އެމްޑީޕީއަށް ގިނަ ދުވަހު ޚިދުމަތް ކުރެއްވި ވިލިފުށީ ދާއިރާގެ މެމްބަރު ހަސަން އަފީފަށް އަބަދުވެސް، އެޕާޓީގެ ކުރީ ބަރުން ޖާގަ އޮންނާނެކަމަށް ވިދާޅުވެ އަފީފް އެނބުރި އެމްޑީޕީއާއި ގުޅިވަޑައިގެންނެވުމަށް ރައީސް ޞާލިހު ދަޢުވަތު ދެއްވައިފިއެވެ.

ރިޔާސީ ކެމްޕޭންގައި ވިލިފުށީގައި ބޭއްވި ކަންމަތީ ބައްދަލުވުމުގައި ރައީސް ޞާލިހު ވިދާޅުވީ އެރަށަށް ވަޑައިގެންނެވުމުން އެފީފް ނެތްކަން ވަރަށް ބޮޑަށް އިހުސާސް ކުރެވޭ ކަމަށެވެ. އަފީފަކީ އެމްޑީޕީއަށް ނުހަނު ގިނަ ޚިދުމަތްތަކެއް ކުރައްވާފައިވާ ބޭފުޅަކަށްވާއިރު އެމްޑީޕީއާއި ދުރަށްދާންޖެހޭ އެއްވެސް ސަބަބެއް ނެތްކަމަށް ރައީސް ވިދާޅުވިއެވެ. ރައީސް ވިދާޅުވީ އަފީފަކީ އަބަދުވެސް އެމްޑީޕީގެ ކުރީ ބަރިން ޖާގަ ލިބޭނެ ބޭފުޅެއް ކަމަށެވެ.

އަޅުގަނޑު ދަންނަވަނީ އަފީފަށް ވިސްނަ ވަޑައިގެން އަލުން އަބުރާ އަޅުގަނޑުމެންނާއި ގުޅިވަޑައިގެން މިމަސައްކަތާއިގެން ނިކުމެ ވަޑައި ގަންނަވާށޭ. އަބަދުވެސް އެމްޑޕީގަ އެބޭފުޅުންނަށް ޖާގަ އޮންނާނެ. ކުރީ ގޮޑި ބަރިން ޖާގަ އޮންނާނެ. އެއީ ޚިދުމަތް ކުރެއްވި ބޭފުޅުން. އަދި އެހެން ޕާޓީ ތެރޭގައި އެހެން ޖެހޭ ކުޑަކުޑަ ޚިޔާލް ތަފާތުވުމެއްގައި ދޫކޮށްލައިގެން ދާ ވަރުގެ ބޭފުޅުންނެއް ނޫން އެއީކީ. އަޅުގަނޑު ދަންނަވާނީ ވަޑައިގަންނަވާށޭ. އަޅުގަނޑުމެންނާއި އެކީގައޭ މުސްތަގުބަލު އޮތީ. ރައީސް ޞާލިހު ވިދާޅުވިއެވެ.

ރައީސް ވިދާޅުވީ ކުރިއަށް ދައުރުގައިވެސް ވިލިފުށީ ރައްޔިތުން ބޭނުންވާ ތަރައްޤީގެ ކަންކަން ކޮށްދެއްވާނީ މިސަރުކާރުން ކަމަށެވެ. އެގޮތުން ރައީސް ވަނީ ކޮސްދެއްވާނެ ބައެއް ކަންކަން ހިއްސާ ކުރައްވާފައެވެ.

ވިލިފުއްޓަށް ރައީސް ވެ ވަޑައިގެންނެވި ވައުދުތައް:

– ބިމުގެ ދަތިކަން ހައްލު ކުރުމަށް ބިން ހިއްކާނަން
– ބަނދަރު މަސައްކަތް ހައްލު ކޮށްދޭނަން
– މަގުތައް ޒަމާނީ ފެންވަރަށް ތަރައްޤީކޮށް ނިންމުން
– ވިލިފުށީ ރައްޔިތުނަށް ކައިރިން ފަޅު ރަށެއް ހަމަޖެއްސުން
– ހައުސިން ޔުނިޓްތައް އަޅާދީ ބޯހިޔާވަހިކަން ހަމަޖައްސާނަން

“ އުފާވެރި އަމާން ރާއްޖެ ” ތ.ވިލިފުށި ކެމްޕެއިން ރަށު ޖަލްސާގައި ރައީސް އިބޫ ވާހަކަފުޅުދެއްކެވުން.#IbuAslam2023#UfaaveriAmaanRaajje pic.twitter.com/9YJbZi38qe

— Hussain Shafiu #Ibu2023 (@charly_thuthu) August 27, 2023

ރައީސް ވަނީ މިޖަލްސާގައި ޕީއެންސީގެ ކެންޑިޑޭޓް ޑރ.މުއިއްޒުއަށްވެސް ފާޑު ވިދާޅުވެފައެވެ. ރައީސް ވިދާޅުވީ ޑރ.މުއިއްޒުއަށް ޓިކެޓް ލިބިވަޑައިގެންނެވީވެސް އޮޅުވާލައިގެން ކަމަށެވެ. އަދި ވެރިކަމަށް ވަޑައިގަންނަވައިގެންވެސް ކަންކަން ކުރައްވާނީ އެމަގުންކަމަށް ރައީސް ވިދާޅުވިއެވެ.