ބަނގުރަލުގެ މައްސަލައެއްގައި ޕީއެސްއެމްގެ ކުރީގެ ޑެޕިޔުޓީ މެނޭޖިންގ ޑިރެކްޓަރ އާމިނަތު ޝާޔަން ޝާހިދު، މ. ޕެޓީވިލާ ހައްޔަރުކޮށްފިއެވެ.
ޝާޔަން ހައްޔަރުކޮށްފައި ވަނީ ގަވާއިދާއި ހިލާފަށް ބަނގުރާ ގެންގުޅުނު ކަމުގެ ތުހުމަތުގައެވެ. އޭނާގެ ބަންދުގެ މުއްދަތު ޖަހަން މިއަދު ކްރިމިނަލް ކޯޓަށް ހާޒިރު ކުރުމުން ޝަރުތު ކުރުމަށްފަހު ވަނީ ދޫކޮށްލައިފައެވެ.
އޭނާ ބަންދުން ދޫކޮށްލާފައި ވަނީ އޭނާ ހުރި ތަނުން ފެނުނު ބަނގުރާ ދަޅު ތަކަކީ އޭނާގެ ފިރިމީހާގެ ތަކެތި ކަމަށް ބުނެފައިވާތީ އާއި އޭނާއަކީ ކުށުގެ ރެކޯޑް އޮތް މީހަކަށް ނުވާތީއެވެ. އަދި އޭނާ ދޫކޮށްލައިފިނަމަ މުޖުތަމައުގެ ސަލާމާތަށް ނުރައްކަލެއް ކުރިމަތިވެދާނެ ސަބަބެއް އޮތް ކަމަށް ނުފެންނަ ކަަމަށްވެސް ބުނެފައި ވެއެވެ.
މި މައްސަލައިގައި ޝާޔަންގެ އިތުރުން، ހަ މީހަކު ހައްޔަރު ކުރިއެވެ. އޭގެ ތެރެއިން ޝާޔަންގެ ފިރިމީހާވެސް ހިމެނެއެވެ. ނަމަވެސް އޭނާ ބަންދުން ދޫކޮށްލާފައިވާއިރު، ބާކީ ތިބި މީހުންގެ ބަންދަށް ކޯޓުން ޖެހީ 10 ދުވަހެވެ. ބަންދުގެ މުއްދަތު ޖެހި މީހުންގެ ތެރޭގައި ޝާޔަންގެ ދައްތަ ހިމެނެއެވެ.
