އާމްދަނީ ހޯދުމަށް ބުރަ މަސައްކަތެއް ކުރަމުންދާ ޓެކްސީ ޑްރައިވަރުންގެ ކަންބޮޑުވުންތައް އަޑުހައި ހުރި ހުރިހާ މައްސަލަތަކަށް ހައްލު ހޯދާ ދެއްވާނެ ކަމުގެ ޔަގީންކަން ޕީއެންސީގެ ރިޔާސީ ކެންޑިޑޭޓް ޑރ.މުހައްމަދު މުއިއްޒު ދެއްވައިފިއެވެ.
ޓެކްސީ ޑްރައިވަރުންގެ ހުރި ކަންބޮޑުވުންތައް ހިއްސާކުރުމަށް މީރުމާ ކޮންފަރެންސް ހޯލުގައި ބޭއްވި ބައްދަލުވުމުގައި ޑްރައިވަރުން ވަނީ ބޯހިޔާ ވަހިކަމާއި، ލޯނު ނެގޭގެ ގޮތްތަކާއި، ޕާކިން ސްޓިކާއާއި، މަގުތަކުގެ ހާލަތާއި އެނޫންވެސް ގިނަކަންކަމާއި ގުޅޭގޮތުން ހުރި ކަންބޮޑުވުންތައް ޑރ. މުއިއްޒުއަށް ހުށަހަޅާފައެވެ.
މިކަންކަމުގެ ހައްލުތައް ހޯދައި ދެއްވާނެގޮތް މުއިއްޒު ހިއްސާ ކުރެއްވީ ވަރަށް ތަފްސީލާއިއެކުގައެވެ. މުއިއްޒު ވަނީ މާލެ ސިޓީގެ މޭޔަރުކަމާއި ހަވާލުވެ ޓެކްސީ ޑްރައިވަރުންގެ ހުރި ކަންބޮޑުވުންތަކަށް ހައްލު ހޯދުމަށާއި، މާލޭގެ ވަހިކަލް ކަންތައްތަކަށް ހައްލު ހޯދުމަށް ކުރެއްވި މަސައްކަތް ޑެކްސީ ޑްރައިވަރުންނާއި ހިއްސާ ކުރައްވާފައެވެ.
ޕާކިން އިމާރާތްތައް އެޅުމުގެ މަސައްކަތް ސަރުކާރުން ހުއްޓުވީ:
މުއިއްޒު ވިދާޅުވީ މާލެ ސިޓީ ކައުންސިލާއި ހަވާލުވެ މާލޭގެ ލޭންޑް ޔޫސް ޕްލޭން ހެދިއިރު، ވަރަށް ގިނަ ސަރަހައްދުތަކުގައި ޕާކިން ސަރަހައްދުތައް ކަނޑައެޅި، ޕާކިން އިމާރާތްތައް ހެދުމަށް ސަރުކާރުގައި އެދުނު ނަމަވެސް ސަރުކާރުން އެހުއްދަ ނުދިން ކަމަށެވެ. މިއިމާރާތްތައް އަޅަން ބޭނުންވި ސަބަބީ ކާރު، ޕިކަޕް، އަދި ސައިކަލުތަކަށްވެސް ފަސޭހައިން ޕާކްކޮށްލެވޭނެ ގޮތެއް ހަމަ ޖެއްސުމަށް ކަމަށެވެ. މީގެ 6 ބިލްޑިން އަޅަން ހުރިހާ ކަމެއް ނިންމައި ކުރަންޖެހޭ ހުރިހާ ކަމެއް ކުރުމަށްފަހު ސަރުކާރަށް ހުށަހެޅުމުންވެސް ހުއްދަ ނުދިންކަމަށް މުއިއްޒު ވިދާޅުވިއެވެ.
ޕާކިން މައްސަލަތައް ހައްލު ކުރުމަށް މާލޭގެ އިތުރުން ހުޅުމާލޭގައި 400 ވެހިކަލް ޕާކްކުރެވޭނެ ބޮޑު ޕާކިން އިމާރާތެއް އެޅުމަށްވެސް ހުޅުމާލެ ދާއިރާގެ މެމްބަރު ޝުޖާ ސީދާ ރައީސާއި ވާހަކަ ދެއްކިކަމަށް މުއިއްޒު ވިދާޅުވިއެވެ. ނަމަވެސް ބިންވެސް ހަމަނުޖެހި އެކަންވެސް ކުރުމަށް ސަރުކާރުން ހުއްދަ ނުދެއްވި ކަމަށެވެ. މުއިއްޒު ވިދާޅުވީ މީގެ އިތުރުން މާލޭގައި ގަރާޖު ސިޓީގެ މައްސަލަ ހައްލުކުރުމަށް ވެރިކަމާއި ހަވާލުވުމަށްފަހު ޕާކިން ޒޯންތަކަކަށް ކާރު ޕާކް ކުރެވޭ ހުއްދަދީ ގަރާޖު ސިޓީ އުވާލާނެކަމަށެވެ.
މިސަރުކާރުގެ ސިޔާސަތަކީ އިންޑްސްޓްރިއަލް ވިލެޖްގައި ކުޅިވަރު ކުޅުން:
މުއިއްޒު ވިދާޅުވީ ރައީސް ޔާމީންގެ ވެރިކަމުގައި މާލޭގައި ހުރި ގުނަދަން ތަކާއި، ގަރާޖުތަކާއި ވޯކްޝިޕްތައް ބަދަލު ކުރުމަށް ހެދި އިންޑަސްޓްރިއަލް ވިލެޖުގެ މަސައްކަތްވެސް މިސަރުކާރުން ހުއްޓުވާފައިވާކަމަށެވެ. މާލޭގެ ހުރި ގުދަންތަކާއި، ވޯކްޝޮޕްތަކާއި، ހަނި މަގުތަކުގައި ހުންނަ ގަރާޖުތައް ބަދަލު ކުރުމަށް ކުރި މަސައްކަތް އެޕްލޭންގެ ދަށުން ކުރެވުނު ނަމަ މިއަދު ޓެކްސީ ޑްރައިވަރުންނާއި އެނޫން ފަރާތްތަކަށްވެސް ޓްރެފިކްގެ މައްސަލަތަކާއި އެނޫން ކަންކަމަށްވެސް ބޮޑެތި ލުއިތަކެއް ލިބިގެންދާނެކަމަށެވެ.
ނަމަވެސް ސިޓީ ކައުންސިލާއި ހަވާލުވެ އެތަނުގެ ޕްލޭނާއި ގުޅޭގޮތުން ވާހަކަ ދެއްކުމުން އެތަނަކީ ކުޅިވަރުކޮށް މަޖާ ކުރަން ޚާއްސަ ސަރަހައްދަކަށް ހެދުމަށް މިސަރުކާރުން ނިންމާފައިވާކަމަށް ވިދާޅުވެ ލިޔުމުން ސިޓީ ކައުންސިލަށް އެންގެވިކަމަށް މުއިއްޒު ވިދާޅުވިއެވެ.
މަގު ހެދުމުގެ މަޝްރޫޢު ސަރުކާރުން ހުއްޓުވީ:
މުއިއްޒު ވިދާޅުވީ މާލޭގެ މަގުތައް ޒަމާނީ ފެންވަރަކަށް ހެދުމަކީ ރައީސް ޔާމީންގެ ވެރިކަމުގައި ފެށި މަސައްކަތެއް ކަމަށެވެ. އެމަސައްކަތުގެ ދަށުން މިސަރުކާރުން ވެރިކަމަށް އައިސް މަގު ހެދުމުގެ މަސައްކަތް ކުރުމަށް ކޮންމެވެސް މަސައްކަތެއް ކުރިކަމަށެވެ. އެގޮތުން 400 މިލިޔަން ރުފިޔާ ހަމަޖައްސައި މާލޭގެ މަގުހެދުމަށް ސިފާގެ މޭޔަރު ކަމުގަ ފަށާފަ އޮތް މަޝްރޫއެއް، ސިޓީ ކައުންސިލް ބަދަލުވެ މޭޔަރު ބަދަލުވުމާއި ގުޅިގެން ސަރުކާރުން އަތުލީކަމަށް މުއިއްޒު ވިދާޅުވިއެވެ.
މާލޭގެ މަގު ހެދުމަށް އާރުޑީސީއާއިއެކު ސޮއިކޮށް ހުރިހާ ކަމެއް ކުރި ނަމަވެސް ސަރުކާރުން ސިޓީ ކައުންސިލް އަތުން ހުރިހާ ބާރެއް އަތުލުމަކީ މިއަދާއި ހަމައަށްވެސް މާލޭގެ މަގުތައް ނުހެދި އޮތް އެންމެ ބޮޑު ސަބަބުކަމަށް މުއިއްޒު ވިދާޅުވިއެވެ. މަހުތައް ހެދުނުނަމަ ޓެކްސީ ޑްރައިވަރުންނަށްވެސް މާލޭގައި ޓެކްސީ ކުރުމަށްވެސް ބޮޑެތި ފަސޭހަތަކެއް ވެގެންދާނެކަމަށް މުއިއްޒު ވިދާޅުވިއެވެ.
ޓެކްސީ ޑްރައިވަރުންނަށް މުއިއްޒުގެ ހައްލުތައް:
މުއިއްޒު ވިދާޅުވީ ޓެކްސީ ޑްރައިވަރުންގެ މައްސަލަތައް ހައްލު ކުރުމަށް ޓެކްސީ ޑްރައިވަރުންގެ ޤައުމެއް އެކުލަވާލުމަކީ ފުރަތަމަ ކުރާނެ މަސައްކަތް ކަމަށެވެ. އޭގެ ފަހުން ޑްރައިވަރުންނަކީ ވަޒީފާއެއް ގޮތަށް މަސައްކަތް ކުރާ ބަޔަކަށް ހަދައި، ޤާނޫނަށް ގެންނަން ޖެހޭ އިސްލާހު ގެނެސް ޑްރައިވަރުންނަށްވެސް އިންސުއަރެންސާއި، ބޭންކުތަކުން ލޯނު ނެގޭނެ މަގު ފަހި ކޮށްދެއްވާނެކަމަށެވެ.
ބޯހިޔާ ވަހިކަމަކީ އެއްވެސް ރައްޔިތަކު ތަފާތުނުކޮށް ހިންގާނެ މަޝްރޫއަކަށްވުމުން، ބޯހިޔާ ވަހިކަމުގެ މައްސަލަ ހައްލު ކުރުމަށް ކުރައްވާ މަސައްކަތުގެ ތެރެއިން އަޅާ ފްލެޓްތަކުން ޓެކްސީ ޑްރައިވަރުންގެ ތެރެއިން ދަފްތަރު ކުރެވި ދާއިމީ ވަޒީފާއެއް ގޮތަށް އެކަން ކުރާ ފަރާތްތަކަށް ފްލެޓް ލިބޭނެ ގޮތެއް ހަމަޖެހިގެންދާނެކަމަށް މުއިއްޒު ވިދާޅުވިއެވެ.
މީގެ އިތުރުން މުއިއްޒު ވަނީ މިހާރު އެއްވެސް ހަމައެއް ލަމައެއް ނެތި ޖަހާފައިވާ އަދި ޖަހަމުންދާ ޕާކިން ސްޓިކާތައް މަޢާފް ކޮށްދެއްވާނެކަމަށް ވިދާޅުވެފައެވެ. މުއިއްޒު ވިދާޅުވި މިނޫންވެސް ޓެކްސީ ޑްރައިވަރުންގެ ހުރި ހުރިހާ ކަންބޮޑުވުމަކަށް ހައްލު ގެނައުމީ ކުރެވޭނެ އަދި ކުރައްވާނެ މަސައްކަތެއް ކަމަށެވެ. އެކަން ކުރެވޭނީ ކުރިއަށް އޮތް 2 ހަފްތާގައި ބުރަ މަސައްކަތެއް ކުރަވައި ޕީޕީއެމްއަށް ވެރިކަމުގެ ފުރުސަތު ދެއްވައިގެން ކަމަށް މުއިއްޒު ވިދާޅުވިއެވެ. މުއިއްޒު ވަނީ ކުރިއަށް އޮތް ދުވަސްތަކުގައި ބުރަ މަސައްކަތްތަކެއްކޮށް ޓެކްސީ ޑްރައިވަރުންގެ ތާއީދާއިއެކު މިވެރިކަން ބަދަލު ކުރެއްވުމަށް މަސައްކަތް ކޮށްދެއްވުމަށް އެދިވަޑައިގެންފައެވެ.
