ކުރިއަށް އޮތް ރިޔާސީ އިންތިޚާބު ޑރ.މުއިއްޒު ކާމިޔާބުކޮށް ތިނަދޫގައި ރައީސް ޔާމީން ޤާއިމް ކުރައްވާފައިވާ އިސްލާމީ މަރުކަޒަކީ މުޅި ހުވަދު އަތޮޅަށް އިސްލާމީ ތައުލީމު ފަތުރާ އިސްލާމިކް ޔުނިވާސިޓީއަކަށް ވެގެންދާނެ ކަމަށް ކުރީގެ އިސްލާމިކް މިނިސްޓަރ ޑރ.މުހައްމަދު ޝަހީމް ޢަލީ ސައީދު ވިދާޅުވެއްޖެއެވެ.
ތިނަދޫގައި މިރޭ ބޭއްވި ޑރ.މުއިއްޒުގެ ކެމްޕޭން ޖަލްސާގައި ވާހަކަ ދައްކަވަމުން ނިމިދިޔަ ރިޔާސީ އިންތިޚާބުގައި ރައީސް ޔާމީންގެ ރަނިންމޭޓަށް ހުންނެވި ޑރ.ޝަހީމް ވިދާޅުވީ ތިނަދޫއަށް މިއަދު ދިއުމުން ރައީސް ޔާމީން ގާއިމްކުރި އިސްލާމީ މަރުކަޒު، ޕީޕީއެމްގެ ވެރިކަން އަލުން އިޔާދަވުމަށް އެދެމުންދާކަމުގެ އިހުސާސް ކުރެވުނުކަމަށެވެ.
ރައީސް ޔާމީންގެ ޒަޢާމަތުގައި ތިނަދޫގައި އިސްލާމީ މަރުކަޒު ގާއިމްކުރީ ހުވަދު އަތޮޅުގެ އިސްލާމީ މައި މަރުކަޒަކަށް އެތަން ހަދައި އިސްލާމީ ޔުނިވާސިޓީގެ މައިމަރުކަޒަށް އެތަން ހެދުމުގެ މަތިވެރި މަގުސަދުގައި ކަމަށެވެ. ނަމަވެސް މިސަރުކާރުން ވެރިކަމާއި ހަވާލުވެ މިވީ ފަސް އަހަރުގައި އެތަނުގައި ކުލަކޮޅެެއްވެސް ނުލާ ވާނެ ގޮތެއްވާން ދޫކޮށްލާފައިވާކަމަށެވެ. މިއީ މިފަދަ މަތިވެރި ބިނާއަކަށް ވަމުންދާ ބޮޑު އިހުމާލެއްކަމަށް ޝަހީމް ވިދާޅުވިއެވެ.
ފަސް އަހަރު ވެގެން ދިޔައީ. އިސްލާމީ މަރުކަޒުގެ މަގުސަދު ހާސިލްނުވެ ދަނީ ވީރާނާ ވަމުން. މިއީ އަޅުގަނޑުމެންގެ ހިތަށް ވަރަށް ގިނަ އިހުސާސްތަކެއް ކުރުވާ ކަމެއް. އަޅުގަނޑަށް ފުރިހަމަ އިތުބާރު އެބައޮތް ޑރ.މުއިއްޒުގެ ވެރިކަމެއްގައި ތިނަދޫ އިސްލާމީ މަރުކަޒަކީ އިސްލާމިކް ޔުނިވާސިޓީގެ ގޮތުގައި ކަނޑައެޅިގެންދާނެކަމަށް.
– ޑރ. ޝަހީމް ވިދާޅުވިއެވެ.
ޝަހީމް ވިދާޅުވީ މިއިމާރާތަކީ އެތައް މިލިޔަން ރުފިޔާ ޚަރަދުކޮށްގެން ހަދާފައިވާ އިމާރާތަކަށްވާއިރު އެތަނުގެ ބޭނުމެއް ނުކުރެވޭ ކަމީ ހިތާމަހުރި ކަމެއްކަމަށެވެ. މިނޫނަސް ތިނަދޫގެ ތަރައްޤީއަށް ރައީސް ޔާމީން ކޮށްދެއްވި ޚިދުމަތްތަކީ ކޮންމެ ދިމާލަކުންވެސް ފެންނަންހުރި ޚިދުމަތްތަކެއް ޝަހީމް ވިދާޅުވިއެވެ. ތިނަދޫއަށް އެކަނި ރައީސް ޔާމީންގެ ވެރިކަމުގައި އެއް ބިލިޔަން ރުފިޔާ ހޭދަ ކުރައްވައި ތަރައްޤީގެ އާ ޒަމާނެއް ގެނެސް ދެއްވިކަމަށް ޝަހީމް ވިދާޅުވިއެވެ.
ޝަހީމް ވިދާޅުވީ ހުވަދު އަތޮޅުން ފެނިގެންދަނީ ރައީސް ޔާމީންގެ ތަރައްޤީ އަލުން އިޔާދަވުމަށް އެދޭ މަންޒަރުކަމަށެވެ. މިއިންތިޚާބު އެއްބުރުން ކާމިޔާބުކޮށް ޑރ.މުއިއްޒު އެކަން ހާސިލް ކޮށްދެެއްވާނެ ކަމުގެ ޔަގީންކަން އޮތްކަމަށް ޑރ.ޝަހީމް ވިދާޅުވިއެވެ.
