ރ. އަތޮޅު ދުވާފަރުގެ ސިއްހީ މަރުކަޒު ހޮސްޕިޓަލަކަށް ބަދަލުކޮށް، އެރަށުގައި އެއާޕޯޓު އެޅުމާ ގުޅޭގޮތުން މަޝްވަރާކުރާނެ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެއެވެ.
އަންނަ މަހު ބާއްވާ ރިޔާސީ އިންތިހާބުގެ ކެމްޕެއިނަށް، މި އަތޮޅަށް ފައްޓަވާފައިވާ ދަތުރުފުޅުގެ ތެރެއިން، ދުވާފަރުގައި ބޭއްވި ޖަލްސާގައި ރައީސް ވިދާޅުވީ، މި ރަށަށް މިއަދު ހަވީރު ވަޑައިގެންނެވިއިރު ސަލާމްކުރެއްވި ކޮންމެ ތިން މީހަކުން އެކަކު އެދުނީ މި ރަށުގައި އެއާޕޯޓެއް އެޅުމަށް ކަމަށެވެ.
އެކަމާ ގުޅިގެން ރައީސް ވިދާޅުވީ ރާއްޖެ ތަރަައްގީކޮށް އިގުތިސޯދު ދެ ގުނަ ކުރަން ކުރާ އެއް ކަމަކީ ކަނޑާއި ވައިގެ މަގުން ރަށްތައް ގުޅުވާލުން ކަމަށެވެ. ރައީސް ވިދާޅުވީ ރައްޔިތުންގެ އިހުސާސްތައް ބޮލާލާ ނުޖައްސަވާނެ ކަމަށާއި އެއާޕޯޓާ މެދު އުއްމީދެއް ވާނަމަ ދުވާފަރު ރައްޔިތުންނަށް ދެރަ ގޮތެއް ނުހަދާނެ ކަމަށެވެ.
ތިޔަބޭފުޅުންގެ ތިޔަ އެދުމާ އެކީގައި އަޅުގަނޑު ޕްލޭނިން މިނިސްޓްރީ އާއި، ޕޮލިސީ ޓީމު އަދި ފައިނޭންސް މިނިސްޓްރީއާ އެކު އަދި އިށީންނާނަން. ތިޔަބޭފުޅުން އުންމީދު ގެއްލުވާނުވާ. އަޅުގަނޑުމެން ތިޔަބޭފުޅުންނަކަށެއް ދެރަގޮތެއް ނުހަދާނަން. ރައީސް ޞާލިހު ވިދާޅުވިއެވެ.
ދުވާފަރަށް ރައީސްގެ ވައުދު:
– ސިއްހީ މަރުކަޒު ހޮސްޕިޓަލަކަށް ބަދަލުކުރުން
– އާރްޓީއެލް ބަހުގެ ހިދުމަތް ފެށުން
– މަސް ޕްރޮސެސް ކުރެވޭނެ އިންތިޒާމް ހަމަޖެއްސުން
ރ. އަތޮޅުގައި އިތުރު އެއާޕޯޓެއް އަޅާނެ ކަމުގެ އުންމީދު ރައީސް މިރޭ ދެއްވި އިރު، އެއަތޮޅު އިފުރުގައި އެއާޕޯޓެއް އޮވެއެވެ. މި ކެމްޕޭނުގެ ތެރެއިން ރ. އަލިފުއްޓާއި ބެރިޔަންފަރުގައި އެއާޕޯޓު އަޅައިދެއްވާނެ ކަމަށް ރައީސް މީގެ ކުރިން ވައުދުވެވަޑައިގަތެވެ. ދުވާފަރުގައި އެއާޕޯޓެއް އެޅުމަށް ނިންމައިފި ނަމަ އަންނަ ދައުރުގެ ތެރޭގައި އެއަތޮޅުގައި ޖުމްލަ ހަތަރު އެއާޕޯޓުގައި ހިދުމަތް ދޭނެއެވެ.
