ރާއްޖޭގެ މިނިވަންކަމާއި ސިޔާތާއި އިސްތިގުލާލު މިއަދު އޮތް ހާލަތަށް ބަލާއިރު ކުރިއަށް އޮތް ރިޔާސީ އިންތިޚާބުގެ ވޯޓަކީ މިނިވަންކަން ދިފާޢުކުރުމަށް ލިބޭ ފަހު ފުރުސަތަށް ވުމަކީ އެކަށީގެންވާ ކަމެއްކަމަށް ރައްޔިތުންގެ މަޖިލީހުގެ ކުރީގެ ނައިބް ރައީސް މަސީޚު ވިދާޅުވެއްޖެއެވެ.
ރިޔާސީ ކެމްޕޭންގައި ރޭ ފުވައްމުލަކުގައި ބޭއްވި ފޯރިގަދަ ޖަލްސާގައި މަސީޚު ވަނީ ސިޔާސީ ކަންކަމާއި ގިނަ ދުވަސްތަކެއް ވަންދެއް ދުރުގާ އުޅުއްވުމަށްފަހު ބައިވެރިވެ ވަޑައިގެން ވާހަކަފުޅު ދައްކަވާފައެވެ. މަސީޚު ވިދާޅުވީ ރިޔާސީ އިންތިޚާބާއި ދިވެހި ރައްޔިތުން ކުރިމަތިލާއިރު ރާއްޖޭގެ މިނިވަންކަމާއިމެދު ސުވާލު ނޫފައްދާ ބޭފުޅަކު ނެތްކަމަށެވެ. އެއީ ކޮންމެ ޕާޓީއެއްގެ ކޮންމެ ފިކުރެއްގެ ބޭފުޅަކަށް ވީނަމަވެސް ހިތާ ހިތާ އެސުވާލު އޮތީ ބޮޑު ސުވާލަކަށް ވެފައި ކަމަށެވެ.
މީގެ ކުރިން ސިޔާސީ އެކި ކަންކަމުގައި ވޯޓުތަކާއި އަދި އެނޫން ހާލަތްތަކުގައި މިނިވަންކަމުގެ ވާހަކަ ދެއްކެވި ނަމަވެސް މިއީ އެއަށްވުރެ މާސީރިއަސް ހާލަތެއްކަމަށް މަސީހު ވިދާޅުވިއެވެ. މަސީހު ވަނީ ފުވައްމުލަކުގެ ރައްޔިތުން، ފުވައްމުލަކުގެ 10 އަވަށުންވެސް މިނިވަންކަމުގެ ދިފާއުގައި ޑރ. މުއިއްޒުއަށް ވޯޓު ދެއްވުމަށް އިލްތިމާސް ކުރައްވާފައެވެ.
ވޯޓަކީ ސިއްރު ވޯޓެއް ކަމުގައި ވީނަމަވެސް މިހާލަތުގައި ފާޅުގައި މުއިއްޒުއަށް މަސައްކަތްކޮށް ރާއްޖޭގެ މިނިވަންކަން ދިފާއުކޮށް އަޅުވެތިކަމަށް ނޫނެކޭ ބުނަންޖެހޭ ކަމަށް މަސީހު ވިދާޅުވިއެވެ. އޭނާ ވިދާޅުވީ މިއީ މިމަސައްކަތް ކުރަން ލިބޭ ފަހު ފުރުސަތަށް ވުމަކީވެސް އެކަށީގެން ވާކަމެއްކަމަށެވެ.
މަސީހު ވިދާޅުވީ ފުވައްމުލަކީ ޤައުމުގެ ނައިބް ރައީސުން އުފައްދފާ ކާރުޚާނާއަކަށް ހަމައެކަނި ވެގެން ނުވާނެކަމަށެވެ. ފުވައްމުލަކަކީ ތައުލީމީ ޤާބިލް ހުނަރުހުރި އެތައް ބޭފުޅުން ތިއްބެވި ސިޓީއަކަށް ވާއިރު، ފުވައްމުލަކުގެ ރައްޔިތުން ޤައުމު އިސްކުރާނެ ކަމީ ޝައްކު ކުރައްވާ ކަމެއް ނޫންކަމަށެވެ.
