އަންނަ މަހުގެ 9 ވަނަ ދުވަހު އޮންނަ ރިޔާސީ އިންތިހާބުގައި އަމިއްލަ ގޮތުން ވާދަ ކުރެއްވުމަށް ނިންމަވައި ކުރީގެ ހޯމް މިނިސްޓަރު އުމަރު ނަސީރު ކެންޑިޑެސީ ފޯމު އިލެކްޝަންސް ކޮމިޝަން (އީސީ) އަށް މިއަދު ހުށަހަޅުއްވައިފިއެވެ.
ކެންޑިޑެސީ ފޯމު އިލެކްޝަންސް ކޮމިޝަންގެ ރައީސް ފުއާދު ތައުފީގާ ހަވާލު ކުރެއްވީ ވެސް އުމަރު ނަސީރެވެ. އުމަރާ އެކީގައި އޭނާގެ ރަނިންމޭޓު އަދި ހޯމް މިނިސްޓްރީގެ ކުރީގެ ޑެޕިއުޓީ މިނިސްޓަރު އަހުމަދު ސަލީމް(މާޒް ސަލީމް) ވެސް ބައިވެރިވެވަޑައިގެންނެވިއެވެ.
އަދި އުމަރަށް ތާއީދު ކުރާ އޭނާގެ ސަޕޯޓަރުން ވެސް ބައިވެރިވެފައިވެއެވެ.
ރިޔާސީ އިންތިހާބުގައި އަމިއްލަ ގޮތުން ވާދަކުރައްވާ ނަމަ، މަދުވެގެން 1،500 މީހުންގެ ސޮއި ހަމަކުރަން ޖެހެއެވެ. އެކަމަކު، އުމަރު ދާދި ފަހުން ވަނީ 2،000 މީހުންގެ ސޮއި ހަމަކޮށްފައެވެ. އުމަރު ވަނީ ރިޔާސީ އިންތިހާބު ކާމިޔާބު ކުރައްވާނެ ކަމުގެ ޔަގީން ކަން ވެސް ދެއްވައިފައެވެ.
އުމަރު ވަނީ 2008 ވަނަ އަހަރާއި 2013 ވަނަ އަހަރުގެ ރިޔާސީ އިންތިހާބުގައި ވާދަކުރައްވައިފައެވެ. އެކަމަކު، އޭނާ އަށް ދެވަނަ ބުރަކަށް ދެވޭ ވަރަކަށް ވޯޓު ހޯއްދެވިފައެއް ނުވެއެވެ. އެ ދެ ނާކާމިޔާބީއަށް ފަހު 2018 ގެ ރިޔާސީ އިންތިހާބުގައި ވެސް ވާދަކުރައްވަން ނިންމަވައި 1،500 ސޮއި ވެސް ހަމަކުރެއްވިއެވެ. އެކަމަކު، ފަހު ވަގުތު އުމަރު ވަނީ ރިޔާސީ އިންތިހާބުގައި ވާދަނުކުރައްވަން ނިންމަވައިފައެވެ.
