ މަސްއޫލިއްޔަތުގެ ތެރޭގައި ހިމެނޭ ދައުލަތުގެ އެންމެހައި މުދަލާއި ފައިސާ ހެޔޮގޮތުގައި ފަރުވާތެރިކަމާއެކު ބެލެހެއްޓުމުގެ ބަދަލުގައި، އެކަންކަމުން ނަހުލާ ގަވާއިދާ ޚިލާފަށް މަންފާ ހޯއްދަވާ ކަމަށްވެސް ތުހުމަތު ކޮށްފައެވެ.
ވޭތުވެދިޔަ 3 ހަފްތާގެ ތެރޭގައި އޮފީހަށް ވަޑައިނުގެންނެވި ނަމަވެސް، މިނިސްޓަރު ނިސްބަތްވާ ސިޔާސީ ޕާޓީގެ ބައްދަލުވުންތަކަށް ބަރާބަރަށް ވަޑައިގަންނަވާކަމާއި، ނުކިއްސަރު މަގުން ޑޮމެއިން ވިއްކެވުމުގެ ކަންކަމުގައި މިނިސްޓްރީއަށް ވަދެވަޑައިގަންނަވާކަން އަޅުގަނޑުވެސް ދެނަހުރިކަމެވެ. ތިޔަ ހިންގަވާ ކޮރަޕްޝަނުގެ ޢަމަލުތަކުން ހިތްވަރުދެވެނީ ގައުމުގެ ޒުވާން ޖީލު ހަލާކުކޮށް، އެޖީލު ނެތިކޮށްލައި، މުޖުތަމަޢު ހަލަބޮލިކޮށްލަން ކަމުގައިވާއިރު، މިއަދުގެ ޒުވާން ޖީލަކީ ޑޮމެއިން ބަހައިގެން ކޮންޓްރޯލްކުރެވޭ ކޮމޮޑިޓީއަކަށް ހައްދަވަން މިނިސްޓަރު މަސައްކަތްކުރެއްވިއަސް އެޖީލު އެއަށްވުރެ މާބޮޑަށްވެސް ހޭލުންތެރިކަމެވެ.
ހަމަދު ނަހުލާއަށް އެޑްރެސްކޮށް ފޮނުވާފައިވާ ސިޓީގައި ވިދާޅުވެފައި ވެއެވެ.
ޓްރާންސްޕޯޓު މިނިސްޓްރީގެ އެތެރޭގައި ގާނޫނާއި ޚިލާފަށް، ކޮރަޕްޝަންގެ އުސޫލުން ހިގަމުންދާ ގިނަ ކަންކަމުގެ ޒިންމާ ޓްރާންސްޕޯޓު މިނިސްޓަރު ނަހުލާ ނަގަންވަންޖެހޭނެކަމަށް މޭރުކޮށް ހަމަދު ފޮނުއްވި ސިޓީގައި އޭނާ ވިދާޅުވެފައިވަނީ، ވޭތެވެދިޔަ 5 އަހަރު ދުވަހުގެ ތެރޭގައި 70 އިންސައްތައާ ގާތްކުރާ މިންވަރަށްވެސް ނަހުލާ އޮފީހަށް ވަޑައިގެންފައިނުވާތީ، ދަތި އުނދަގޫތަކާއެކުވެސް އޮފީހުގެ ހިންގުން ހުއްޓުމަކަށް ނުގެނެސް ކުރިއަށް ދެވުނީ އޭނާގެ ސަބަބުން ކަމެވެ. އަދި އޭނާ ތުހުމަތު ކޮށްފައިވަނީ ޑޮމެއިންގެ ވިޔަފާރި ކުރުމަށް ނަހުލާ "ނުކިއްސަރު މަގުން" އޮފީހަށް ވެދެވަޑައިގަންނަވާކަމުގައެވެ.
ހަމަދު ވިދާޅުވެފައިވަނީ މިނިސްޓްރީގެ ތެރޭގައި ހުރި ކޮރަޕްޝަނާއި ފަސާދައިގެ ވާހަކަ ދެއްކުމުން އެކަންކަން ބެލުމުގެ ބަދަލުގައި، އެކި ސިފަ ސިފައިގައި ބިރު ދެއްކުމަށްފަހު، އެވަރުންވެސް އޭނާ ފަހަތަށް ނުޖެހުމުން، ނުލިބޭ ބާރުގެ ބޭނުންކޮށްގެން އޭނާއާއި ދެކޮޅަށް ނަހަމަ ގޮތުގައި ނަހުލާ މަގާމުގެ ނުފޫޒު ބޭނުންކުރަމުންދާ ކަމުގައެވެ.
ޓްރާންސްޕޯޓު މިނިސްޓްރީއަކީ މިހާތަނަށްވެސް ކޮރަޕްޝަންގެ ބޮޑެތި ތުހުމަތުތަކެއް ކުރެވެމުން އައިސްފައިވާ މިނިސްޓްރީއެކެވެ. އެހެންނަމަވެސް މިމައްސަލަތަކާއި ގުޅޭގޮތުން މިހާތަނަށްވެސް އެކަށީގެންވާ ފިޔަވަޅުތަކެއް އެޅިފައެއް ނުވެއެވެ. އަދި ނަހުލާއާއި މައްސަލަޖެހ މީގެ ކުރިންވެސް އެމިނިސްޓްރީގެ މުވައްޒަފުން އެހެން މިނިސްޓްރީތަކަށް ބަދަލުކުރާންޖެހިފައިވާކަންވެސް ފާހަގަ ކޮށްލެވެއެވެ.
