ރާއްޖެެއިން ބޭރުގެ ޤައުމެއްގެ ނުފޫޒުުގައި ވެރިކަން ކުރައްވާ ވެރިޔަކު މިޤައުމުގެ ޒަޢާމަތާއި ހަވާލުވާން ދިވެހި ރައްޔިތުން ނޭދޭ ކަމުގައި ރައްޔިތުންގެ މަޖިލީހުގެ ނިލަންދޫ ދާއިރާގެ ކުރީގެ މެމްބަރު ޑރ.ޚަލީލް ވިދާޅުވެއްޖެއެވެ.
ރިޔާސީ ކެމްޕޭންގައި ފ.ނިލަންދޫގައި ބޭއްވި ޖަލްސާގައި ވާހަކަ ދައްކަވަމުން ޚަލީލް ވިދާޅުވީ ރިޔާސީ އިންތިޚާބާއި ދިވެހި ރައްޔިތުން ކުރިމަތިލާއިރު، އޮތް އެންމެ ބޮޑު ސުވާލަކީ މިނިވަންކަމުގެ ސުވާލުކަމަށެވެ. ދިވެހި ރާއްޖޭގެ ވެރިކަން ކުރައްވާ ވެރިއަކީ ދިވެހި ރައްޔިތުންނަށް ޚިދުމަތް ދެވޭނެ ވެރިއަކަށް ވާންޖެހޭކަމަށެވެ. ބޭރުގެ ނުފޫޒުތަކަށް ބޯނުލަބާ، ބޭރުގެ ނުފޫޒާއިއެކު ވެރިކަން ނުކުރާ ވެރިއަކަށް ވާންޖެހޭކަމަށެވެ.
މިކަން ކުރެވޭނެ ކެންޑިޑޭޓަކީ ޑރ.މުއިއްޒުކަމަށް ޚަލީލް ވިދާޅުވިއެވެ. ޚަލީލް ވިދާޅުވީ މިވެރިކަން ފެށުނު ދުވަހުން ފެށިގެން ނިމުމަކާއި ހަމައަށް ދާއިރުވެސް ފެންނަނީ އެހެން ޤައުމެއްގެ އަޅުވެތި ކަމެއްގައި އޮތްތަން ކަމަށެވެ. ޤައުމުގެ ދަރަނި އިންތިހާއަށް ގޮސް ބޮލަކަށް ޖެހޭ ދަރަނި ދެލައްކަ ތިރީސް ހާހަށްވުރެ މައްޗަށް އަރާފައިވާކަމަށެވެ. ޚަލީލް ވިދާޅުވީ ދަރަންޏާއި، އިޤްތިޞާދާއި، ކުރިއެރުން ގެނެވޭނީ އެކަމުގެ ޤާބިލްކަން ހުންނަ މީހަކަށް ކަމަށެވެ.
މިވީ ފަސް އަހަރުގެ ތެރޭގައި ޤައުމަށް ގެންނަން ޖެހޭ ތަރައްޤީ ނުގެވި، އަނެއްކާވެސް އިތުރު ވައުދުތައް ވުމަށް ރަށްރަށަށް ވަޑައިގަންނަވާއިރު ސަރުކާރުގައި ތިއްބެވި ބޭފުޅުން ލަދު ގަންނަންޖެހޭކަމަށެވެ. ތަރައްޤީ ދަންނަ ބޭފުޅުން ތަރައްޤީ ގެންނަ ގޮތް އަދިވެސް މިސަރުކާރުން ދަސް ކުރަންޖެހޭކަމަށް ޚަލީލް ވިދާޅުވިއެވެ.
ޚަލީލް ވިދާޅުވީ ރާއްޖެ މިއަދު އޮތް ނާމާން ކަމާއި، ބިރުވެރި ހާލަތުން ބަދަލު ކުރެވޭނީ ޑރ.މުއިއްޒުގެ ޒަޢާމަތުގައި ކަމަށެވެ އެކަން ކުރެވޭނެ ގާބިލް ކުޅަދާނަކަން ޑރ.މުއިއްޒުއާއި ޓީމުގައި ހުންނާނެ ކަމީ ދިވެހިން ގަބޫލު ކުރާ ހަގީގަތެއް ކަމަށް ޚަލީލް ވިދާޅުވިއެވެ.
