މިއަހަރުގެ ރިޔާސީ އިންތިހާބުގައި ވާދަކުރައްވާނެ ކަން އިއުލާނު ކުރައްވާފައިވާ ކުރީގެ ހޯމް މިނިސްޓަރ އުމަރު ނަސީރުގެ ކެނޑިޑެސީ މާދަމާ އިލެކްޝަން ކޮމިޝަނަށް ހުށަހަޅުއްވާނެ ކަމަށް އުމަރު ވިދާޅުވެއްޖެއެވެ.
އުމަރު ވިދާޅުވީ އިލެކްޝަނަށް ފޯމު ހުށަހަޅުއްވުމަށް ހަމަޖެހިފައިވަނީ މާދަމާ 1 ޖަހާއިރުކަމަށެވެ. އުމަރު ފޯމު ހުށަހަޅުއްވާއިރު، ރަނިންމޭޓަކަށް އައްޔަން ކުރެއްވި ބޭފުޅެއް އަދި ހާމަކޮށްފައި ނުވެއެވެ.
އަންނަ މަހުގެ ނުވަ ވަނަ ދުވަހު ބާއްވާ ރިޔާސީ އިންތިހާބަށް ކުރިމަތިލުމުގެ ފުރުސަތު ހޯމަ ދުވަހުގެ ނިޔަލަށް އިލެކްޝަންސް ކޮމިޝަން (އީސީ)ން ވަނީ ހުޅުވާލާފައެވެ. އެ އިއުލާނުގައިވާގޮތުން އަމިއްލަ ގޮތުން ކުރިމަތިލާ މީހެއް ތާއިދު އޮތްކަން ހާމަ ކުރުމުގެ ގޮތުން ހުހަހަޅާ 1،500 މީހުންގެ ސޮޔާއި މައުލޫމާތު ހިމެނޭ ލިޔުމެއް ލާން ޖެހެއެވެ.
އަމިއްލަ ގޮތުން އިންތިޚާބުގައި ވާދަކުރައްވާ އުމަރު ވަނީ މިނިވަންކޮށް ލާންޖެހޭ އަދަދަށް ވިރެ މާގިނައިން އެންމެ ފަސް ދުވަސް ތެރޭ ސޮއި ހޯދާފައެވެ. މިހާތަނަށް ރިޔާސީ އިންތިޚާބުގައި ވާދަކުރުމަށް އިލެކްޝަނަށް ފޯމު ހުށަހެޅި ރައީސް ޔާމީން އެކަންޏެވެ. ރައީސް ޔާމީންގެ ޝަރުތު ހަމަނުވާތީ ފޯމުވަނީ ބަލައި ނުގަންނަކަން ހާމަކޮށްފައެވެ. އެއާއިއެކު މިމައްސަލަ މިހާރު އޮތީ ސްޕްރީމް ކޯޓުގައެވެ.
އިންތިޚާބުގައި ވާދަކުރުމުގެ މުއްދަތު ހޯމަ ދުވަހަށް ހަމަވާއިރު، މާދަމާ ގިނަ ކެނޑިޑޭޓުންގެ ފޯމު އިލެކްޝަނަށް ހުށަހަޅާނެކަމަށް ބެލެވެއެވެ.
