އިދިކޮޅު ލީޑަރު ރައީސް ޔާމީން އަބްދުލްގައްޔޫމްގެ ކެންޑިޑެސީ ބަލައިނުގަތުމަށް އިލެކްޝަންސް ކޮމިޝަން (އީސީ)އިން ނިންމި މައްސަލައިގެ ފުރަތަމަ އަޑުއެހުން މިއަދު 3:00 އިންފެށިގެން ސުޕްރީމް ކޯޓުގައި މިހާރު ކުރިޔަށް އެބަ ދެއެވެ.

މިއަދުގެ ޝަރީއަތް ފެށުމަށްފަހު ކުޑައިރުކޮޅެއްގެ ތެރޭގައި ޝަރިއަތް ޓެކްނިކަލް މައްސަލައެއްގެ ސަބަބުން ކުޑަ ވަގުތުކޮޅަކަށް ޝަރީއަތް މެދުކަނޑާލާފައި ވެއެވެ. ޝަރީއަތް ފެށުމާއެކު އެންމެ ފުރަތަމަ ފުރުސަތު ދީފައިވަނީ ރައީސް ޔާމިންގެ ފަރާތުން މައްސަލަ ހުށަހެޅުމަށެވެ.

މިއަދު ސުޕްރިމް ކޯޓުގައި ކުރިޔަށްދާ އަޑުއެހުމަށް އިދިކޮޅު ޕީޕީއެމްގެ ގިނަ އިސް ބޭފުޅުން ވަނީ ހާޒިރު ވެފައެވެ.

ކެންޑިޑެސީގެ މައްސަލައިގެ ޝަރީއަތް މިރޭ ލަސްވަންދެން ކުރިއަށްގެންދަން އުއްތަމަ ފަނޑިޔާރު ވަނީ ނިންމަވާފައެވެ.

އިދިކޮޅު ލީޑަރު ރައީސް ޔާމީން އަބްދުލްގައްޔޫމްގެ ކެންޑިޑެސީ ބަލައިނުގަތުމަށް އިލެކްޝަންސް ކޮމިޝަން (އީސީ)އިން ނިންމި މައްސަލައިގެ ފުރަތަމަ އަޑުއެހުން މިއަދު 3:00 ޖަހާއިރު ސުޕްރީމް ކޯޓުގައި ތާވަލް ކޮށްފައިވަނިކޮށް އެކޯޓު ހިމެނޭ ސަރަހައްދުން ކަރަންޓް ކެނޑިފައި ވެއެވެ.

މިއަދުގެ އަޑުއެހުމުގައި ބައިވެރިވަޑައިގަތުމަށް ރައީސް ޔާމީން ވެސް މާލެ ވަޑައިގެންފައި ވެއެވެ.

އެމްއެމްޕީއާރުސީގެ ބޮޑު ހިޔާނާތުގައި ވ. އާރަށް ކުއްޔަށް ދޫކުރުމުގައި ރިޝްވަތު ނެގުމާއި މަނީ ލޯންޑަރކުރުމުގެ ކުށް ސާބިތުވެ ރައީސް ޔާމީން ގެންދަވަނީ 11 އަހަރުގެ ޖަލު ހުކުމެއް ތަންފީޒުކުރައްވަމުންނެވެ.

ޤާނޫނު އަސާސީ ބުނާގޮތުން ރައީސުލްޖުމްހޫރިއްޔާއަށްވުމުގެ ޝަރުތުތަކުގެ ތެރޭގައި ޖިނާއި ކުށެއް ސާބިތުވެގެން އެއް އަހަރަށްވުރެ ދިގު މުއްދަތެއްގެ ހުކުމެއް އޮތްނަމަ އެ ހުކުމެއް ތަންފީޒުކޮށް ނިމުމުނުތާ ނުވަތަ ކަނޑައެޅުނު އަދަބު މައާފުކުރިތާ 3 އަހަރުވެފައިވާ މީހަކަށް ވާންޖެހެއެވެ.

އިންތިޚާބުތަކާއި ބެހޭ އާއްމު ޤާނޫނު ބުނާގޮތުން ކެނޑިޑެސީއާއި މެދު ސުވާލު އުފެއްދިއްޖެ ނަމަ އެ މައްސަލަ ހުށައެޅޭނީ ހަމައެކަނި ސުޕްރީމް ކޯޓަށެވެ. އަދި މިގޮތަށް ހުށައަޅާ މައްސަލައެއް އެ ކޯޓަށް ހުށައަޅާތާ ގިނަވަގެން 7 ދުވަހުގެ ތެރޭގައި ނިންމަވަންޖެހެއެވެ. އަދި މި ފަދަ މައްސަލަތައް ނިންމަންވާނީ ސުޕްރީމްކޯޓުގެ ހުރިހާ ފަނޑިޔާރުން ހިމެނޭ ބެންޗަކުންކަމަށާއި ސުޕްރީމްކޯޓުގެ އެ ނިންމެވުމަކީ އެންމެ ފަހުގެ ނިންމެވުންކަމަށްވެސް ޤާނޫނު އަސާސީގައިވަނީ ބަޔާންކޮށްފައެވެ.

ރިޔާސީ އިންތިޚާބުގައި ވާދަކުރުމުގެ މުއްދަތު މިމަހުގެ 7 ވަނަ ދުވަހު ހަމަވާނެއެވެ. މިހާތަނަށް އިލެކްޝަނަށް ފޯމު ހުށަހަޅުއްވާފައިވަނީ ރައީސް ޔާމީން އެކަންޏެވެ. އަދި އެހެން ކެނޑިޑޭޓަކު ފޯމު އިލެކްޝަނަށް ހުށަހަޅުއްވާފައި ނުވެއެވެ.