ޓްރާންސްޕޯޓު މިނިސްޓަރު އައިޝަތު ނަހުލާ މިނިސްޓަރު ކަމުގައި ހުންނަވައިގެން، ގަވާއިދާ ޚިލާފަށް ޑޮމެއިން ވިއްކައިގެން ކަޅު ފައިސާ ރައްކާ ކުރަމުންދާކަމުގެ ތުހުމަތު ޓްރާންްޕޯޓު މިނިސްޓްރީގެ ނައިބު ޙަމަދު ޢަބްދުލްޣަނީ ކޮށްފިއެވެ.

ޓްރާންސްޕޯޓު މިނިސްޓްރީ ގަވާއިދުތަކާއި އަދި އުސޫލުތަކާއި ޚިލާފަށް ހިނގަމުންދާ ގިނަ ކަންތައްތަކެއް ބަޔާންކޮށް، އޭނާ ޓްރާންސްޕޯޓު މިނިސްޓަރ އައިޝަތު ނަހުލާއަށް އެޑްރެސްކޮށް ފޮނުވި ސިޓީ މިހާރުވަނީ އޭނާގެ އަމިއްލަ ޓުވިޓަރ ހޭންޑްލްއިން ޓުވީޓު ކޮށްފައެވެ.

ހަމަދު މަގާމުގެ މަސްއޫލިއްޔަތު އަދާކުރުމުގައި ގެންގުޅެންޖެހޭ ސުލޫކީ މިންގަނޑާ ޚިލާފުވެފައިވާ ކަމަށް ވިދާޅުވެ، ޓްރާންސްޕޯޓް މިނިސްޓްރީގެ މަސައްކަތްތަކުގެ ތެރެއިން އޭނާއާއި ހަވާލުކޮށްފައިވާ އެއްގަމާއި، ކަނޑާއި، ވައިގެ ދަތުރުފަތުރާގުޅޭ އެންމެހައި މަސައްކަތްތައް ސްޓޭޓް މިނިސްޓަރ އަޙްމަދު ޒުހައިރު އާ ހަވާލުކޮށްފައިވާކަމަށް ވިދާޅުވެ، 27 އޯގަސްޓް 2023ގައި މިނިސްޓަރު ނަހުލާ އޭނާއަށް ފޮނުވި މެމޯއަށް ރައްދުދީ ހަމަދު ނަހުލާއަށް އެޑްރެސްކޮށް މިއަދު ފޮނުވި ސިޓީގައި ވަނީ މިނިސްޓަރުކަމުގެ މަސްއޫލިއްޔަތުގެ ތެރޭގައި ހިމެނޭ ދައުލަތުގެ އެންމެހައި މުދަލާއި ފައިސާ ހެޔޮގޮތުގައި ފަރުވާތެރިކަމާއެކު ބެލެހެއްޓުމުގެ ބަދަލުގައި، އެކަންކަމުން ނަހުލާ ގަވާއިދާ ޚިލާފަށް މަންފާ ހޯއްދަވާ ކަމަށް ތުހުމަތު ކޮށްފައެވެ.

މިގޮތުން އޭނާގެ ސިޓީގައި ފާހަގަ ކޮށްފައިވާ އެންމެ މުހިންމު އެއް ކަމެއްގެ ގޮތުގައި ފާހަގަވާން އޮތީ ކަނޑައެޅިފައިވާ ގަވާއިދުގެ ބޭރުން ޑޮމެއިން ވިއްކައިގެން، ނަހުލާ ގާނޫނާއި ގަވާއިދާ ޚިލާފުވެފައިވާކަމަށް އޭނާ ކޮށްފައިވާ ތުހުމަތުތަކެވެ. މިގޮތުން، ގާނޫނާއި ޚިލާފަށް ޑޮމެއިން ވިއްކައިގެން ނަހުލާ ކަޅުފައިސާ ހޯދާފައިވާކަމަށް އޭނާ ތުހުމަތު ކޮށްފައިވާއިރު، އެފައިސާ ރައްކާ ކޮށްފައި ހުރި ތަންތަން ފުލުހުންނާއި އަދި ކަމާއި ގުޅުންހުރި އިދާރާތަކާއި ހިއްސާކުރަންވެސް ތައްޔާރަށް ހުރިކަމަށް އޭނާގެ ސިޓީގައި ވިދާޅުވެފައި ވެއެވެ.

ޑޮމެއިން ވިއްކުމުގައި ކަނޑައެޅިފައިވާ ގަވާއިދުގެ ބޭރުން ޑޮމެއިން ވިއްކައި ގާނޫނާއި ގަވާއިދާ ޚިލާފުވެފައިވާ ކަމެވެ. ޑޮމެއިން ވިއްކައިގެން ލިބުނު ކަޅު ފައިސާ ރައްކާކޮށްފައިވާ ތަންތަން ފުލުހުންނާއި، ކަމާބެހޭ އިދާރާތަކާ ޙިއްޞާކޮށް، މިކަމުގައި ޝާމިލުވާ ފަރާތްތަކުގެ ވަނަވަރު އިދާރާތަކާ ޙިއްޞާކުރަން އަޅުގަނޑު ފަސްނުޖެހޭނެ ހިނދު، އަމާނާތްތެރިކަމުގެ ސިފައާއި އިޚްލާޞްތެރިވުމަށް އޮންނަ އޮތުމާ މިނިސްޓަރު ޚިލާފުވެފައިވާ ކަމެވެ.

ހަމަދު ނަހުލާއަށް އެޑްރެސްކޮށް ފޮނުވާފައިވާ ސިޓީގައި ވިދާޅުވެފައި ވެއެވެ.

އޭނާގެ ސިޓީގައި އިތުރަށް ބަޔާން ކޮށްފައިވާ ގޮތުގައި، މިނިސްޓީން މީގެ ކުރިން ދީފައިވާ އެސްޓީއެސް (ޝިޕް ޓު ޝިޕް ޓްރާންސްފަރ) އެޕްރޫވަލްތަކާ ގުޅިގެން މިނިސްޓަރުގެ ސަމާލުކަމަށް، 22 އޮގަސްޓު 2023 ގައި އީމެއިލް މެދުވެރިކޮށް، އޭނާ ގެނެސްފައިވާ ކަންކަމާ ގުޅިގެން އެކަންކަން އިސްލާހްކުރުމަށްވެސް އަވަސް ފިޔަވަޅުތަކެއް މިނިސްޓަރ ނަހުލާ އަޅުއްވާފައި ނުވެއެވެ. ހަމަދުގެ ސިޓީގައި ތުހުމަތު ކޮށްފައިވަނީ މި އެޕްރޫވަލްތައްވެސް ގުޅިލާމެހިފައިވަނީ ނަހުލާ "އަމިއްލަ މަންފާއަށް" "ހޯއްދަވާ ކަޅުފައިސާތަކާ" ކަމުގައެވެ.

ޚަބަރު އޮންލައިންއަށް މައުލޫމާތު ލިބިފައިވާ ގޮތުގައި، ހަމަދުގެ ސިޓީގައި އިޝާރާތް ކޮށްފައިވަނީ 2022 ވަނަ އަހަރުގެ މާރޗްމަހުގެ 22 ވަނަ ދުވަހު ޓްރާންސްޕޯޓު މިނިސްޓްރީން ދޫކޮށްފައިވާ "އެޕްރޫވަލް ފޯރ ޝިޕް ޓު ޝިޕް އޮޕަރޭޝަން (އެސްޓީއެސް)" އަކަށެވެ. މި އެޕްރޫވަލްއާއި ގުޅޭގޮތުން އޭނާ މިމަހުގެ 22 ވަނަ ދުވަހު މިނިސްޓްރީގެ އިސްވެރިންނަށް ކޮޕީކޮށް، މިނިސްޓަރު ނަހުލާއަށް އެޑްރެސްކޮށް ފޮނުވި އީމެއިލްގައި ވިދާޅުވެފައިވަނީ މި ހުއްދަ ގުޅިފައިވަނީ ތެލުގެ ވަގު ވިޔަފާރިއާއި ކަމުގައެވެ. ހަމަދުގެ، އިސްވެ ދެންނެވުނު އީމެލްގައި އޭނާ ވިދާޅުވެފައިވަނީ 2022 ވަނަ އަހަރުގެ މާރޗްމަހުގެ 22 ވަނަ ދުވަހު ޓްރާންސްޕޯޓު މިނިސްޓްރީން ދޫކޮށްފައިވާ އެސްޓީއެސް އެޕްރޫވަލްއިން އިން ދޫކޮށްފައިވަނީ، ނެޗުރަލް ގޭސް ކޮންޑެންސޭޓްގެ ނަމުގައި، ރާއްޖެއަށް ހުއްދަ ނޫން ގޮތުގައި ކުރޫޑް އޮއިލް އެތެރެ ކުރުމުގެ ހުއްދައެއް ކަމުގައެވެ.

އަދި ރަޝިއާ ޔޫކުރެއިން ހަނގުރާމަ ހިނގަމުން ދަނިކޮށް، ރަޝިއާ ފްލެގް ބޯޓެއް ރާއްޖޭގައި ހަރަކާތްތެރިވުމުގެ ހުއްދަ ދޫކުރުމަކީ ރާއްޖެއަށާއި ރާއްޖޭގެ ޚާރިޖީ ސިޔާސަތަށް ނުރައްކާތެރި ކަމެއްކަމުގައި ދެކޭކަމަށް އޭނާ ވިދާޅުވެފައި ވެއެވެ. އަދި މިއީ ރާއްޖޭގެ ގައުމީ ސަލާމަތަށާއި، ތިމާވެއްޓަށްވެސް ކުރިމަތިވެދާނެ ނުރައްކަލެއްގެ ގޮތުގައި އޭނާ މި ހުއްދަ ސިފަ ކޮށްފައި ވެއެވެ.

ޓްރާންސްޕޯޓު މިނިސްޓްރީގެ އެތެރޭގައި ގާނޫނާއި ޚިލާފަށް، ކޮރަޕްޝަންގެ އުސޫލުން ހިގަމުންދާ ގިނަ ކަންކަމުގެ ޒިންމާ ޓްރާންސްޕޯޓު މިނިސްޓަރު ނަހުލާ ނަގަންވަންޖެހޭނެކަމަށް މޭރުކޮށް ހަމަދު ފޮނުއްވި ނަހުލާއަށް އެޑްރެސްކޮށް މިއަދު ފޮނުވި ސިޓީގައި އޭނާ ވިދާޅުވެފައިވަނީ، ވޭތެވެދިޔަ 5 އަހަރު ދުވަހުގެ ތެރޭގައި 70 އިންސައްތައާ ގާތްކުރާ މިންވަރަށްވެސް ނަހުލާ އޮފީހަށް ވަޑައިގެންފައިނުވާތީ، ދަތި އުނދަގޫތަކާއެކުވެސް އޮފީހުގެ ހިންގުން ހުއްޓުމަކަށް ނުގެނެސް ކުރިއަށް ދެވުނީ އޭނާގެ ސަބަބުން ކަމެވެ. އަދި އޭނާ ތުހުމަތު ކޮށްފައިވަނީ ޑޮމެއިންގެ ވިޔަފާރި ކުރުމަށް ނަހުލާ "ނުކިއްސަރު މަގުން" އޮފީހަށް ވެދެވަޑައިގަންނަވާކަމުގައެވެ.

ވޭތުވެދިޔަ 3 ހަފްތާގެ ތެރޭގައި އޮފީހަށް ވަޑައިނުގެންނެވި ނަމަވެސް، މިނިސްޓަރު ނިސްބަތްވާ ސިޔާސީ ޕާޓީގެ ބައްދަލުވުންތަކަށް ބަރާބަރަށް ވަޑައިގަންނަވާކަމާއި، ނުކިއްސަރު މަގުން ޑޮމެއިން ވިއްކެވުމުގެ ކަންކަމުގައި މިނިސްޓްރީއަށް ވަދެވަޑައިގަންނަވާކަން އަޅުގަނޑުވެސް ދެނަހުރިކަމެވެ. ތިޔަ ހިންގަވާ ކޮރަޕްޝަނުގެ ޢަމަލުތަކުން ހިތްވަރުދެވެނީ ގައުމުގެ ޒުވާން ޖީލު ހަލާކުކޮށް، އެޖީލު ނެތިކޮށްލައި، މުޖުތަމަޢު ހަލަބޮލިކޮށްލަންކަމުގައިވާއިރު، މިއަދުގެ ޒުވާން ޖީލަކީ ޑޮމެއިން ބަހައިގެން ކޮންޓްރޯލްކުރެވޭ ކޮމޮޑިޓީއަކަށް ހައްދަވަން މިނިސްޓަރު މަސައްކަތްކުރެއްވިއަސް އެޖީލު އެއަށްވުރެ މާބޮޑަށްވެސް ހޭލުންތެރިކަމެވެ.

ހަމަދުގެ ސިޓީގައި ވިދާޅުވެފައި ވެއެވެ.

ހަމަދު ވިދާޅުވެފައިވަނީ މިނިސްޓްރީގެ ތެރޭގައި ހުރި ކޮރަޕްޝަނާއި ފަސާދައިގެ ވާހަކަ ދެއްކުމުން އެކަންކަން ބެލުމުގެ ބަދަލުގައި، އެކި ސިފަ ސިފައިގައި ބިރު ދެއްކުމަށްފަހު، އެވަރުންވެސް އޭނާ ފަހަތަށް ނުޖެހުމުން، ނުލިބޭ ބާރުގެ ބޭނުންކޮށްގެން އޭނާއާއި ދެކޮޅަށް ނަހަމަ ގޮތުގައި ނަހުލާ މަގާމުގެ ނުފޫޒު ބޭނުންކުރަމުންދާ ކަމުގައެވެ.

ޓްރާންސްޕޯޓު މިނިސްޓްރީއަކީ މިހާތަނަށްވެސް ކޮރަޕްޝަންގެ ބޮޑެތި ތުހުމަތުތަކެއް ކުރެވެމުން އައިސްފައިވާ މިނިސްޓްރީއެކެވެ. އެހެންނަމަވެސް މިމައްސަލަތަކާއި ގުޅޭގޮތުން މިހާތަނަށްވެސް އެކަށީގެންވާ ފިޔަވަޅުތަކެއް އެޅިފައެއް ނުވެއެވެ. އަދި ނަހުލާއާއި މައްސަލަޖެހ މީގެ ކުރިންވެސް އެމިނިސްޓްރީގެ މުވައްޒަފުން އެހެން މިނިސްޓްރީތަކަށް ބަދަލުކުރާންޖެހިފައިވާކަންވެސް ފާހަގަ ކޮށްލެވެއެވެ.