ކާޑުން ނެގޭ ޑޮލަރު ލިމިޓް އުވާލުމާއި 55 އަހަރާއި 65 އަހަރު ދެމެދު އަމިއްލަ އަށް ރިޓަޔާކުރާ މީހުންނަށް ހާއްސަ އެލެވެންސްއެއް ތައާރަފްކުރައްވާނެކަމަށް ޕީޕީއެމްގެ ރިޔާސީ ކެންޑިޑޭޓް ޑރ. މުހައްމަދު މުއިއްޒު ވައުުދު ވެވަޑައިގެންފިއެވެ.
ގދ. ތިނަދޫގައި މިރޭ ބޭއްވި ކެމްޕޭން ޖަލްސާގައި މުއިއްޒު ޑޮލަރު ނެގޭ ލިމިޓެއް ބޭންކްތަކުން ކަނޑައަޅާފައި އޮތުމަކީ ރައްޔިތުންގެ ފަރާތުން ވަރަށް ގިނައިން ޝަކުވާ ލިބޭ މައްސަލައެއް ކަމަށެވެ. އެ މައްސަލައަށް ހައްލެއް ހޯދައިދެވޭނީ ރައްޔިތުން އޭނާ އިންތިހާބު ކޮށްދެއްވައިފިނަމަ ކަމަށާއި އޭނާގެ ވެރިކަމެއްގައި ޑޮލަރު ލިމިޓް އުވާލާނެ ކަމަށެވެ. އަދި ރާއްޖޭގެ އިގްތިސާދުގައި ޑޮލަރު ދައުރުވާ އަދަދު އިތުރުކުރާނެ ކަމުގައިވެސް ވިދާޅުވިއެވެ.
އެކަން ކުރެވޭނީ މަރުހަލާތަކަކަށް ބަހާލައިގެން. ފުރަތަމަ ތިން މަހު ލިމިޓް ޑަބަލްކުރުމަށްފަހު ދެން އެއްކޮށް ލިމިޓް އުވާލާނަން. މުއިއްޒު ވިދާޅުވިއެވެ.
ރާއްޖޭގައި ޑޮލަރުގެ ރޭޓު ދަށްކޮށް، ފޮރިން އެކްސްޗޭންޖު ހަރުދަނާ ކޮށްދެއްވާނެ ކަމުގައިވެސް މުއިއްޒު ވިދާޅުވިއެވެ. އޭނާ ވިދާޅުވި ގޮތުގައި އެކަން ކުރާނީ ރާއްޖޭގައި ޑޮލަރު ދައުރުވާ މިންވަރު އިތުރުކޮށްގެންނެވެ.
ރިޓަޔަމަންޓް އެލަވަންސްއެއް ތަޢާރަފް ކުރުން:
މުއިއްޒު ވިދާޅުވީ ވަޒީފާއާ ގުޅޭ ގާނޫނާއި އުސޫލުތައް ހުރި ގޮތުން އުމުރުން 55 އަހަރުވުމުން ވަޒީފާއިން ރިޓަޔާ ކުރަންޖެހޭ ކަމަށެވެ. އެކަމަކު އެ މީހުން ރިޓަޔާ ވެގެން 65 އަހަރު ނުވަނީސް ލިބޭ އެލަވަންސެއް ނޯންނާތީ އެއީ ގިނަ ބައެއްގެ ކަންބޮޑުވުމެއް ކަމުގައި ވިދާޅުވި އެވެ. އެއީ އިންސާފުވެރި ގޮތެއް ނޫން ކަމަށް ފާހަގަކުރައްވަމުން މުއިއްޒު ވިދާޅުވީ އެ މައްސަލަ ހައްލުކުރުމަށް އޭނާގެ ވެރިކަމެއް އުމުރުން 55 އަހަރުވުމުން ރިޓަޔާ ކުރާ މީހުންނަށް އެލަވަންސެއް ތައާރަފްކުރާނެ ކަމަށެވެ.
މުއިއްޒު ވަނީ ރިޔާސީ އިންތިހާބަށް ބަކީ 13 ދުވަހަށް ވެފައިވާތީ ވަޒީފާ ގެއްލިދާނެ ކަމުގެ ބިރު އެއްފަރާތްކޮށް ކެމްޕޭނަށް ނިކުތުމަށް އެދިވަޑައިގެންފަ އެވެ. ކެމްޕޭންގައި ބައިވެރިވެގެން ވަޒީފާ ގެއްލުވާލައިފިނަމަ އެއަށް ވުރެ ރަނގަޅު ވަޒީފާ ހޯދައިދޭނެ ކަމަށްވެސް ވިދާޅުވެފަ އެެވެ.
ކުރިއަށް އޮތް 13 ދުވަހަކީ ތިބޭފުޅުން ބާރު ސްޕީޑުގައި މަގުމަތީގައި ކެމްޕޭނުގައި އުޅޭ ދުވަސްތަކެއްގެ ގޮތުގައި ހަމަޖައްސާދޭންވީ. ވަޒީފާއިން ކަނޑާލާނެ ކަމަށް ބިރުގަންނާނެ ކަމެއްނެތް. އަޅުގަނޑުމެން އަނބުރާ ވަޒީފާ ދޭނަން،. އަޅުގަނޑުމެން ވެރިކަމަށް މި އަންނަނީ، އައިސް ތިބޭފުޅުންގެ ތި ވަޒީފާތައް ޔަގީންކަމާ އެކީ ދަމަހައްޓާ ދޭނަން އަދި މިއަށްވުރެވެސް ރަނގަޅު ކޮށްދޭނަން. މުއިއްޒު ވިދާޅުވިއެވެ.
މުއިއްޒު ވިދާޅުވީ އޭނާގެ ވެރިކަމެއްގައި މިހާރު އޮތް ގޮތާ ހިލާފަށް "ޕޭޕާލެސް" ސަރުކާރެއް ހިންގާނެ ކަމަށެވެ. އަދި އެ ސަރުކާރުގައި ކޮންމެ ތާކު ތިބިގެންވެސް ބާރު ދުވެލީގައި ހިންގޭ ސަރުކާރަކަށް، ސަރުކާރު ބަދަލުކުރާނެ ކަމަށެވެ.
ޝަރުއީ ދާއިރާއަށް މުހިންމު ވައުދުތަކެއް:
މުއިއްޒު ވިދާޅުވީ ޖުޑީޝަލް ސާވިސް ކޮމިޝަން (ޖޭއެސްސީ)އިން ސިޔާސީ މީހުން މަދުކޮށް ޝަރުއީ ދާއިރާގެ މީހުން ގިނަކުރާނެ ކަމަށެވެ. އަދި، ކޯޓުތަކުގެ އިދާރީ ކަންކަމުގެ ބާރުވެރިކަން އެ ކޮމިޝަނުން ނަގައި ހާއްސަ ޑިޕާޓްމެންޓާ ހަވާލުކުރުމެވެ.
މީގެއިތުރުން ފަނޑިޔާރުންނަށް ހާއްސަކޮށް ބޯހިޔާވަހިކަމުގެ މަޝްރޫއެއް ހިންގަން ވެސް މުއިއްޒު ވައުދުވެވަޑައިގަތެވެ. އޭނާ ވިދާޅުވި ގޮތުގައި ފަނޑިޔާރުންނަކީ އެ މީހުންނަށް ލިބޭ އާމްދަނީއާ އެކު ރަނގަޅު ދިރިއުޅުމެއް ދިރިއުޅެވޭ ފަދަ ބަޔަކަށް ހަދައިދޭން ޖެހެއެވެ. މިހާރު ފަނޑިޔާރުންގެ މުސާރައިގެ ބޮޑު ބައެއް ހަރަދުކުރަން ޖެހެނީ ކުއްޔަށް ކަމަށް ފާހަގަކުރެއްވިއެވެ. އަގުހެޔޮ ބޯހިޔާވަހިކަމުގެ މަޝްރޫއުއާ އެކު އެކަން ބަދަލުވާނެ ކަމަށް އޭނާ ވިދާޅުވިއެވެ.
