މަޑަވެލި ރައްޔިތުން ބޭނުންވާ ތަރައްޤީ ޙާސިލްކޮށްދެއްވުމުގައި ނަތީޖާ ނެރެދެއްވާނެ ކަމުގެ ފުރިހަމަ ޔަގީންކަން ޕީއެންސީގެ ރިޔާސީ ކެންޑިޑޭޓް ޑރ.މުހައްމަދު މުއިއްޒު ދެއްވައިފިއެވެ.
މަޑަވެލީގައި ބޭއްވި ފޯރިގަދަ ޖަލްސާގައި މުއިއްޒުވަނީ މަޑަވެލީގެ ރައްޔިތުންނާއި މަޑަވެލީގެ ހާލަތު އޮތްގޮތް ވަރަށް ރަނގަޅަށް ފެނިފައިވާކަމަށެވެ. ރައްޔިތުން ތިބީ ވަރަށްވެސް ދަތި ހާލުގައި އަދި ތަރައްގީގައި އުންމީދުވެސް ނުކުރާހާ ދަށް ހާލަތެއްގައިކަމަށް މުއިއްޒު ވިދާޅުވިއެވެ.
މުއިއްޒު ވިދާޅުވީ މަޑަވެލީގެ ރައްޔިތުން އެދޭފަދަ ތަރައްޤީ ގެނެސްދެއްވާނެކަމަށެވެ. މަޑަވެއްޔަށް ދިމާވެފައިވާ ޖާގައިގެ ދަތިކަމަށް ހައްލުކޮށް ބިން ހިއްކައި ދިނުމަކީ ކޮސްދެއްވާނެ ކަމެއްކަމަށް މުއިއްޒު ވިދާޅުވިއެވެ. މިހާރުވެސް މަޑަވެލިން 30 ހެކްޓަރަށްވުރެ ބޮޑު ސަރަހައްދެއް ހިކެން އޮތްކަން ފާހަގަކޮށް މުއިއްޒުވަނީ ބިންހިއްކުމާއި ބަނދަރުގެ މަސައްކަތް އެކުއެކީގައި ކުރިއަށް ގެންދާނެކަމަށް މައުދުވެ ވަޑައިގެންފައެވެ.
ތިބޭފުޅުން އަޅުގަނޑަށް އިތުބާރުކޮށް ފުރުދަތު ދެއްވައިނަމަ، ނަތީޖާ ނެރެދޭނަން. ތަރައްޤީ ތިބޭފުޅުން އެދޭ ގޮތަށް ހާސިލް ކޮށްދޭނަން.
– މުއިއްޒު ވިދާޅުވިއެވެ.
މަޑަވެއްޔަށް މުއިއްޒު ވެވަޑައިގެންނެވި ވަޢުދުތައް:
– ޒަމާނީ ބޮޑު ބަނދަރެއް ހެދުމާއިއެކު، ބިންހިއްކުމުގެ މަޝްރޫޢު ކުރިއަށް ގެންދާނަން
– ސްކޫލު އިތުރަށް ތަރައްޤީ ކުރުން
– ސިއްޚީ ނިޒާމު ހަރުދަނާ ކުރުން
– ބޯހިޔާވަހިކަން ކަށަވަރު ކޮށްދޭނަން
މުއިއްޒު ވިދާޅުވީ މަޑަވެލިން ފެނިގެންދާ ފޯރިއާއި ޖޯޝަކީ ރިޔާސީ އިންތިޚާބުގައި ކޮންމެ ރަށަކުންވެސް މިވަގުތު ޕީޕީއެމްގެ މެމްބަރުންގެ ފަރާތުން ފެންނަ ޖޯޝު ކަމަށެވެ. މިޖޯޝުގައި ކުރިއަށް އޮތް ރިޔާސީ އިންތިޚާބު އެއްބުރުން ކާމިޔާބު ކުރުމަށް ކުރިއަށްވުރެ ބޮޑަށް މަސައްކަތްކޮދެއްވުމަށް މުއިއްޒުވަނީ އެދި ވަޑައިގެންފައެވެ.
