ހުވަދު އަތޮޅު ދެކުނުބުރީ ތިނަދޫގެ ސިޔާސީ މަސައްކަތުގައި ހަރަކާތްތެރިވާ އެމްޑީޕީގެ އެންމެ ވަރުގަދަ ދެ ޒުވާނުން އެމްޑީޕީ ދޫކޮށް ޕީޕީއެމްއާއި ގުޅިއްޖެއެވެ.
މިރޭ ތިނަދޫގައި ބޭއްވި ޖަލްސާގައި މިދެޒުވާނުން އެމްޑީޕީއާއި ގުޅި ފޯމު ހަވާލު ކުރެއްވީ ޕީއެންސީގެ ރިޔާސީ ކެންޑިޑޭޓް ޑރ.މުއިއްޒުއާއި، ޕްރޮގްރެސިވް ކޮންގްރެސް ކޯލިޝަން ހިންގެވުމާއި ހަވާލުވެ ހުންނެވި ޕީއެންސީގެ ރައީސް އަބްދުއްރަހީމް އާއިއެވެ. މިރޭ ސޮއިކުރި ދެ ޒުވާނުންނަކީ ކުރީގެ ތިނަދޫ ކައުންސިލް ރައީސް ޢަލީ އަމްޖަދާއި، ކުރީގެ ތިނަދޫ ކައުންސިލް ނައިބް ރައީސް އިބްރާހިމް ރިޔާޒުއެވެ. މިދެބޭފުޅުންކީވެސް އެމްޑީޕީގައި މިވީ ދިގު މާޒީގައި ހަރަކާތްތެރިވި ދެ ޒުވާނުންނެވެ.
ޕީޕީއެމްއަށް ސޮއިކޮށް ޑރ.މުއިއްޒުއަށް ތާއީދުކުރީ މިސަރުކާރުން ޚާއްސަކޮށް އެމްޑީޕީން ވައުދުވި އެއްވެސް ކަމެއް ތިނަދޫއަށް ނުވެ ތިނަދޫ ރައްޔިތުންނަށް އެމްޑީޕީން ބޭވަފާވެފައި ވާތީކަމަށް މިދެޒުވާނުން ވަނީ ބުނެފައެވެ. އަދި މިވީ ދިގު މާޒީގައި އެމްޑީޕީން ތިނަދޫއަށް ކޮށްދިން ހާވެސް ކަމަކީ އޮޅުވާލުމާއި މަކަރުވެރިކަމުގެ ތެރޭން ކަންކަން ކުރުމަށް ވަނީ ބުނެފައެވެ.
މިދެބޭފުޅުން ބުނީ ކުރިއަށް އޮތް ރިޔާސީ އިންތިޚާބުގައި ތިނަދޫން ޑރ.މުއިއްޒުއަށް ސާފު މެޖޯރިޓީ ނަގާނެކަމަށެވެ. އަދި މިހާރު ތިނަދޫގެ ރައްޔިތުން ތިބި ރޫހަށް ބަލާއިރު ތިނަދޫއިން 70 އިންސައްތަ ޑރ.މުއިއްޒަށް ލިބުމަކީ ފަސޭހަ ކަމެއްކަމަށް މިދެ ޒުވާނުން ވަނީ ބުނެފައެވެ.
