މި ހަފްތާގައި ރާއްޖޭގެ ފުޓްބޯޅަ ސީޒަން ފެށުމުގެ ކުރިން ފުރަތަމަ ޑިވިޝަނުގެ އަށް ކްލަބްގެ ކުޅުންތެރިންނާއި އޮފިޝަލުން ކޮވިޑް-19 އަށް ޓެސްޓްކުރާނެ ކަމަށް އެފްއޭއެމުން ބުނެފި އެވެ.
އެ އިދާރާއިން ހާމަކުރި ގޮތުގައި ސީޒަން ފެށުމުގެ ކުރިން ހުރިހާ ޓީމެއްގެ ކުޅުންތެރިންނާއި އޮފިޝަލުން ކޮވިޑް-19 އަށް ޓެސްޓްކުރާނެ ކަމަށާއި އެއީ ގައިޑްލައިންގެ ތެރެއިން ކުރަން ޖެހޭ ކަމެއް ކަމަށެވެ. މީގެ ކުރިން އެފްއޭއެމުން މިދިޔަ ޖުލައި މަހު ގައުމީ ޓީމުގެ ޕްރެކްޓިސް ފެށުމުގެ ކުރިން ވެސް ވަނީ ހުރިހާ ކުޅުންތެރިން ކޮވިޑަށް ޓެސްޓްކޮށްފަ އެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ)އާ އެކު އެފްއޭއެމުން ބޭއްވި ގިނަ މަޝްވަރާތަކަށް ފަހު މިދިޔަ އޮކްޓޫބަރު މަހު ޓީމުތަކުގެ ޕްރެކްޓިސް ފަށަން ހުއްދަދިންއިރު، އެފްއޭއެމުން ވަނީ ނިއުނޯމަލްގެ އުސޫލުތަކަށް ކްލަބްތައް ފެއްތުމުގެ ގޮތުން ކޮންމެ ޓީމެއްގައި ހައިޖީން އޮފިޝަރެއް ކަނޑައަޅައިފަ އެވެ. އެއްވެސް ވަރަކަށް ސަޕޯޓަރުން މެޗުތަކަށް ނުވައްދައި ކުޅެން ނިންމާފައިވާއިރު، މެޗުތަކަށް ވަދެވޭނެ މީހުންގެ އަދަދުތަކެއް ވެސް ވަނީ ކަނޑައަޅައިފަ އެވެ. އެ ގޮތުން މެޗު ކުޅޭ ދެ ޓީމުގެ އޮފިޝަލުންނަށް ވެސް ވަދެވޭނީ ކަނޑައަޅާފައިވާ އަދަދަކަށެވެ.
އަންނަ އަންގާރަ ދުވަހުގެރޭ ސީޒަން ހުޅުވަން ކުޅޭ އެފްއޭ ޗެރިޓީ ޝީލްޑް މެޗުގައި އެންމެ ފަހުގެ ޗެމްޕިއަން މާޒިޔާ ބައްދަލުކުރާނީ މިދިޔަ އަހަރުގެ ރަނަރަޕް އީގަލްސްއާ އެވެ. ދިވެހި ޕްރިމިއާ ލީގު ފަށަން ނިންމާފައިވަނީ މި މަހު 13 ވަނަ ދުވަހު އެވެ.
