ރާއްޖޭގައި އެންމެ ފުރަތަމަ އުފެދުނު ސިޔާސީ ޕާޓީ، އަދި މިއަދުވެސް އެންމެ ބޮޑު އެއް ސިޔާސީ ޕާޓީގެ ގޮތުގައި އޮތް އެމްޑީޕީ ބައިބައިވެގެން ދިއުމާއެކު، އެޕާޓީ އުފެއްދި ޕާޓީގެ ބާނީންވެސް ވަނީ ދެބަޔަކަށް ބެހިގެން ގޮސްފައެވެ. އޭގެ ތެރޭގައި އެންމެ ޚާއްސަ ގޮތެއްގައި ފާހަގަވެގެން ދިޔައީ ޒަމާނުއްސުރެ ޕާޓީގެ އެންމެ އިސް ދެ ތަނބުގެ ގޮތުގައި ފާހަގަވަމުން އައި، އެޕާޓީގެ ކުރީގެ ރައީސް މުހައްމަދު ނަޝީދުއާއި ޕާޓީގެ އިސް ލީޑަރު، މިހާރުގެ ރައީސް، ރައީސް ސާލިހާ ދެބޭފުޅުން މެދުގައި އުފެދުނު ސިޔާސީ ވާދެވެރިކަމެވެ.

މިގޮތުން އުފެދުނު ސިޔާސީ ވާދަވެރިކަން ސިޔާސީ ފިތުނައަށް ބަދަލުވެ، ދެބޭފުޅުންގެ މެދުގައި ޒަމާނުއްސުރެ އޮތް އެކުވެރިކަމާއި ދެބޭފުޅުންގެ ވަށައިގެން އޮތް އާއިލީ ގުޅުންވެސް ކެނޑި، އެންމެ ފަހުން ނަޝީދު އެމްޑީޕީ ދޫކޮށް އާ ސިޔާސީ ޕާޓީއެއް ހައްދަވާ ރައީސް ސާލިހުގެ ވެރިކަން ނިމުމަކަށް ގެނައުމަށް މަސައްކަތް ފެއްޓެވީއެވެ.

އެއަށްފަހު، އެމްޑީޕީގެ އެތެރޭގައި އޮތް ރައީސް ސާލިހުގެ ބާރު ނައްތާލާ، އެމްޑީޕީގެ ބާރުވެރިކަން ހޯއްދެވުމަށް އެޕާޓީގެ އެތެރޭގައި ހުންނަވައިގެން ނަޝީދު ކުރެއްވި ހުރިހާ މަސައްކަތެއް ނާކާމިޔާބުވެ، ނަޝީދު އެމްޑީޕީން ވަކިވީ ފާއިތުވި ޖޫންމަހުގެ 21 ވަނަ ދުވަހުއެވެ. އެއަށްފަހު ދަ ޑިމޮކްރެޓްސްގެ ނަމުގައި އާ ޕާޓީއެއް އުފައްދަވާ، އެޕާޓީގެ ފަރާތުން އާރޓިފިޝަލް ބީޗުގައި ބޭއްވި ޖަލްސާގައި ވާހަކަ ދައްކަވަމުން ނަޝީދު ވިދާޅުވީ، އެމްޑީޕީގެ ބޮޑުބައި އޮތީ އޭނާ އުފެއްދެވި ޑިމޮކްޓްސްގައި ކަމަށާއި، އެމްޑީޕީ ރޫޅާލާނެ ކަމުގައެވެ.

އެހެންނަމަވެސް އެމްޑީޕީ ރޫޅާލާނެކަމަށް ނަޝީދު ވައުދުވިތާ ދެ މަސް ދުވަސް ފާއިތުވެގެން ދާއިރު، އަދި ކުރިޔަށް އޮތް ރިޔާސީ އިންތިޚާބަށް 2 ހަފްތާއަށް ވެގެން ގޮސްފައިވާއިރު، ބަދަލުވަމުންދާ ރާއްޖޭގެ ސިޔާސީ މަސްރަހުން މިއަދު ފެންނަމުން ދަނީ ވަރަށްވެސް ތަފާތު މަންޒަރެއް ކަމުގައި މިވަނީ ދަންނަވާން ޖެހިފައެވެ.

ފެންނަމުން ދަނީ، ރޫޅަލާނެކަމަށް ނަޝީދު ވިދާޅުވި އެމްޑީޕީ ވަރުގަދަވެ، ޚުދު އަމިއްލަފުޅު ޕާޓީގައި، އެންމެ އިޚްލާސްތެރިކަމާއެކު ތިއްބެވި މެމްބަރުން އެނބުރި އެމްޑީޕިއާއި ގުޅި، ނަޝީދުގެ އަމިއްލަފުޅު ޕާޓީ ރޫޅެމުންދާ މަންޒަރެވެ.

ޑިމޮކްރެޓްސް ދޫކޮށް މެމްބަރުން އެނބުރި އެމްޑީޕިއަށް!

އެމްޑީޕީ ރޫޅާލާނެކަމަށް ނަޝީދު ވައުދުވިތާ ދެ މަހެއްހާ ދުވަސްފަހުން، މިއަދު ފެންނަމުންދާ މަންޒަރުތަކުން މޭރުން ކުރާން ޖެހިފައިވާ އެންމެ ބޮޑު ހަގީގަތަކީ، ރާއްޖޭގައި މިވަގުތު އޮތް އެންމެ ހަނގު ޕާޓީ، ނަޝީދުގެ "ދަ ޑިމޮކްރެޓްސް" ރޫޅެން ފަށާފައިވާކަމެވެ.

އޭގެ އެންމެ ބޮޑު އެއް ހަގީގަތެއްގެ ގޮތުގައި ފެންނާން އޮތީ، ރިޔާސީ އިންތިޚާބަށް ކެމްޕޭން ކުރަމުން ދަނިކޮށް، އަދި ރިޔާސީ އިންތިޚާބަށް އެންމެ ދެ ހަފްތާއަށް ވެފައިވަނިކޮށް، ރައްޔިތުންގެ މަޖިލިހުގެ މެމްބަރުން ނަޝީދު ދޫކޮށް ރައީސް ސާލިހާ ބައިއަތު ހިފަމުންދާ ދިއުމެވެ.

މިގޮތުން އެމްޑީޕީ ދޫކޮށް ނަޝީދުގެ ޑިމޮކްރެޓްސްއާއި ގުޅުނު މެމްބަރުންގެ ތެރެއިން އެންމެ ފުރަތަމަ ޑިމޮކްރެޓްސް ދޫކޮށް އެންބުރި އެމްޑީޕީއާއި ގުޅުނު މެމްބަރެއްގެ ގޮތުގައި ފާހަގަވެގެން ދިޔައީ ޅުދުއްފުށީ އުތުރު ދާއިރާގެ މެމްބަރު ޔާސިރު އަބްދުއްލަތީފުއެވެ.

ޑިމޮކްރެޓްސްގައި ދެމަހެއްހާ ދުވަހު އުޅުއްވުމަށްފަހު، މީގެ ހަފްތާއެއް ކުރިން، ކުޅުދުއްފުށި ކައުންސިލްގެ މެޖޯރިޓީ މެމްބަރުންނާވެސްއެކު އެނބުރި އެމްޑީޕީއަށް ސޮއި ކުރައްވަމުން މެމްބަރު ޔާސިރު ވިދާޅުވީ ވިސްނުން ބަދަލު ކުރެއްވީ ރައްޔިތުންގެ އިހުސާސްތަކާ އެއްގޮތަށް ކަމުގައެވެ.

ދެން ފެނިގެން މިދިޔައީ، ބެލުންތެރިން އަދި މާބޮޑަށް ހައިރާން ކުރިވި މަންޒަރެކެވެ. ނަޝީދުއާއި ރައީސް ސާލިހާއި ދެބޭފުޅުންގެ މެދުގައި ޚިޔާލުތަފާތުވުން އުފެދުނީއްސުރެ، ނަޝީދަށް އެންމެ ބޮޑަށް ތާއީދު ކުރައްވަމުން ގެންދެވި، ނަޝީދުއާއެކީ ދެގޮތެއްނުވެ ދެމިހުންނެވި، ތޮއްޑޫ ދާއިރާގެ މެމްބަރު ހަސަން ޝިޔާން (ގިޓާ) ވިސްނުން ބަދަލުކޮށް، އެނބުރި އެމްޑީޕީއަށް ސޮއި ކުރެއްވި މަންޒަރެވެ.

އަލުން އެމްޑީޕީ އަށް ސޮއި ކުރެއްވުމަށް ފަހު ރޭ ކުރި ޓްވީޓެއްގައި މެމްބަރު ޝިޔާން ވިދާޅުވީ ތޮއްޑޫ ދާއިރާ އާއި މުޅި ރާއްޖޭގެ ގިނަ ރައްޔިތުންގެ ވިންދާ އެއްގޮތަށް ވިސްނުން ބަދަލުކޮށް އެމްޑީޕީއާ އަލުން ގުޅިފައިވާކަމަށެވެ. މި ނިންމުމަކީ އެންމެ ރަނގަޅު ނިންމުންކަން ހާމަކޮށް ޝިޔާން ވަނީ މިއިންތިޚާބު އެއްބުރުން ރައީސް ޞާލިހު ކާމިޔާބު ކުރާނެކަމަށް ވިދާޅުވެފައެވެ.

ނަޝީދުއާ އެންމެ ގާތުގައި ހުންނެވިކަމަށް ގިނަބަޔަކު ދެކެމުންއައި އެއް މެމްބަރު ހަސަން ޝިޔާން ނަޝީދު ދޫކޮށް ރައީސް ސާލިހާއި ބައިއަތު ހިފުމުން ނަޝީދުވަނީ އުދާސްތައް ބޭރުކޮށްލައްވާފައެވެ. އަދި ރައީސް ސާލިހަށް ފާޑުވިދާޅުވަމުން ނަޝީދު ތުހުމަތު ކޮށްފައިވަނީ، އެމްޑީޕީ ދޫކުރި ބައެއް މެމްބަރުން އަލުން އެޕާޓީއާއި ގުޅެމުން ދަނީ ރިޝްވަތު ނަގައިގެން ކަމުގައެވެ. އަދި އެއީ ދައުލަތުގެ ފައިސާއިން ކަމަށްވެސް ނަޝީދު ތުހުމަތު ކޮށްފައި ވެއެވެ.

ރައީސް ސާލިހަށް ފާޑުވިދާޅުވެ ނަޝީދު ކުރެއްވި ޓުވީޓުގައި ވިދާޅުވެފައިވަނީ، ދައުލަތުގެ ފައިސާއިން ރިޝްވަތު ދީގެން މެމްބަރުން ގެންދިއުމުން ވާނެ އެއްވެސް ފައިދާއެއް ނޯންނާނެ ކަމަށާއި، އެކަމުން ރައީސް ސާލިހަށް ވާނީ ގެއްލުން ކަމުގައެވެ.

ޑިމޮކްރެޓްސް ރޫޅެމުން ދަނީ، ކީއްވެ؟

ކުރިޔަށްއޮތް ރިޔާސީ އިންތިޚާބަށް އެންމެ ދެ ހަފްތާއަށް ވެގެން ގޮސްފައިވާއިރު، ހުރިހާ ޕާޓީއަކުންވެސް ބަލަމުންދަނީ އެޕާޓީއަކަށް ނެގެން އޮތް ސިޔާސީ މަންފާއެއް ނެގުމަށެވެ. މިގޮތުން ތާއީދު ހޯދުމަށް އެންމެ ބޮޑު ދެ ޕާޓީން ކުރަމުންދާ މަސައްކަތްތަކާއެކު، މިހާރު ކަށަވަރުވެ ޔަގީންވާން އޮތް އެއް ކަމަކީ، ރިޔާސީ އިންތިޚާބުގެ އެންމެ ކުރީ ސަފުގައި އެމްޑީޕީއާއި ޕީޕީއެމް ވާދަ ކުރާނެ ކަމެވެ.

އޭގެ ނަތީޖާއަކަށް ވެގެން މިހާރު ވެގެން ގޮސްފައިވަނީ، ފެންނަމުންދާ ތާއީދަށް ބަލާއިރު، މިއަހަރުގެ ރިޔާސީ އިންތިޚާބު ކާމިޔާބުކޮށް ވެރިކަމަށް ނާދެވޭނެ ޕާޓީތައް ޔަގީނާއި ގާތަށް ކަށަވަރު ކުރެވިގެން ގޮސްފައި ވުމެވެ. މިގޮތުން، ރިޔާސީ އިންތިޚާބު ކާމިޔާބު ކުރެވޭނެ މިންވަރަށް ތާއީދު ނެތް ޕާޓީތަކުގެ ތެރޭގައި ގިނަ ބަޔަކު ގުނާ އެއްޕާޓީއަކީ ނަޝީދުގެ ޑިމޮކްރެޓްސް ޕާޓީކަން މިފުރުސަތުގައި ފާހަގަކޮށްލާން ޖެހެއެވެ.

އެހެންކަމަށް ވާނަމަ، ނަޝީދުގެ ޑިމޮކްރެޓްސް ޕާޓީއަށް ދެން ޖެހޭނީ ރިޔާސީ އިންތިޚާބުގެ ދެވަނަ ބުރަކަށް ދާން ޖެހިއްޖެ ހާލަތެއްގައި އެހެން ޕާޓީއަކާއެކު ކޯލިޝަންހަދާ، ދެން އަންނަ ވެރިކަމެއްގެ ހިއްސާ ހޯދުމަށެވެ. އެހާލަތުގައި ގިނަބަޔަކު ދެކޭގޮތުގައި، ރައީސް ސާލިހުގެ މައްޗަށް އޮތް ދެކޮޅޮވެރިކަމާއެކު، ނަޝީދަށް އޮންނާނޭ ޗޮއިސްއަކީ އިދިކޮޅު ޕީޕީއެމްއާއެކު ކޯލިޝަން ހެދުމެވެ.

އެހެންނަމަވެސް، އެއީ ރައީސް ސާލިހާމެދު ނަޝީދުގެ ހިތްޕުޅުގައި އޮތް ނުތަނަވަސްކަމާއި، ޒާތީ ހަސަދައަށް އޮތް ތަސައްލީއަކަށް ވެގެންދިޔަ ނަމަވެސް، އެ ހައްލަކީ ނަޝީދުގެ އަހިރުގައި ތިއްބެވި ސިޔާސީ އެހެން ބޭފުޅުންނަށް އޮތް ހައްލެއްގެ ގޮތުގައި ފެންނާކަށް ނެތެވެ. އެއީ އެބޭފުޅުންނަށް ސިޔާސީގޮތުން ކުރިމަގު އޮތް ޗޮއިސްއެއްގެ ގޮތުގައި ބެލެވޭކަށްވެސް ނެތެވެ. އެމެމްބަރުންނަށް ކުޑަވެގެން ކުރިޔަށް އޮތް ރައްޔިތުންގެ މަޖިލިހުގެ އިންތިޚާބުވެސް ކާމިޔާބުކުރެވިދާނެކަމުގެ އުއްމީދުވެސް އޮތްތަނެއް ފެންނާކަށް ނެތެވެ.

ހާގީގަތުގައިވެސް ފެންނަމުންދަނީ، ރޫޅާލާނެކަމަށް ނަޝީދު ވިދާޅުވީ އެމްޑީޕީ ވަރުގަދަވެ، އަމިއްލަފުޅު ޕާޓީ ރޫޅި، ނަޝީދުގެ ވަށައިގެން އޮތް ސިޔާސީ ބާރުވެރިކަންވެސް ހަނިވެ ފަނޑުވަމުންދާ މަންޒަރެވެ.