ޕްރޮގްރެސިވް ކޯލިޝަންގެ ކެންޑިޑޭޓަކު ހުންނާނެ، ކަމަށާއި ރައީސް ޔާމީން މިނިވަން ކުރެވޭނީ އިންތިޚާބު ކާމިޔާބުކޮށްގެން ކަމުގައި ޕީޕީއެމްގެ ކުރީގެ ސެކެޓްރީ ޖެނެރަލް ޑރ.ޚަލީލް ވިދާޅުވެއްޖެއެވެ.

ޑރ.ޚަލީމް މިހެން ވިދާޅުވީ ރައީސް ޔާމީނަށް ރިޔާސީ އިންތިޚާބުގައި ވާދަ ނުކުރެވޭނެކަމަށް ސްޕްރީމް ކޯޓުން ނިންމި ހިސާބުން އުފެދިފައިވާ ޚިޔާލް ތަފާތުވުންތަކުގައި އިންތިޚާބު ބޮއިކޮޓް ކުރުމަށް ރައީސް ޔާމީން ވިދާޅުވި ނަމަވެސް އެކަން އިދިކޮޅު ޖޮއިންޓް ސެނެޓުން ފާސްވެފައި ނުވާ ދަނޑިވަޅެއްގައެވެ.

ޑރ.ޚަލީލް ވިދާޅުވީ މިވަގުތަކީ ޕްރޮގްރެސިވް ކޯލިޝަންގެ މެމްބަރުންގެ އުންމީދުތަކާއި އެކު ކެންޑިޑޭޓަކު ނެރެގެން އިންތިޚާބު ކާމިޔާބު ކުރަންވީ ވަގުތުކަމަށެވެ ރައީސް ޔާމީން މިނިވަން ކުރެވޭނީ ރިޔާސީ އިންތިޚާބުގައި ކެންޑިޑޭޓަކު ނެރެގެން ކަމަށާއި، އެކަން ކުރުމަކީ މިވަގުތު ކުރަންޖެހޭ ކަމެއްކަމަށެވެ.

ޕީޕީއެމް/ ޕީއެންސީގެ އަދި ރައީސް ޔާމީންގެ ސަޕޯޓަރުން މާޔޫސް ނުވާތި! މި ކޯލިޝަން އިން ރިޔާސީ އިންތިޚާބު 2023ގައި ވާދަކުރާނެ. ރައީސް ޔާމީން މިނިވަން ކުރެވޭނީ މި ކޯލިޝަނުން ރިޔާސީ އިންތިޚާބު ކާމިޔާބުކޮށްގެން.

– ޑރ.ޚަލީލް ވިދާޅުވިއެވެ.

އިދިކޮޅު ޕީޕީއެމް/ޕީއެންސީން ރިޔާސީ އިންތިޚާބުގައި ވާދަކުރަން އެ ކޯލިޝަނުގެ ލީޑަރު އަދި ކުރީގެ ރައީސް ޔާމީން ބޭނުންފުޅު ނުވި ނަމަވެސް، ޕީއެންސީގެ ފަރާތުން އިންތިޚާބުގައި ވާދަކުރެއްވުމަށް މާލޭގެ މޭޔަރު ޑރ. މުހައްމަދު މުއިއްޒުގެ ކެންޑިޑެސީ މާދަމާ ހުށަހަޅަން ވަނީ ނިންމާފައެވެ.

އިންތިޚާބުގައި ވާދަކުރުމުގެ ފުރުސަތު މާދަމާގެ މެންދުރު 2:00 އަށް ހަމަވާއިރު، އޭގެކުރިން މުއިއްޒުގެ ކެންޑިޑެސީ ފޯމު އީސީއަށް ހުށަހަޅާނެ ކަން ވަނީ އެނގިފައެވެ. ޕީއެންސީގެ ރިޔާސީ ޓިކެޓު ލިބިވަޑައިގެންނެވުމުން، މުއިއްޒު ވަނީ އޭނާގެ ރަނިންމޭޓުގެ ގޮތުގައި މަޖިލީހުގެ ފަރެސްމާތޮޑާ ދާއިރާގެ މެމްބަރު ހުސެއިން މުހައްމަދު ލަތީފް (ސެންބެ) ހަމަޖައްސަވައިފައެވެ.