އަމިއްލަ ގޮތުން ރިޔާސީ އިންތިޚާބުގައި ވާދަ ކުރައްވާ، އެމްއާރުއެމްގެ ރައީސް ފާރިސް މައުމޫނަށް ތާއީދު ކުރެއްވުމަށް ރައީސް މައުމޫން ނިންމަވައިފިއެވެ. އަދި ފާރިސްވަނީ ރައީސް މައުމޫން އޭނާއަށް ތާއީދު ކުރައްވަން ނިންމެވީތީ އެމަނިކުފާނަށް ޝުކުރު އަދާ ކުރައްވާފައެވެ.
ފާރިސްއަށް ތާއީދު ކުރައްވާކަން ހާމަ ކުރެއްވުމުގެ ގޮތުން ރައީސް މައުމޫން އާންމު ކުރެއްވި ވީޑިއޯ މެސެއްޖެއްގައި ވިދާޅުވީ، އެމަނިކުފާނު ފާރިސް މައުމޫނަށް ތާއީދު ކުރައްވަން ނިންމެވީ ފާރިސްއަކީ އެމަނިކުފާނުގެ އުފަން ދަރިއަކަށް ވާތީކަމަށް ނޫން ކަމަށާއި، ކުރިޔަށް އޮތް ރިޔާސީ އިންތިޚާބުގައި ފާރިސް އެންޑޯސް ކުރައްވަނީ ވާޖިބުތަކާއި މަސްއޫލިއްޔަތުތައް އަދާ ކުރުމުގައި ގާބިލިއްޔަތު ހުރި މީހެއް ކަމަށް ގަބޫލު ކުރައްވާތީ ކަމުގައެވެ.
އަދި ރައީސް މައުމޫންވަނީ އެމަނިކުފާނަށް ތާއީދު ކުރައްވާ ހުރިހާ ފަރާތްތަކުންވެސް ފާރިސްއަށް ވޯޓު ދެއްވުމަށް އެދިވަޑައިގެންފައެވެ.
ފާރިސް މައުމޫނަށް އަޅުގަނޑު ތާއިދު ކުރަނީ، އޭނާއަކީ އަޅުގަނޑުގެ އުފަން ދަރިއަކަށްވީތީއެއް ނޫން، އަޅުގަނޑު ފާރިސަށް ތާއިދު ކުރަނީ، އޭނާ އަޅުގަނޑު ގަބޫލު ކުރާ އުސޫލުތައް ގަބޫލު ކުރާތީ، އަޅުގަނޑު މީގެ ކުރިންވެސް ކުރި ސިޔާސީ މަސައްކަތުގައި އަޅުގަނޑަށް އެހީތެރިވެދީފައިވާތީ.
ރައީސް މައުމޫނުގެ ވީޑިއޯ މެސެޖުގައި ވިދާޅުވެފައި ވެއެވެ.
ކުރިއަށް އޮތް ރިޔާސީ އިންތިޚާބުގައި އަޅުގަނޑަށް ވޯޓް ދެއްވުމަށް ނިންމަވާ އެކަން އިޢުލާންކޮށް, ކެމްޕޭނުގައި އެހީތެރިވެދެއްވަން ނިންމެވީތީ ވަރަށް އިޚްލާސްތެރިކަމާއެކު ޝުކުރު ދަންނަވަން.
ކެންޑިޑޭޓް ނަމްބަރު 6
އަޙުމަދު ފާރިސް މައުމޫން / ޑރ. ޢަބްދުއްސައްތާރު ޔޫސުފް… https://t.co/AavgKf6xyj— faris 🇲🇻 🇵🇸 (@afarismaumoon) August 11, 2023
ރައީސް މައުމޫނުގެ ވީޑިއޯ މެސެޖުގައި އިތުރަށް ވިދާޅުވެފައިވަނީ، ފާރިސް ރައްޔިތުންގެ މަޖިލިހުގެ މެމްބަރެއްގެ ގޮތުގައި ހުންނަވައިގެން ކުރެއްވި މަސައްކަތްތަކުންވެސް ވަނީ އޭނާއަކީ ރައީސުލްޖުމްހޫރިއްޔާ ކަމުގެ މަގާމުގެ ވާޖިބުތަކާއި މަސްއޫލިއްޔަތުތައް އަދާ ކުރުމުގައި ގާބިލިއްޔަތު ހުރި ބޭފުޅެއްކަން ސާބިތު ވެފައިވާކަމުގައެވެ.
މީގެ ކުރިން ރައްޔިތުންގެ މަޖިލީހުގެ މެންބަރެއްގެެ ގޮތުގައި އޭނާ ހުރިއިރު އޭނާ ވަނީ އެކަން ސާބިތުކޮށްދީފައި، އެއީ ގައުމަށް ފާއިދާ ހުރި ކަންކަމުގައި ވާހަކަދައްކާ، އަދި އެކަމުގެ ސަބަބުން އޭނާއަށް ވަނީ އަދަބުތަކާއިވެސް ކުރިމަތިލާން ޖެހިފައި، އެހެން ނަމަވެސް އޭނާގެ ހިވްރަކަށް ބަދަލެއް ނާދޭ، ސާބިތުކަންމަތީގައި ހުރީ.
ފާރިސްއަށް ތާއީދު ކުރައްވަން ނިންމެވި ސަބަބު ހާމަކުރައްވަމުން ރައީސް މައުމޫން ވިދާޅުވެފައި ވެއެވެ.
މައުމޫން ވިދާޅުވެފައިވަނީ، ފާރިސް ރައީސްކަމުގެ މަގާމަށް ހޮވިއްޖެނަމަ، އޭނާ ހުންނަވާނީ ސާބިތުކަމާއި ހިތްވަރާއެކުކަމަށް ޔަގީން ކުރައްވާ ކަމުގައެވެ. އަދި ފާރިސް މައުމޫނަކީ އަމިއްލަ ފައިދާއަށްޓަކާ ގައުމު ވިއްކާލާނެ މީހެއް ނޫންކަމަށާއި، އޭނާއަކީ ދޮގު ހަދާ، މަކަރު ހަދާ އޮޅުވާލާނެ މީހެއްވެސް ނޫންކަމުގައެވެ.
ފާރިސް މައުމޫން އަމިއްލަގޮތުން ރިޔާސީ އިންތިޚާބުގައި ވާދަ ކުރައްވާއިރު، އޭނާ ރައީސްކަން ކުރައްވާ އެމްއާރުއެމް އުވާލަން އިލެކްޝަންސް ކޮމިޝަނުން ވަނީ ނިންމާފައެވެ.
އިލެކްޝަންސް ކޮމިޝަން (އީސީ)ން އެމްއާރުއެމް އުވާލަން ނިންމީ، ގާނޫނުގައި ބުނާ 3،000 މެންބަރުން ހަމަނުވެގެން، ދިން ނޯޓިސްގައި ވެސް އެ އަދަދު ހަމަ ނުވެގެން ކަމަށް ބުނެ އެވެ. ނަމަވެސް، އެ ޕާޓީން ސިވިލް ކޯޓަށް ހުށަހަޅާފައިވާ މައްސަލައަކާ ގުޅިގެން ކޮމިޝަންގެ އެ ނިންމުމަށް އަމަލު ކުރަން ފަސް ކުރަން ކޯޓުން ވަނީ އަމުރެއް ނެރެފަ އެވެ.
