ކުރިއަށް އޮތް ފަަސް އަހަރުގައިވެސް އަމާޒަކީ މިހާރު ފަށާފައިވާ ތަރައްޤީގެ މަޝްރޫޢުތައް އެއްވެސް މަޑު ޖެހުމެއްނެތި ބާރު ސްޕީޑުގައި ކުރިއަށް ގެންދިއުން ކަމުގައި އެމްޑީޕީގެ ރިޔާސީ ކެންޑިޑޭޓް ރައީސް އިބްރާހިމް މުހައްމަދު ޞާލިހު ވިދާޅުވެއްޖެއެވެ.
ރިޔާސީ ކެމްޕޭންގައި އއ.އަތޮޅަށް ކުރައްވާ ދަތުރުފުޅުގައި ތޮއްޑޫއަށް ވަޑައިގެން އެރަށުގެ ރައްޔިތުންނާއި މުޚާތަބު ކުރައްވާ ވާހަކަ ދައްކަވަމުން ރައީސް ޞާލިހު ވިދާޅުވީ ވެރިކަމަށް ވަޑައިގެންނެވިއިރު، ވީ ވައުދުތަކައި އަދި މިހާރު ހިނގަމުންދާ މަޝްރޫޢުތައް ހުއްޓުމެއްނެތި ކުރިއަށް ދާންޖެހޭކަމަށެވެ. އެކަން ކުރެވޭނީ އިތުރު ދައުރެއް ލިބިގެންކަމަށް ރައީސް ވިދާޅުވިއެވެ.
ވައުދުވަނީ ރާއްޖެ ބަދަލު ކުރަން. ރައްޔިތުންގެ ދިރިއުޅުން ބިނާކުރަން. ކުރިއަށް އޮތް ފަސް އަހަރުގެ އަމާޒަކީވެސް އެއީ. ރައްޔިތުން ބޭނުންވާ ތަރައްޤީގެ މަޝްރޫޢުތައް ބާރު ސްޕީޑުގައި ކުރިއަށް ގެންދިއުން.
– ރައީސް ޞާލިހު ވިދާޅުވިއެވެ.
ރައީސް ވިދާޅުވީ މި ދައުރުގައި ތޮއްޑޫއަށް ކޮށްދެއްވާނެ ކަމަށް ވައުދުވެވަޑައިގެންނެވި ހަ ކަމުގެ ތެރެއިން ހަތަރު ކަމެއްގެ މަސައްކަތް އެއްކޮށް ނިމިފައިވާ ކަމަށާއި ބާކީ ދެ މަޝްރޫއުގެ މަސައްކަތް ވެސް އެކި މަރުހަލާތަކުގައި ކުރިއަށްދާކަން އެމަނިކުފާނު ފާހަގަކުރެއްވިއެވެ. ރައީސް ވިދާޅުވީ ވަރަށް ގިނަ ރަށްތަކަށް މިހާރު ޒިޔާރަތް ކުރެވިފައިވާއިރު ހުރިހާ ރަށަކުން ވެސް ފެންނަނީ ތަރައްގީގެ ބޮޑު ބަދަލުތަކެއް ކަމަށެވެ.
ތޮއްޑޫއަށް މިހާރު ދިމާވެފައިވާ އެންމެ ބޮޑު އެއް މައްސަލައަކީ ކައުންސިލުން ދޭން ނިންމި 100 ގޯތި ދިނުމުގެ މައްސަލަ ހައްލުނުވެ ދިގުދެމިގެން ދިއުންކަން ފާހަގަކުރައްވައި ރައީސް ވިދާޅުވީ ކޯޓުގައި އޮތް އެ މައްސލަަ މިހާރު އޮތީ އެންމެ ފަހުގެ މަރުހަލާގައި ކަމަށެވެ. އެ މައްސަލަ ވަރަށް އަވަހަށް ނިމި 100 ގޯތި ދޫކުރާނެ ކަމަށާއި އެއަށްފަހު އިތުރު 200 ގޯއްޗަށް އިއުލާން ކުރާނެ ކަމަށް ވެސް އެމަނިކުފާނު ވިދާޅުވިއެވެ.
ރައީސްގެ މިދަތުރުފުޅުގައި މިއަދު އއ.އަތޮޅުގެ ގިނަ ރަށްތަކަށް ވަޑައިގަންނަވާނެއެވެ.
