އެކި ކުށްތަކުގައި ހައްޔަރު ކުރެވޭ ވެރިންނަށް ޗޮކުލެޓު ދީގެން ޤައުމުގެ ހާލަތު ރަނގަޅު ނުކުރެވޭނެ ކަމަށާއި، މިއީ ހަރުކަށި ޖެހިލުންކުޑަ ވެރިއަކަށް ޖާގަ ދޭންވީ ވަގުތު ކަމުގައި ރިޔާސީ ރޭހުގައި އަމިއްލަ ގޮތުން ވާދަކުރައްވާ އުމަރު ނަސީރު ވިދާޅުވެއްޖެއެވެ.

ދައުލަތުގެ މީޑިއާގައި ރޭ ވާހަކަ ދައްކަވަމުން އުމަރު ވިދާޅުވީ ރިޔާސީ އިންތިޚާބާއި ޤައުމު ކުރިމަތިލާއިރު ރާއްޖެ އޮތީ ވަރަށް ނާޒުކު ފައްތަރެއްގައި ކަމަށެވެ. ވެރިންނަށް ވަޑައިގެންނެވި ބޭފުޅުންނަށް ޤައުމު ހިންގެވުމުގައި އަޅަންޖެހޭ ފިޔަވަޅު އެންމެ ރަނގަޅަށް ނޭޅުއްވުމުގެ ސަބަބުން ޤައުމުގެ ހާލަތު އެއްދުވަހުން އަނެއް ދުވަހަށް ދަނީ ދަށަށް ކަމަށް އުމަރު ވިދާޅުވިއެވެ.

އުމަރު ވިދާޅުވީ އޭނާ ސިޔާސީ ދާއިރާގައި ކުރައްވާ މަސައްކަތަކީ ޤައުމަށް ބަދަލެއް ގެނައުމުގެ މަސައްކަތް ކަމަށެވެ. ޤައުމަށް ހެޔޮ ބަދަލެއް ގެނެވޭނީ، ޤައުމުގައި މިހާރު ހައްދުން ނައްޓާފައިވާ މަސްތުވާތަކެއްޗާއި، ގޭންގް ކުށްތަކާއި، ވައްކަމާއި ފޭރުމާއި، ރޭޕް ކުރުމާއި މީހުން މެރުންފަދަ ކަންކަން ހުއްޓުވިގެން ކަމަށެވެ. އެކަންކަން ކުރަން އަތް މަޑު، މަޑުމައިތިރި ވެރިއަކު ހޮވައިގެން ވާނެ އެއްވެސް ފައިދާއެއް ނެތްކަމަށް އުމަރު ވިދާޅުވިއެވެ.

އަޅުގަނޑުމެން ޤައުމުގެ ވެރިކަމަށް އަތް މަޑު، މަޑުމައިތި ވެރިން ގެނެސްގެން ވީކަމެއް އެބައޮތްތޯ. ވައްކަމާއި ކޮރަޕްޝަނާއި، ޑްރަގާއި، އަންހެން ކުދިން ރޭޕް ކުރުން ފަދަ ކަންކަން ވީ އިތުރު ނޫންތޯ. މިވަގުތު ޤައުމަށް ބޭނުންވަނީ ޖެހިލުން ކުޑަ ހަރުދަނާ ލީޑަރެއް.

– އުމަރު ވިދާޅުވިއެވެ.

އުމަރު ވަނީ އޭނާގެ ހޯމް މިނިސްޓަރު ކަމުގައި މާފުށީގައި ހެދި ޖަލުގެ ގޮޅިތަކާއި ގުޅޭގޮތުން ވާހަކަ ދައްކަވާފައެވެ. ބައެއް ފަރާތްތަކުން ބުނެފައިވަނީ އެއީ އަނިޔާވެރި އަދި ރައީސް މައުމޫންގެ ވެރިކަމުގައި ދިންފަދަ ލާއިންސާނީ އަނިޔާ ދިނުމަށް ހަދި ގޮޅިތަކެއް ކަމަށެވެ. އުމަރު ވިދާޅުވީ އެގޮޅިތައް ހެދީ ސީދާ އުމަރުގެ ބެލުމުގެ ދަށުން ކަމަށެވެ. ނަމަވެސް ގޮޅިތައް ހަދަން އެޕްރޫވް ކުރީ ހިއުމަންރައިޓްސް ކޮމިޝަނުން ކަމަށެވެ.

އުމަރު ވިދާޅުވީ ޖަލަށް މީހަކު ދަނީ ކުށްވެރިވެގެން ކުށްކޮގެން ކަމަށެވެ. ކުށްކޮށްގެންދާ މީހާއަށް ޖަލުގައި ޗޮކުލެޓުދީ އުފަލުގައި ގެންގުޅޭނަމަ އޭނާ ޖަލަށް ލުމުގެ ބޭނުމެއް ނެތްކަމަށެވެ. ޖަލަކީ މީހާ އިސްލާހު ކުރުމަށް އަދި ކުރި ކުށަށް އޭގެ އަދަބު ލިބެންޖެހޭ ތަނަކަށް ވާންޖެހޭ ކަމަށް އުމަރު ވިދާޅުވިއެވެ. އޭނާ ވިދާޅުވީ ރާއްޖެއަށް ބޭނުންވަނީ ޔޫރަޕްގެ ކަރަކަރައިން ނެރޭ ބަޔާންތަކަށް އާބަސް ނުބުނާނެ ކެރޭ ވެރިއެއް ކަމަށެވެ.

ސިޔާސީ މަސައްކަތުގައި މަޖިލިސް އިންތިޚާބާއި ކައުންސިލް އިންތިޚާބައި އެނޫންވެސް އިންތިޚާބު ތަކުގައި ނުފެންނަނީ އެއީ ޤައުމަށް ބޭނުންވާ ސީދާ ބަދަލު ގެނެވޭނެ މަޤާމުތަކަށް ނުވާތީކަމަށް އުމަރު ވިދާޅުވިއެވެ. އުމަރު ވިދާޅުވީ ރާއްޖޭގައި ހުރި މައްސަލަތަކަށް ދާއިމީ ހައްލު ގެނެވޭނީ އޭނާގެ ވެރިކަމެއްގައި ކަމަށެވެ.